Jeremiah 30

Noho-hedoa taudia na bae lou

Iehova ena amo Ieremia enai e kau herevana binai. Iehova, Israel Diravana, na ini e gwau tomamu: Vada na gwaurai henimu herevadia iboudiai na buka ta ai ba tore. Badina be (Iehova na e tomu) negana be maimu lau ese egu bese taudia edia noho baina hanamoa lou, Israel taudia bona Iuda taudia danu; bona baina hakaudia lou mai, senedia na henidia tanona lalonai; bena bae ḡaunaia. Iehova na e herevamu.

Iehova ese Israel bona Iuda e herevalai herevadia bini. Iehova ini e gwau tomamu:

Gari taku lolona vada a kamonai,
gari bada lolona, a dia maino.
Ba henanadai bena ba diba,
tau ta baine rogorogo diba a?
Matona, badina be dahaka tatau iboudiai na itadiamu,
imadia na koekoedia ai heheato, e hekamonaimu hahinena na heto?
bona dahaka dainai vaira iboudiai vada e lalabora?
Madi, una dina na bada herea,
ia heḡereḡerena ta na lasi;
una na lalo-hisihisi negana, Iakob ena;
ḡau tamona, ena amo do bae hamauria.
Iehova Sabaota na e tomu: Una dina ai lau ese aiodia madunadia baina hakwaidu, bona iḡuidia auridia baina hamotu, bena idau taudia ese edia hesiai taudia ai basie halaodia lou. A idia ese edia Dirava Iehova bona edia pavapava David, idia daidiai baina hatorea isi lou tauna, na isiaidia bae lao heni. 10 Iehova na e tomu:

Egu hesiai tauna Iakob e, basio gari!
Israel e, kudoumu basine hetaha!
A itaia, dauha amo baina hamaurimu,
bona garamu danu iḡui ai e nohomu tanodia amo baina hamauridia.
Iakob baine lou, asi reḡereḡena baine laḡa ani,
bona ta ese basine hagaria.
11 Badina be lau na oi ida, baina hamaurimu totona;
Iehova na e herevamu.
Bese iboudiai baina ha-oredia vaitani,
hari bogaragidiai na hakarohomui rohoroho besedia;
a oi na basina ha-oremu vaitani.
Dika davana korikorina baina henimu,
momokani, matamu ihakanina basina reaia.
12 Badina be Iehova ini e gwau tomamu:

Emu hisihisi na asi ihanamona,
bona beromu na dika herea.
13 Ta ese emu ginikau gabuna basine durua,
beromu na asi muramurana,
asi ihamaurimu dalana ta.
14 E lalokau henimuva taudia ese vada e lalomu boio;
idia ese asie lalomumu;
badina be inai tauna na heto vada na rahumu mase,
inai tauna asi ena hebogahisi na heto davaniu vada na henimu;
badina be emu kerere na bada,
bona emu kara dika na hehedinararai horea-horea.
15 Dahaka dainai beromu o tailaiamu?
Emu hisihisi na asi ihanamona.
Badina be emu kerere na bada,
bona emu kara dika na hehedinararai horea-horea;
una dainai ini vada na kara henimu toma.
16 Taunabunai, e ha-oremumu taudia iboudiai na bae ha-oredia,
bona inaimu iboudiai na iḡuidia ai bae laohaidia;
e dadimumu taudia na bae dadihaidia,
bona damudia ai bae halaomu taudia iboudiai na
damu ai baina halaodia.
17 Badina be baina hamaurimu lou,
bona beromu baina hanamodia.
Iehova na e herevamu.
Badina be vada e gwauraimu “e lulua oho tauna”,
“Siona, ta ese se laloamu hanuana”.
18 Iehova ini e gwau tomamu:

A itaia, Iakob ena kalaga baina hanamoa lou,
bona ena noho gabudia baina bogadia hisi;
hanua na ena tano latalatana ai bae haginia lou,
bona pavapava rumana na ena gabu gunana ai baine gini.
19 Idia lalodia amo hahenamo anedia bae dae,
bona moale taudia gadodia danu.
Lau ese baina hahutumadia, idia na basie gadoi;
baina imodaidia, bena basie maraḡi.
20 Natudia na bae noho, nega gunadia heḡereḡeredia,
bona edia orea na lau vairagu ai bae haginia;
bona bae hahisihisidia taudia iboudiai na
matadia baina hakanidia.
21 Idia ta ese baine lohiadia;
idia bogaragidia amo ta ese baine biagudia.
Lau ese baina harakaia kahi, bena baine raka henigu kahi;
badina be daika na mai boga-aukana sibona baine raka henigu kahi.
Iehova na e herevamu.
22 Umui na lauegu bese ai baola,
bona lau na emui Dirava ai bainala.

23 A itaia, Iehova ena lai gubana!
Badu vada e lasi, koe-hirihiri ta,
kara dika tauna kwarana ai baine kau.
24 Iehova ena badu garagarana na basine doko,
ela bona ia ese ena lalo-hata ḡaudia iboudiai na
baine kara bona baine haguḡuru.
Ina ḡau do ba diba,
dina gabedia ai.
Copyright information for `MEU