James 3

Udumui ba nari

Varavaragu e, umui hutuma hahediba ai basiola, badina be ai hahediba taumai ihahemaoro-henimai baine auka. Badina be ita iboudai ta hekwakwanai louloumu; tau ta ena hereva ai se hekwakwanaimu, ia na ḡoeva-dae tauna, tau-anina ireḡuna na mai dibana. Hosi ududia ai idogotaodia auridia ta atomu, bae kamonai henida helaoreana; bena taudia idoidiai ta hatatadia kerehaimu. Lagatoi danu ba ita, idia na babada, bona lai badadia ese e odamu, to tari maraḡi-maraḡina ese e tarimu, tari tauna ena ura gabuna baela. Unuhetomana, mala be ḡau maragina, to e heaḡi badamu. Lahi danu ba haeroa, ia na maraḡi to uda badana e araiamu.

Benaini, mala be lahi. Ia na kara dika idoinai e haboumu, tauda reḡedia bogaragidiai, bena tau-anida idoidiai e hadikamu. Ia na mauri idoinai iaralaina; ena lahi danu Gehena amo e abiamu. Badina be mauri ḡaudia iboudiai, e rakamu ḡaudia bona e rohomu ḡaudia bona e raumu ḡaudia bona davara gaudia, taunimanima na ihamanadadia mai dibadia, bona vada e hamanadadia. A mala ihamanadana na tau ta asi dibana; e raivaraivamu mai dikana ida, mase muramurana amo e honumu. Iena amo Lohiabada, ita Tamada, ta hanamoamu; iena amo danu Dirava heida-idaua ai e karadiamu taudia ta uduguiraidiamu. 10 Udu tamona amo hahenamo bona heuduguirai e lasimu. Varavaragu e, una na dia namo. 11 Guri tamona amo ranu gaihona bona ranu iditana e lohi lohi daemu a? 12 Varavaragu e, suke auna ai olive huahuadia bae dobi a? Eiava vine auna ai suke huahuadia bae dobi a? Tadi danu ranu gaihona se havaraiamu.

13 Daika na bogaragimui ai e aonegamu bona lalona e pararamu? Ia ese ena mauri namona na ena kara ai baine hahedinaraia, aonega korikori manauna ai. 14 A vaḡeḡe dikadia bona heiri-heiri na lalomui ai bema mia, basioma heaḡi bona hereva momokani basioma hagagevaia. 15 Una na dia atai amo e maimu aonegana, a tanobada ḡauna, tau-anina ena, lauma dikadia edia. 16 Badina be vaḡeḡe bona heiri-heiri e miamu gabuna ai, heloḡo-heloḡo bona kara dika idoinai e miamu. 17 A atai amo e maimu aonegana toana gini-gunana be ḡoevaḡoeva, murinai maino, gado-namo, lalomanada. Ia na hebogahisi bona huahua namodia amo e honumu. Ia na asi ena daradara bona asi ena dibaka. 18 Kara maoromaoro anina be maino ai e hadoamu, herohemaino taudia ediai.

Copyright information for `MEU