Jeremiah 49

Peroveta herevadia Amono taudia latadiai

Amono taudia herevadia. Iehova ini e gwau tomamu:

Israel na asi natuna maruanena a?
Ia na asi dihina a?
Matona, badina be dahaka Milkom
bona Milkom be Amono taudia edia dirava ladana.
ese Gad vada e lahea oho,
bona iena taunimanima ese hanuadia vada e noholaidia?
Taunabunai, Iehova na e tomu:
Negana be maimu,
lau ese haida baina hagoadadia, bena bae hone,
Raba, Amono taudia edia hanua, bae hare henia.
Ia na senu ḡaḡaena ai bainela,
bona ena hanua maraḡidia na lahi amo bae doudia;
bena Israel e lahea oho taudia na
Israel ese ma baine lahedia oho.
Iehova na e herevamu.
Hesebon e, ba tai, badina be Ai vada e havahua!
Raba hahinemui e, a tai!
Puse dabuadia ba rio,
ba herohe ahu, ba tai hekakasi.
Badina be Milkom na bae laohaia, tano idauna ai bae hanohoa,
mai ena hahelaḡa taudia bona ena lohia taudia ida.
Kara hebeatai kekenimu e!
Emu taḡa o abidadama henia, oto
“Daika na lau ihadikagu bainema?”
O, badina be dahaka emu koura o heaḡilaidiamu?
Ḡaubada Iehova Sabaota na e tomu:
A itaia, laḡaḡa na latamui ai baina hadihoa,
e ḡeḡemui dae taudia iboudiai edia amo;
bae lulumui lasi, ta ta ena dala ena dala ai bae heau,
bona ta ese heau taudia basine gogodia lou.
Iehova na e tomu: A gabeamo Amono taudia edia noho-namo baina havaraia lou.

Peroveta herevadia Edom latanai

Edom herevana. Iehova Sabaota ini e gwau tomamu:

Aonega vada e ore Teman ai a?
Lalo-parara taudia ediai hahealo vada e doko a?
Edia aonega vada e boio a?
Dedan inoholaina taumui e!
A heau, a lou, dobu gabudia ai ba noho.
Badina be Esau ena hisihisi na ia latanai baina hadihoa,
bona ena dika davana iabina negana danu.

Vine huahuadia ihaboudia taudia bema vasi,
idia ese vine abitanidia bema rakatani ani?
Henao taudia na hanuaboi ai bema mai,
idia ese edia ura ḡaudia mo bema abi ani?
10 A lau ese Esau ena vada na dadi ore,
ena komu gabudia vada na hulalai;
ia na asi ena komu dalana.
Ia natuna vada e aladia ore,
tadikakana bona dekena taudia danu;
ia na vada e ore.
11 Emu ihareha ba rakatanidia, lau ese baina hamauridia;
emu vabu ese lau bae abidadama henigu.

12 Badina be Iehova ini e gwau tomamu: Bema basiema inua taudia ese kehere bae inua, oi na dika davana basio abia a? Dika davana basio reaia, a vada ba inua. 13 Iehova na e tomu: Badina be sibogu ladagu ai vada na gwau hamata, Bosra na hahegari bona hegonaḡonalai bona hahevahu bona heuduguirai ḡauna ai bainela; bona ena hanua iboudiai na bae vahu hanaihanai.

14 Hari ta Iehova ena amo vada na kamonai,
bona gwaukau tauna ta vada e siaia lao,
bese idau-idau bogaragidiai, e tomu
“A hegogo, ia ihadikana totona baoma,
a tore isi, ba tuari”.
15 Badina be lau ese bese idau-idau bogaragidiai baina hamaraḡimu,
taunimanima ese bae dadaraimu.
16 Emu hahegari karadia ese vada e koimu,
bona lalomu ena heaḡi danu.
Haga nadidia kohuadia ai o nohomu taumu,
ororo dorina o gimaiamu taumu,
ena be emu noho gabuna na atai ai o karaiamu, ugava ena heḡereḡerena,
to unu amo baina verimu dobi.
Iehova na e herevamu.

