Isaiah 16

Idia ese mamoe natudia vada e siaidia,
tano lohiana dekenai,
Sela amo, tano ḡaḡaena dalana ai,
ela bona Siona natuna kekenina ena ororo.
Manu e roho eva-evamu na heto,
manu natudia e hakarohodiamu na heto,
Moab hahinedia na unuheto,
Aranon turu-hanai gabudia ai.
Ba hahealo,
hahemaoro ḡoevaḡoeva ba karaia;
ikerukerumu na dina tubua ai ba ha-udunaia,
hanuaboi diburana na heto.
Vada e luludia lasi taudia ba hunidia,
e heau maurimu tauna taona basio torea.
Moab amo e luludia lasi taudia na
bogaragimui ai bavabidia dae;
hahebua-tari tauna imana amo
iharoho-mauridia gabuna ai baola.
Negana bainema, hahehisi tauna baine boio,
bona hahebua-tari baine doko,
bona ae-hemoimoilai karadia e karamu tauna na
tano amo baine puki;
una negana ai terono ta na hebogahisi ai baine gini,
ia latanai heabidadama tauna ta baine helai,
David ena kalaga ai,
hahemaoro e karaiamu bona hahemaoro ḡoevaḡoeva e tahuamu
bona kara maoromaoro ikarana ai e haraḡamu tauna.

Moab ena heaḡi sivaraina vada ta kamonai,
ena hekokoroku na dibada;
e hekokorokumu, e heaḡimu, e gwau daḡemu,
ena heaḡi herevadia na koikoi.
Taunabunai, Moab taudia bae tai lolololo,
bona taunimanima iboudiai na Moab dainai bae tai.
A tai, mai dara-dokomui ida,
Kiri-haresete ena vine huahua kaukaudia manedia ba tailaidia.
Badina be Hesebon umadia na e maraimu,
bona Sibma vinena danu;
basileia idau-idau lohiadia ese
ia rigina vada e bokodia;
unu rigi na e laova ela bona Iasere,
e loava ela bona tano ḡaḡaena;
ia tuhutuhuna na e tubu rohorohova,
davara e hanaiava.
Taunabunai Iasere ida a taitaimu,
Sibma vinena taina a taimu.
Hesebon bona Eleale e,
iruru-matagu amo na hapariparimuimu;
badina be tuari honena vada e kau,
emui huahua bona emui taboro latadiai.
10 Moale bona lalo-namo na
uma mai anina amo vada eme heabi oho;
bona vine imeadia lalodiai
ane asie abimu bona asie hisi daemu;
vine itaolaidia gabudia ai tau ta ese vine se moimoilaimu,
bona ta se hisi daemu.
11 Taunabunai, Moab dainai lalogu e taimu, hatai-hatai ḡauna na heto,
bona Kiri-herese danu dainai.

12 Moab baine hedinarai, atai gabuna ai baine hekwarahi, ena gabu helaḡana ai baine ḡuriḡuri negana ai ḡau ta basine davaria.

13 Nega gunadia ai Iehova ese Moab na unu e herevalaia toma. 14 A harihari Iehova na e tomu, Ena be Moab taudia na hutuma herea, to laḡani toi, ḡaukara tauna ena gwauhamata laḡanidia heḡereḡeredia, lalodiai Moab hairaina na heihi-ihirai ḡauna ai bainela; bopa bae mauri taudia na baegadoi bona taudia bae manoka.

Copyright information for `MEU