Isaiah 48

Ḡau matamatadia

Iakob iduhuna e, ina na a kamonai!
Umui na Israel ladana o henemailaiamu,
bona Iuda ese e havaramui.
Umui na Iehova ladana ai o gwau hamatamu,
bona Israel Diravana o gwauraia hedinaraimu,
a dia hereva momokani ai bona dia kara maoromaoro ai.
Badina be sibomui hanua helaḡana o henemailaiamu,
bona Israel Diravana enai o taomu;
ia ladana na Iehova Sabaota.

Ḡau gunadia na idau nega ai na gwaurai hedinarai;
herevadia na udugu amo e lasi, na hahedinaraidia;
na karadia taku, bena e vara.
Badina be lau dibagu oi lalomu na auka,
bona aiomu na auri,
bona bagumu na auri labora-laborana.
Nega gunana amo emu ai na gwauraidia hedinarai,
do asie vara ai na herevalai henimu,
oi na baoto “Egu kaivakuku ese e karadia,
egu dirava laulauna, e koroa ḡauna bona e hahetaria ḡauna,
ese e haganilaidia”, na garina.

Vada o kamonai; harihari ina idoinai ba itaia;
basio gwauraia hedinarai a?
Ina negana amo lau ese ḡau matamatadia baina hamaorolaimu,
ḡau hehunidia, do asi dibamu ḡaudia.
Harihari vada na havaradia, dia idau nega ai;
ema bona ina dina, sivaraidia na so kamonai,
baoto “A itaia, vada na dibadia” na garina.
Nega ta so kamonai, nega ta so diba,
nega gunadia amo taiamu se kirara.
Badina be lau dibagu oi na kara dibaka herea taumu,
bona emu vara dinana amo gwau-edeede tauna e gwauraimuva.

Lau ladagu dainai egu badu na halahelaiamu,
lau i'imodaigu dainai emu ai na laoa ahumu,
basina negemu daure helaoreana.
10 A itaia, vada na haḡoevamu, a diasilver heḡereḡerena,
hisihisi amuna ai vada na tohomu.
11 Lau sibogu daigu ai na karaiamu, lau sibogu daigu ai,
badina be lau ladagu na ede bae hamiroa toma?
Lau hairaigu na ta basina henia.

Iehova ese Israel baine hamauria

12 Iakob e, a kamonai henigu!
Israel, na boiria tauna, a kamonai henigu!
Lau na Ia; lau na gini-gunana;
lau na gini-gabena danu.
13 Lau imagu ese tanobada badina e atoa,
bona imagu idibana ese guba e idia roro;
lau na boi henidiamu negadia ai,
idia na e gini tore heboumu.
14 Umui iboumui ai, a hegogo, ba kamonai!
Idia bogaragidia ai daika ese ini ḡau vada e gwaurai?
Iehova ese ia e lalokau heniamu;
ia ese iena lalo-hadai na Babulono latanai baine karaia,
bona ia imana ese Kaldea taudia baine hadikadia.
15 Lau, lau sibogu, vada na hereva, vada na boiria,
vada na hakaua mai, bona ena dala ai ena namo baina habadaia.
16 A raka henigu kahi, ina na ba kamonai:
Matamana negana amo asina hereva hehuni;
kara e vara negana amo lau na unuseni ai.
Harihari Ḡaubada Iehova ese vada e siaigu,
bona ena Lauma danu.
17 Iehova, Ihamaurimu Diravana,
Israel ena Helaḡa Diravana,
ini e gwau tomamu:
Lau binai Iehova, emu Dirava;
emu namo ihabadana dalana na hadibalaimumu,
emu raka dalana namona ai na hakaumumu.
18 Egu haheḡani boma kamonai henidia bema namo;
bena emu maino na sinavai ida bema heḡereḡere,
bona emu kara maoromaoro na davara hurehuredia ida bema heḡereḡere;
19 oi garamu bema vara kone mirina na heto,
bona oi vevemu miri dimuradia heḡereḡeredia;
idia ladadia na basiema boio,
bona lau vairagu ai basiema helalo nege.

20 Babulono amo ba raka lasi, Kaldea ba heautania;
ina na ba gwauraia mai moale hisi-daena ida,
ba gwauraia hedinarai;
ba siaia lao ela bona tanobada dokona,
baoto “Iehova ese ena hesiai tauna Iakob vada e hamauria”.
21 Ia ese tano ḡaḡaena ai e hakaudia hanai negana ai,
idia na asie ranu mase;
nadi-gini amo ia ese ranu e ha-arua,
nadi-gini e botaia parara, bena ranu na e aru lasi.
22 Iehova na e tomu:
Kara dika taudia na asi edia maino.
Copyright information for `MEU