17 Edom na hahegari ḡauna ai bainela; e rakaia hanaimu taudia iboudiai na bae gari bona bae si dagu, enai vada e kau dikadia iboudiai daidiai. 18 Iehova na e tomu: Sodoma bona Gomora bona edia hetabira hanuadia e heḡiḡi dobi heḡereḡerena ai, tau ta ese basine noholaia; tau ta na ia lalonai basine taruha. 19 A itaia, leona na Ioridane isena udana amo mamoe maḡuna aukana ihadikana totona e maimu heḡereḡerena ai, lau ese iena amo baina haheaudia karoho, bona egu abi-hidi tauna baina duanaia, ia ese baine biagua. Badina be daika na lau heḡereḡeregu? Daika ese baine boirigu? Mamoe ireḡudia tauna be daika lau vairagu ai baine gini diba? 20 Taunabunai, Iehova ese Edom ihadikana dalana vada e haerolaia herevana na ba kamonai, bona Teman inoholaina taudia ihadikadia dalana e uralaiamu danu. Mamoe-mamoe na seri bogaragina amo bae dabuidia oho; edia seri mamoedia na bae gari taku, ediai baine vara ḡauna dainai. 21 Edia moru reḡena dainai tanobada na baine heude-heude; edia tai reḡena na Davara Kakakakana isena ai bae kamonai. 22 A itaia, ta baine roho isi, baine roho haraḡa-haraga, ugava na heto; hanina baine toi roro, Bosra ihadikana totona; bena Edom ena tuari taudia lalodia na e hekamonaimu hahinena lalona heḡereḡerena ai baela.

Peroveta herevana Damasko latanai

23 Damasko herevana.
Hamat bona Arapada vada e baia;
badina be hari dikadia vada e kamonai.
Gari ese e gugubadiamu;
e hekwarahimu, davara na heto,
asi vea dibana davarana na heto.
24 Damasko vada e manoka-manoka,
e raka muri, baine heau eto,
lagaga ese e butua tao;
hisi-ani bona lalo-hisihisi ese vada e gugubaia,
e hekamonaimu hahinena na heto.
25 Hanua mai harina, hanua mai moalena, madi ihabaina!
Vada e rakatania.
26 Taunabunai, ena eregabe taudia na ena ariara ai bae hekida diho,
bona ena tuari taudia iboudiai na bae habuadia tari una dina ai.
Iehova Sabaota na e herevamu.
27 Damasko maḡuna ai lahi ta baina ha-araia,
ia ese Damasko maguna ai lahi ta baina ha-araia,
ia ese Ben-Hadad ena gabu aukadia baine aradia ore.

Peroveta herevana Kedara

bona Hasoro latadiai

28 Kedara bona Hasoro basileiadia, Nebukadresara, Babulono pavapavana, ese e hadareredia basileiadia, herevadia. Iehova ini e gwau tomamu:

A tore isi, Kedara ihadikana baola;
mairiveina kahana taudia ba habuadia tari.
29 Edia dabua kalagadia bona edia mamoe seridia bae heabi oho,
edia seseahu dabuadia bona edia kohu iboudiai danu;
edia kamelo na edia amo bae hakaudia oho,
bona taunimanima ese bae boi henidia, baeto
“Kaha iboudiai hahegari mo”.
30 Hasoro inoholaina taumui e!
A heau, dauha baola, dobu gabudia ai ba noho.
Iehova na e herevamu.
Badina be Nebukadresara, Babulono pavapavana, ese
oi ihadikamu dalana vada e haeroa,
oi ihadikamu karana vada e uralaia.

31 Iehova na e tomu: A tore isi!
E laḡa-animu besena, e noho namonamomu besena,
ihadikana totona baola;
ia na asi ena ikoukou, bona asi ena auri,
ia na sibona e noho edeamu.
32 Iehova na e tomu:
Edia kamelo na bae dadidia,
edia boromakau seridia bae abidia oho.
Bagudia huidia e abimu taudia na
baina hakarohodia, kaha iboudiai baela;
bona ihahisidia ḡaudia na
kaha iboudiai amo baina mailaidia.
33 Hasoro na uda sisiadia edia noho gabuna ai bainela,
baine vahu hanaihanai;
tau ta ese basine noholaia,
tau ta ia lalonai basine taruha.

Peroveta herevana Elam latanai

34 Iehova ena hereva peroveta tauna Ieremia enai e kau Elam dainai, Sedekia, Iuda pavapavana, e lohia matama negana ai.

35 Iehova Sabaota ini e gwau tomamu: A itaia, lau ese Elam ena peva, edia goada badina, baina hakwaidua; 36 bona lai haniosi, guba kahana haniosi amo, na Elam latanai baina mailaidia, bona baina hakarohodia roho- roho, unu lai kahadia iboudiai baela; bona Elam amo bae luludia lasi taudia na bese iboudiai bogaragidiai bae kau. 37 Iehova na e tomu, Lau ese Elam baina hagaria inaidia vairadiai, bona edia mauri iabi-ohona dalana e tahuamu taudia vairadiai danu; dika na idia latadiai baina hadihoa, bona egu badu ḡaraḡara danu. Dare baina siaia, baine ḡavadia, ela bona baina ha-oredia; 38 egu terono baina haginia Elam ai, bona edia pavapava bona edia lohia baina habuadia tari. Iehova na e herevamu.

39 Iehova na e tomu: A dina gabedia ai Elam ena noho-namo baina havaraia lou.

Copyright information for `MEU