Jeremiah 4

Iehova na e tomu:
Israel e, oi na boma lou,
lau dekegu ai ba lou mai.
Emu ḡau dika-rohorohodia na vairagu amo boma abi oho,
bona basioma daradara.
Momokani ai bona hahemaoro ḡoevaḡoeva ai bona kara maoromaoro ai boma gwau hamata,
boma toma “Iehova e maurimu heḡereḡerena”,
bena basileia idau-idau na sibodia bae hahenamo ia dainai,
bona ia bae imodaia.
Badina be Iehova ese Iuda taudia bona Ierusalem inoholaina taudia na ini e hamaorodia tomamu:

Emui vahu tanona ba ruaia,
au ginigini gabudia ai basio hadohado.
Iuda taumui bona Ierusalem inoholaina taumui e,
sibomui ba haheperitome Iehova enai,
peritome ai lalomui ba hahelaḡadia,
egu badu ḡaraḡara na lahi na heto baine lasi na garina,
bena baine ara, asi tauna ta ese baine habodoa,
emui kara vada e dika dainai.

Iuda bae daea

Iuda ai ba gwauraia, bona Ierusalem ai ba gwauraia hedinarai, baoto:

Tano heḡeḡemadai ai kibi ba hiriria;
ba boi lolo, baoto “A hegogo, baitala,
hanua mai maḡudia lalodiai”.
Pepe ba duduia isi Siona enai,
ba heau, mauri ba tahua, basio halahe.
badina be hahedika na mirigini kahana amo na mailaimu,
bona hahebua-tari badana danu.
Leona na uda hedoma-hedomana vada e rakatania,
basileia ihabua-taridia tauna vada e tore isi;
ena gabu amo vada e raka lasi,
emu tano ihavahuna totona;
emu hanua na bae heḡiḡi dobi,
asi inoholaidia bae mia.
Ina dainai puse dabuadia ba rio,
ba tai, ba tai lolololo;
badina be Iehova ena badu ḡaraḡara na
ita eda amo se heabi oho.
Iehova na e tomu, Una dina ai hanua pavapavana bona hanua lohiadia edia boga-auka baine ore; hahelaḡa taudia bae gari dikadika bona peroveta taudia bae hoa bada. 10 Bena lau nato, Ḡaubada Iehova e, oi na ina bese bona Ierusalem hanuana vada o koidia vaitani, ani, oto “Vada ba namo”; ḡau tamona, dare ese be aladiamu.

11 Una negana ai ta ese ina bese bona Ierusalem hanuana baine hamaorodia, baineto, Lai siahuna na tano ḡaḡaena ororodia nemuka-nemukadia amo e maimu, egu bese natuna hahinena e toa heniamu, dia itapona eiava ihaḡoevana totona. 12 A lai badana na daigu ai e maimu. Harihari lau ese hahemaoro ai na hereva henidiamu.

13 A itaia, ia na duba na heheto e tubu e maimu,
ena kariota na koe-hirihiri na heto;
ena hosi na haraḡa herea, idia ese ugava e hereadiamu;
madi ihabaida, vada ta dika vaitani.
14 Ierusalem e, lalomu ena dika ba huri oho,
ba mauri helaoreana;
emu lalo-hadai dikadia na lalomu ai bae mia
ela bona edena nega ai?
15 Badina be gado ta Dan amo e herevamu,
bona Efraim ororona amo hahedika e gvauraiamu.
16 Bese idau-idau ba sisiba henidia, ia na e maimu;
Ierusalem ba gwaurai henia, baoto:
Hanua idaena taudia na tano daudau amo e maimu,
Iuda hanuadia e hone henidiamu.
17 Tano igimana taudia na heheto e ginia heḡeḡe,
badina be ia ese vada e gwau edeede henigu.
Iehova na e herevamu.
18 Emu dala bona emu kara ese
ina kara na latamu ai vada e hadihoa.
Ina na oi irevamu, vada eme idita;
oi lalomu korikorina ai vada e vareai.
19 Lalogu e, lalogu e, hisihisi ese e gugubagumu!
Kudougu e!
Kudougu na e hetaha dikadikamu,
udugu basina hakapua diba;
badina be kibi reḡena na kamonaimu,
bona tuari honena danu.
20 Dika ta dika ta latanai e kaumu,
ela bona tano idoinai vada e vahu.
Asi vanahana egu kalaga e hegiḡi rohorohomu;
asi vanahana egu seseahu e heabi ohomu.
21 Pepe baina itaia ela bona edena nega ai?
kibi reḡena baina kamonai ela bona edena nega ai?
22 Badina be egu bese taudia na kakavakava,
idia na asi dibadia lau;
idia na lalo-duhu memerodia,
asi edia lalo-parara.
Kara dika ikaradia mai dibadia,
a kara namo ikaradia na asi dibadia.

23 Tanobada na itaia, vada e vahu bona asi anina;
guba na itaia, ia na asi diarina.
24 Ororo badadia na itadia, idia na e tabubu-tabubu,
bona ororo maraḡidia e heude-heude.
25 Na roha lao, tau ta asina itaia,
bona atai manudia iboudiai vada e roho boio.
26 Na roha lao, nomu tanona na itaia, vada e ḡaḡae,
bona hanuana iboudiai vada e heḡiḡi dobi,
Iehova vairanai, ena badu ḡaraḡara vairanai.
27 Badina be Iehova ini e gwau tomamu: Tano idoinai baine hahevahura; to basina havahuraia vaitani.

28 Ina dainai tanobada baine taitai,
bona atai ai guba baine dubaduba;
badina be lau vada na hereva bona lalogu vada na hadaia,
basina helalo kerehai bona lalogu basina haloua.
29 Hosi tauna bona peva tauna reḡedia dainai,
hanua iboudiai taunimanimadia na e heau maurimu;
uda hedoma-hedomadia ai e heau vareaimu, haga nadidia ai e dara daemu;
hanua iboudiai e heautanidiamu, lalodiai tau ta se nohomu.
30 Oi, vada e negemu daure hahinemu e,
emu lalo-hadai be dahaka bena dabua kakakakana o hahedokilaiamu;
bonagold heraheradia o heralaimu,
bona matamu na umu amo o habadamu?
Asi badina sibomu o hahairaimu;
e ura henimuva taudia ese e dadaraimumu,
idia ese emu mauri iabi-ohona dalana e tahuamu.
31 Badina be taitai ta na kamonai,
e hekamonaimu hahinena ena tai na heto,
natuna roboana e havaraiamu hahinena ese
hisi e animu na heto;
Siona natuna hahinena ena tai,
e laḡa dae laḡa daemu, bona imana e toi roromu,
e tomu “Lau madi ihabaigu,
roroma taudia vairadiai na mase reamu”.
Copyright information for `MEU