Isaiah 18

Etiopia herevana

Aha! Manu hanidia gurudia tanona,
Etiopia sinavaidia unukahadia ai;
ena gwaukau taudia na revareva vanagidia ai e siaidiamu,
Nilo sinavaina amo.
Gwaukau taumui mai haragamui e, aola,
taudia lalata bona kopidia mamanada-mamanada besena dekediai,
gabu kahikahidia bona gabu daudaudia ai e gari heniamu oreana dekenai;
una bese na mai siahuna bona mai kwalimuna,
ena tano na sinavai ese e hapararaiamu.

Tanobada inoholaina taumui iboumui ai,
tanobada latanai o nohomu taumui e,
toa ta ororo ai bae duduia isi negana ai, ba itaia!
Kibi ta bae hiriria negana ai, ba kamonai!
Badina be Iehova ese ini e hereva henigu toma, eto:
Egu noho gabuna amo baina roharoha, asi reḡereḡegu;
dina e taramu siahuna na heto,
ninoa taboro negana siahuna ai na heto.
Badina be taboro negana do basine kau ai,
bure vada e marai bona vine huahuana e magemu negana ai,
ia ese kwama-kwama kaiadia amo baine kwamadia,
bona e hetoi lasimu rigidia baine lapa oho.
Iboudiai bae mia,
ororo manudia, damudia e tahumu ḡaudia, adia,
bona tano boromadia adia.
Siahu negana ai damudia e tahumu manudia ese bae anidia,
bona keru negana ai tano boromadia iboudiai ese.

Una negana ai haida ese edia herahia ḡaudia bae mailai, Iehova Sabaota ena.

Taudia lalata bona kopidia mamanada-mamanada oreana,
gabu kahikahidia bona gabu daudaudia ai e gari heniamu oreana.
bese mai siahuna bona mai kwalimuna,
ena tano na sinavai ese e hapararaiamu besena,
ese Siona ororona, Iehova Sabaota ladana e nemaiamu gabuna, bae maila.

Copyright information for `MEU