Jeremiah 18

Hereva heḡereḡerena: Uro ikarana tauna

Iehova ena hereva Ieremia enai e kau, eto: A tore isi, uro ikarana tauna ena ruma a diho henia lao, unuseni ai baina hereva henimu. Taunabunai, uro ikarana tauna ena ruma na diho henia lao, unuseni ai ena uro na igirogirona patana ai e ḡaukaralaiava. E karaiava urona na uro ikarana tauna imana ai e dika; bena ia ese e kuia lou, uro idauna ta e karaia, uro ikarana tauna ena lalo-hadai heḡereḡerena.

Bena Iehova ena hereva na egu ai e kau, eto: Israel besena e, ina uro ikarana tauna vada e karaia heḡereḡerena ai lau ese basina kara henimu diba a? Iehova na e herevamu. Israel besena e, a itaia, raro na uro ikarana tauna imana ai na heto, umui na lau imagu ai. Bema nega ta ai lau ese bese ta eiava basileia ta baina herevalaia, bainato baina butua oho, baina hahegiḡia dobi, baina habuaia tari; bena una na herevalaia besena ese ena kara dika baine rakatania, lau na baina helalo kerehai, bona na haeroa karana, ia ihadikana karana, na basina kara henia. Bona bema nega ta ai lau ese bese ta eiava basileia ta baina herevalaia, bainato baina haginia bona baina hadaia, 10 bena ia na lau vairagu ai baine kara dika bona lau gadogu basine kamonai, lau na baina helalo kerehai, bona na haeroa karana, ia ihanamona karana, na basina karaia. 11 Taunabunai, harihari Iuda taudia bona Ierusalem inoholaina taudia na ba hamaorodia, baoto, Iehova ini e gwau tomamu: A itaia, lau ese umui ihadikalaimui karana ta na hegaegaelaiamu bona ihadikalaimui dalana ta na haeroa heḡaeḡaemu. Ibouboumui ai emui dala dikadia amo ba lou, bona emui dala bona emui kara ba haḡoevadia.

12 A idia na e tomu, Una na asi anina; ai na sibomai emai lalo-hadai baia badinadia, bona ta ta emai lalo-hadai dikadia baia goadalai, mai lalo-aukamai ida.

13 Taunabunai Iehova na ini e gwau tomamu:

Bese idau-idau bogaragidiai ba henanadai,
daika ese hereva inihetomana vada e kamonai?
Hane-ulato rami-hebouna Israel ese
ḡau dika-rohorohona ta vada e karaia.
14 Lebanonsnow -dia na Sirion hagadia amo e veve ohomu a?
Ororo ranudia, sinavai keruma-kerumadia, e kororomu a?
15 A lauegu bese taudia ese vada e lalogu boio;
muramura mai bonadia na dirava koikoidia e gabu henidia.
Idia na edia dala ai vada e hetutuhi,
sene negana daladia;
uda daladia ai vada e raka,
dia laolao dalana ai.
16 Edia tano na hahegari ḡauna ai vada e halaoa,
bae si henia hanaihanai ḡauna;
e rakaia hanaimu taudia iboudiai na gari ese e butudia taomu,
bona kwaradia e taiko-taikomu.
17 Laurabada na heto baina odadia rohoroho inaidia vairadiai,
baina muri henidia, basina vaira henidia, edia hahedika dinana ai.

Ieremia ena ḡuriḡuri

18 Bena idia eto, Aoma, Ieremia ihadikana daladia baita haero, badina be taravatu na hahelaḡa tauna enai basine boio, bona hahealo herevadia na aonega tauna enai basie boio, bona hereva na peroveta tauna enai basine boio. Aoma, baita uduguiraia, bona ena hereva ta basita abia dae.

19 Iehova e, a hakala henigu,
egu noinoi a kamonai!
20 Dika be namo davana a?
Ḡau tamona guri ta vada e ḡeia,
egu mauri iabi-ohona totona.
Ba laloa tao, lau na oi vairamu ai na gini,
idia ihanamodia herevadia baina gwaurai totona,
bona emu badu na idia edia amo baina laoa ahu totona.
21 Taunabunai, natudia na doe amo ba hahitolodia,
dare ena siahu henunai bavatodia,
adavadia na ba hagabanidia bona ba havabudia.
Edia tatau na dai-hanai gorerena ese baine hamasedia,
bona edia uhau na dare ese baine aladia mase tuari lalonai.
22 Dadidadi taudia ba siaidia bena bae hahoadia negana ai,
taitai na edia ruma amo baine hekamonai;
badina be guri vada e ḡeia lau iabigu totona,
bona idoa vada e atodia, lau aegu idoadia totona.
23 Ḡau tamona, Iehova e, edia kara iboudiai oi dibamu,
idia na e henega boumu, lau iala-masegu totona.
Edia kara havara basio gwaua tao;
edia kara dika na oi vairamu amo basio kokia oho.
Oi vairamu ai bae darere;
emu badu negana ai ba kara henidia.
Copyright information for `MEU