Jeremiah 16

Iehova ena hahemaoro

Iehova ena hereva na egu ai e kau, eto: Hahine ta basio adavaia, bona natumu mamaruanedia eiava hahinedia basio havaradia ina gabu ai. Badina be Iehova ese ina tano ai e varamu memerodia bona kekenidia, bona e abidia hahinedia bona e havaradia taudia na ini e herevalaidia tomamu: Idia na mase goreredia amo bae mase. Haida ese basie rohedia ahu bona basie guridia; idia na tano kopina ai bae mia, boromakau taḡena na heto. Dare bona doe ese bae hamasedia, bena tau-ani masedia na atai manudia bona uda boromadia adia aniani ai baela.

Badina be Iehova na ini e gwau tomamu: Taitai rumana lalonai basio raka vareai, rohe-ahu totona basiola, basio tailaidia; badina be egu maino bona egu lalokau bona egu hebogahisi na ina bese taudia edia amo vada na abi oho. Iehova na e herevamu. Kikina-badana na ina tano ai bae mase; haida ese basie guridia; bona tau ta ese basine tailaidia, eiava basine tai hekakasi eiava kwarana basine naua, idia daidiai. Ta ese aniani basine dabaraia taitai tauna ana, mase dainai tauna baine haloa totona; bona ta ese tauhalo keherena basine henia, tamana eiava sinana daidiai baine inua totona. Aria rumana lalonai basio raka vareai, aria taudia ida basio helai hebou, idia ida basio aniani bona basio inuinu. Badina be Iehova Sabaota, Israel Diravana, na ini e gwau tomamu: A itaia, umui vairamui ai bona umui emui nega ai, kiri reḡedia bona moale reḡedia, headava matamata tauna gadona bona headava matamata hahinena gadona, na ina gabu ai baina hadokodia.

10 Ini hereva iboudiai na ina bese taudia ba hamaorodia negana ai, idia ese bae hereva henimu, baeto, Dahaka dainai Iehova ese ina dika badana idoinai na ai latamai ai vada e gwauraia? Emai kara havara be dahaka? Emai kara dika, Iehova, emai Dirava, enai vada a karaia, be dahaka? 11 Una negana ai oi ese ba haere henidia, baoto, Iehova na e tomu: Badina be tamamui ese vada e rakatanigu, dirava idaudia muridia amo vada ela, isiaidia vada e lao heni, bona vada e toma henidia diho; lau vada e rakatanigu bona egu taravatu asie badinaia, 12 bona tamamui edia kara dika vada o hereadia; a itaia, iboumui ai emui ura dikadia auka-hereadia o badinadiamu, bona asio uramu lau ba kamonai henigu. 13 Taunabunai, lau ese ina tano lalona amo baina tahomui lasi, umui asi dibamui bona tamamui asi dibadia tanona ai, unuseni ai dirava idaudia isiaidia ba lao heni, dina ai bona hanuaboi ai; badina be lau ese basina lalo namo henimui.

14 Iehova na e tomu: Taunabunai ba itaia, dinadia na e maimu, taunimanima na basie hereva lou, basieto “Iehova; Israel taudia na Aigupto tanona amo e hakaudia lasi Diravana, e maurimu heḡereḡerena”, 15 a baeto “Iehova, Israel taudia na mirigini kahana tanona amo bona e luludia lao tanodia iboudiai amo vada e loulaidia Diravana, e maurimu heḡereḡerena”. Badina be lau ese ma baina hakaudia lou, edia tano korikori, senedia na henidia tanona, lalonai.

16 Iehova na e tomu: A itaia, haoda taudia hutuma na boiridiamu; idia ese bae aladia. Una murinai, labana taudia hutuma baina boiridia; bena ororo badadia bona maraḡidia iboudiai latadiai bae tahudia, bona kohuakohua lalodiai danu. 17 Badina be lau matagu ese edia dala iboudiai e raraidiamu; egu ai idia na asie hehunimu, bona edia kara-havara na lau matagu amo asie helavahumu. 18 Edia kara havara bona edia kara dika davadia baina henidia harua, badina be idia ese egu tano na edia kaivakuku dika-hereadia tau-anidia amo vada e hamiroa, bona lau ahugu tanona na edia ḡau dika-rohorohodia amo vada e hahonua.

19 Iehova e, egu goada bona egu gabu-aukana,
egu roho-mauri gabuna, hekwakwanai dinana ai;
tanobada dokodia amo
bese iboudiai bae vasi, baeto:
Tamamai ahudia na koikoi mo,
ḡau asi anidia bona asi namodia.
20 Tau ta ese sibona ena dirava baine karadia diba a?
Unuhetomadia na dia dirava.

21 Taumabunai, a itaia, lau ese baina hadibadia, ina nega tamona egu siahu bona egu goada baina hadibalaidia, bona bae diba lau ladagu na Iehova.

Copyright information for `MEU