James 1

Lau Iakobo, Dirava ena hesiai tauna bona Iesu Keriso ena danu, veve gwauta-rarua taumui, idau tano idau tano ai o noho hedoa-hedoamu, na hahenamo henimuimu.

Haheauka

Varavaragu e, hedibaḡani ese bae butumui tao negadia ai na lalomui baeto ene na moale mo. Dibamui, emui abidadama itohona ese haheauka e havaraiamu. A haheauka ese ena ḡaukara baine haḡuḡurua baine namo, bena ba ḡoeva dae bona ba namo ḡuḡuru, ḡau ta ai basio dabu.

Umui ta aonega ai bema dabu, ia ese taunimanima iboudiai e henidia dudu kaumu bona se gwaugwaumu Diravana na baine noia, bena do baine henia. To abidadama ai baine noinoi, basine daradara; badina be daradara tauna na davara hurehurena na heto, lai ese e hohoamu bona e haginiamu. Una tau basine laloa ḡau ta Lohiabada ena amo baine abia; badina be lalo rua tauna na ena kara iboudiai asie gini tutuka-tutukamu.

Ogoḡami bona Taḡa

Ekalesia tauna ogoḡamina baine moale, Dirava ese baine abia isi negana ai. 10 Bona taḡa tauna danu baine moale, Dirava ese baine hamorua negana ai; badina be rei huahuana na heto ia na baine lao bubuni. 11 Badina be dina e tata dae rohamu, e ḡaraḡaramu,rei e hamaraiamu; bena huahuana e hehuhumu, bona ita-itana namona e oremu. Taḡa tauna danu unu baine lao bubuni toma.

Dirava na se dibaḡanidamu

12 Hedibaḡani ai e haheaukamu tauna be namo, badina be baine kwalimu negana ai ia ese mauri ena kwara-havava ḡauna baine abia, Dirava ese vada e gwauraia hamata ḡauna, ia bae ura henia taudia ese bae abia e tomamu. 13 Hedibaḡani ai ta basineto “Dirava ese e dibaḡanigumu”; badina be dika na Dirava idibaḡanina asi dibana, bona Dirava ese danu tau ta se dibaḡaniamu. 14 A taunimanima ta sibona ena ura dikadia ese lalona e aniamu bona e koiamu. 15 Bena ura dikadia na e rogorogomu, kara dikadia e havaramu, bona kara dikadia na e lomu, mase e abiamu.

16 Varavaragu e, egu lalokau, sibomui basio hekoi; 17 harihari ḡaudia namodia iboudiai bona herahia ḡaudia ḡoeva-daedia iboudiai na atai amo e maimu, diari idoidiai ihavaradia Diravana ena amo e dihomu; iena diari na se idaumu bona se kerekeremu. 18 Sibona ena ura dainai ia ese ena hereva momokani amo e havarada, e havaradia ḡaudia anidia roboadia na heheto.

Eda diba heḡereḡerena baita kara

19 Varavaragu e, egu lalokau, ina na dibamui. A ta ta hereva ikamonaina ai baine haraḡa, hereva igwauraina ai baine halahe, badu ai danu baine halahe. 20 Badina be taunimanima edia badu ese Dirava ena kara maoromaoro se havaraiamu. 21 Taunabunai, miro idoinai bona lalohadai dikadia lalomui ai e tubumu ba nege daure; bona lalonlui ai vada e hadoa herevana, laumamui baine hamauridia diba ḡauna, bavaabia dae, mai manaumui ida.

22 Hereva ibadinana taumui ai baola; bema hereva ikamonaina taumui mo, una be sibomui o hekoimu. 23 Badina be tau ta hereva baine kamonai to basine badinaia, ia na hevarivari ai sibona vairana heida-idana e itaiamu tauna na heto; 24 e itaiamu, bena e raka ohomu, asi kaimana e helalo boiomu ia be edeheto. 25 A tau ta taravatu ḡoeva-daena, ura kwalimu taravatuna, baine itaia tao bona henunai baine noho, basine kamonai mo a karana danu baine karaia, una tau be hahenamo baine abia ena ḡaukara ai.

26 Tau ta lalona ai baineto ia na Dirava ibadinana tauna, to malana se dogoa taomu a sibona lalona e hekoimu, una tau ena Dirava ibadinana na asi anina. 27 Dirava ibadinana ḡoevaḡoevana bona asi bebeka-bebekana Tamada Dirava vairanai be iniheto: ihareha bona vabu baita igodia ita edia hisihisi ai, bona siboda baita hegima, tanobada mirona ese basine hamiroda.

Copyright information for `MEU