Jeremiah 6

Ierusalem bona Iuda bae dika

Beniamina taumui e,
Ierusalem bogaragina amo a heau mauri!
Tekoa ai kibi ba hiriria,
Bete-hakerereme ai pepe ba duduia isi!
Badina be hahedika na mirigini kahana amo e hedinarai e maimu,
bona hahebua-tari badana danu.
Hane namo, aboni-noho hahinena, baine alaia,
Siona natuna hahinena baine alaia mase.
Mamoe ireḡudia taudia mai edia seri ida na ia ivaira-henina baema,
edia kalaga bae haginidia, bae ḡeḡea ahu,
edia mamoe bae ubudia, ta ta ena gabu ena gabu ai.
Tuari a haheḡaeḡaea, ia ihadikana;
a tore isi, dina tubua ai baita daea.
Madi ihabaida, ado e rahimu,
dina na e kerekeremu.
A tore isi, hanuaboi ai baita daea,
ena lohia rumadia baita habuadia tari.

Badina be Iehova Sabaota na ini e gwau tomamu:
Ena au ba hagaridia,
tano ba larebaia dae, Ierusalem hevaira-henina ai.
Ina hanua na matana bae hakania;
ia lalonai na hahehisi karadia mo.
Ranu gurina ese ranuna e hamatamataia na heto,
ia ese ena kara havara unu e hamatamata tomamu;
daḡedaḡe bona hahebua-tari karadia reḡedia na ia lalonai e hekamonaimu,
gorere bona bero na vairagu ai nega idoinai.
Ierusalem e, nahuamu a tohoa,
emu ai lalogu baine dika na garina,
baina havahumu bona tano deḡedeḡena-rahu ai baina halaomu na garina.

Iehova Sabaota na ini e gwau tomamu:
vine huahuadia kwabudia e buruki oremu na heto,
Israel kwabukwabudia ba burukidia ore;
vine huahuadia igogodia tauna na heto,
oi imamu ese rigina baine darahua lou.
10 Daidia baina hereva henidia bona baina sisiba henidia,
bae kamonai helaoreana?
A itadia, taiadia na hehekou,
idia na asi kamonai dibadia.
A itadia, Iehova ena hereva na e ḡonaḡonalaiamu,
asie moalelaiamu.
11 Taunabunai lau na Iehova ena badu ai na honumu,
ihalahelaina ai na hesikumu.
Taunabunai ariara ai memero kekeni latadiai ba bubua diho,
bona eregabe taudia edia hegogo latadiai danu;
tau mai adavana ida bae abidia hebou,
taunimanima badadia bona burukadia danu.
12 Edia ruma na haida bae henidia,
edia uma bona adavadia danu;
badina be lau ese imagu baina toia roro,
tano inoholaina taudia ihadikadia totona.
Iehova na e herevamu.

13 Maraḡina ela bona badana,
iboudiai ese mata-ḡaniḡani karadia e gugulaimu;
bona peroveta tauna ela bona hahelaḡa tauna,
iboudiai e kara koikoimu.
14 Egu orea taudia berodia vada e haḡoevadia lamai-lamai,
eto “Maino, maino”,
maino do lasi negana ai.
15 Kara dika-rohorohona e karaia negana ai,
idia na e hemarai a?
Idia na asie hemarai, lasi ona lasi vaitani;
hemarai mamina na asi dibadia.
Taunabunai, e ketomu taudia bogaragidiai bae keto;
matadia baina hakanidia negana ai idia na bae henege daure.
Iehova na e herevamu.

16 Iehova ini e gwau tomamu:
Dala badidiai ba gini, ba roharoha;
dala gunadia ba henanadailai;
bena lao dalana namona ba davaria, ia lalonai ba raka,
bona laumamui edia laḡa-ani ba davaria.
A idia eto “Ai na ia lalonai basia raka”.
17 Gima taudia na duanaidia, umui igimamui;
nato “Kibi reḡena ba hakala henia”.
A idia eto “Ai na basia hakala”.
18 Bese idau-idau e, a kamonai!
Hebou taumui e, ba diba dahaka na ediai baine vara.
19 Tanobada e, a kamonai! A itaia!
Lau ese dika na havaraiamu ina bese taudia latadiai,
idia sibodia edia lalo-hadai huahuadia;
badina be egu hereva na asie hakala henidia,
bona egu taravatu na vada e dadaraia.
20 Anina be dahaka egu muramura mai bonana na Sieba amo e mailaiamu,
eiava kane
“Kane” na Heberu taudia edia muramura mai bonana ta.
namona tano daudauna amo?
Emu ḡole-oho boubou ḡaudia na asina abidia daemu,
bona emu boubou karadia na asina moalelaidiamu.
21 Taunabunai, Iehova na ini e gwau tomamu:
A itaia, hetutuhi ḡaudia na ina bese taudia vairadiai baina atodia,
idia ihahetutuhidia.
Tama bona natudia na bae hetutuhi hebou;
ruma tauna mai turana ida bae mase hebou.

22 Iehova ini e gwau tomamu:
A itaia, bese ta na mirigini kahana amo e maimu;
basileia badana ta na e tore isimu,
tanobada kahadia daudau-hereadia ai.
23 Idia ese peva bona io na imadia ai e abimu,
idia na e daḡedaḡemu, bona asie hebogahisimu;
reḡedia na davara guruna na heto.
Siona natuna hahinemu e,
idia na hosi ai e guimu, e heḡaeḡaemu,
tau ta na tuari dainai e heḡaeḡaemu na heto,
oi ihadikamu totona.
24 Ita ese harina vada ta kamonai,
a imada na asi goadadia;
hisihisi bada-hereana ese e gugubadamu,
hahine ta ena hekamonai hisina na heto.
25 Basio raka lasi tano paka ai,
bona dala ai basio raka,
badina be inai tauna na mai darena ida e loamu,
bona gari bada ese e ḡeḡeda ahumu.
26 Egu bese natuna hahinemu e,
puse dabuadia ba rio,
kahu ai ba hekui-hekui;
ba taitai, natuna vara-edeana e taitailaiamu na heto,

herohe-ahu idita hereana;
badina be hahebua-tari tauna ese
baine hatakuda.

27 Lau ese hidi-hidi tauna bona hahetoho tauna ai vada na halaomu egu orea taudia bogaragidiai,
edia dala ba dibadia bona ba hididia totona.
28 Idia iboudiai na e gwau ede-ede dikadikamu,
hahebade koikoi herevadia e loalaidiamu;
idia na auri bona auri labora-labora,
iboudiai na e kara koikoimu.
29 Lahi ihiririlaina ḡauna ese lahi e hahururuamu,
e vevemu aurina na lahi ai e veve ohomu;
haheḡoeva ḡaukarana e karaiamu na asi anina,
badina be kara dika taudia na asie heabi ohomu.
30 Silver momorudia bae gwauraidia,
badina be Iehova ese vada e dadaraidia.
Copyright information for `MEU