Isaiah 11

Iese Rigina

Iese badina amo
tuhutuhu ta baine gara kau;
bona ia ramuna amo
rigi ta baine tubu.
Iehova ena Lauma ese baine rohea,
aonega bona lalo-parara laumana,
hahealo bona siahu laumana,
diba-maoro bona Iehova garina laumana.
Ia ese Iehova garina baine moalelaia.

Ia na basine hahemaoro, matana e itamu ḡaudia daidiai,
bona lalona basine hadaia, taiana e kamonaimu herevadia daidiai;
a mai kara maoromaorona ida ia ese ogoḡami taudia baine hahemaoro henidia,
bona ia!ona baine hadaia maoro, tanobada ena manau taudia ediai;
ia uduna auna amo tanobada baine botaia,
bona uduna bibinadia hodahodana amo kara dika taudia baine aladia mase.
Kara maoromaoro na ia gabana ḡauna ai bainela,
bona kara momokani na ia koekoena igegelaina ḡauna ai bainela.

Uda sisiana na mamoe natuna ida bae noho,
bona taiga na nani natuna ida bae hekure;
boromakau natuna bona leona bona ubu-ubu ḡauna na bae noho hebou,
bona mero maraḡina ta ese baine hakaudia.
Boromakau hahinena bona bea bae aniani hebou,
bona natudia bae hekure hebou;
bona leona ese rei kakoro baine ania,
boromakau maruanena na heto.
Rata e inumu merona na gaigai ena guri latanai baine gadara,
bona rata vada e dadaraia merona ese imana na duba ena guri lalonai baine toia vareai.
Basie hahehisi bona basie hahebua tari,
egu ororo helaḡana idoinai ai;
badina be tanobada na Iehova idiba-maorona ai baine honu,
davara ena honuhonu-dae na heto.

10 Una dina ai Iese ramuna baine gini, taunimanima loḡora edia pepe; bese idau-idau ese ia bae tahua, bona ena noho gabudia bae herea dae.

Kwabukwabudia bae lou mai

11 Una dina ai Ḡaubada ese nega iharuana imana baine toia roro, ena bese kwabukwabudia iabi-loudia totona: Asuria amo, Aigupto amo, Pataro amo, Etiopia amo, Elam amo, Sinara amo, Hamat amo, bona kone ahadia amo.

12 Ia ese pepe ta baine duduia isi, bese idau-idau edia,
bona Israel ena henege-daure taudia baine haboudia,
bona Iuda ena karoho taudia baine gogodia
tanobada daigunidia haniosi amo.
13 Efraim ena vagege baine heabi oho,
bona Iuda ihahisina taudia bae henege daure;
Efraim ese Iuda basine vagege henia,
bona Iuda ese Efraim basine hahisia.
14 A Filistia taudia edia ororo gabaedia na bae hedai henidia lahara kahana ai;
bona hebou tamona ai baela, laurabada kahana taudia edia kohu bae dadi.
Imadia bae toi roro, Edom bona Moab ihadikadia totona;
bona Amono taudia ese bae kamonai henidia.
15 Bena Iehova ese Aigupto davara dogurana baine habuaia tari vaitani,
bona Sinavai Badana daenai imana baine davea,
mai ena lai siahuna ida;
bena baine botaia parara, rege hitu ai baine aru,
bona taunimanima na bae raka hanai diba, aedia basie paripari.
16 Bena laolao dalana ta baine helailai Asuria amo,
ena bese kwabukwabudia edia;
Israel ena heḡereḡerena,
Aigupto tanona amo e raka lasi negana ai.
Copyright information for `MEU