Jeremiah 9

Kwaragu anina bema ranu mo,
bena matagu amo iruru-mata bema aru;
bena bama tai boi tai rani,
egu bese kekenina ena mase taudia taidia bama tai.
Bema mai egu taruha ta tano ḡaḡaena ai,
bena egu bese taudia bama rakatanidia,
edia amo bama raka oho!
Badina be idia iboudiai na heuda-hanai taudia,
kara dibaka oreana;
maladia e marediamu peva na heto,
koikoi karadia vada e goada tano lalonai,
dia kara momokanidia;
badina be dika ta amo e laomu ela bona ma dika ta,
bona asi dibadia lau.
Iehova na e herevamu.

Ta ta ese dekena tauna dekena tauna nahuadia bae toho,
bona tadikakana ta basie abidadama henia;
badina be tadikakamui iboudiai ese bae laimui oho,
bona dekemui taudia iboudiai na e loa eva-evamu,
hesivarai totona.
Ta ta ese dekena tauna dekena tauna e koidiamu,
bona asi tauna ta ese hereva momokanina e gwauraiamu;
maladia vada e hadibadia, bae hereva koikoi,
kara havara e karamu, bona helalo-kerehai ai e hebala reamu.
Hahehisi na hahehisi latanai e senuamu,
bona koikoi na koikoi latanai;
asie uramu bae dibagu.
Iehova na e herevamu.

Taunabunai Iehova Sabaota na ini e gwau tomamu:
A itaia, baina haḡoevadia bona baina tohodia,
badina be ede ma bama kara toma,
egu bese taudia daidiai?
Idia maladia na hahemase hakorena,
e hereva koikoimu;
ta ta uduna uduna amo maino e herevalaiamu, dekedia taudia ediai,
a lalodiai ibani-henidia dalana e tahuamu.
Iehova na e tomu,
Matadia basina hakanidia ini kara daidiai,
bona bese inihetomana davana basina henia, a?

10 Ororo ba tailaidia, ba tai lolololo,
tano ḡaḡaena ena rei gabudia daidiai ba rohe ahu;
badina be vada e havahudia, ta ese se rakadia hanaimu,
bona boromakau ḡoudia asie hekamonaimu;
atai manudia bona boroma idau-idau vada e heau boio.
11 Ierusalem baina ḡiḡia dobi,
uda sisiadia edia kohua ai baina halaoa;
Iuda hanuadia baina habuadia tari,
asi inoholaina gabuna ai bainela.

Hahebua-tari na e maimu

12 Daika ena aonega na bada, bena ina na dibana? Iehova uduna ese daika vada e hereva henia, bena ia ese baine gwauraia? Badina be dahaka tano vada e hebua tari bona vada e vahu, tano ḡaḡaena na heto, bena tau ta ese se rakaia hanaimu? 13 Iehova na e tomu, Badina be egu taravatu, vairadiai na atoa ḡauna, vada e rakatania, bona lau gadogu asie kamonai bona asie rakalaia; 14 a sibodia edia lalo-hadai vada e ḡavadia mai lalo-aukadia ida, bona Baal muridiai vada ela, tamadia ese e hadibadia heḡereḡerena. 15 Taunabunai, Iehova Sabaota, Israel Diravana, na ini e gwau tomamu: A itaia, ina bese taudia na ava iditana amo baina ubudia, bona e imoraia ranuna baina henidia, bae inua. 16 Baina hakarohodia rohoroho, bese idau-idau, idia bona tamadia danu asi dibadia besedia, bogaragidiai; bona dare na idia muridiai baina siaia ela bona baina ha-oredia.

17 Iehova Sabaota na ini e gwau tomamu:
A haeroa, tai-hevale hahinedia a boiridia;
ima-idibaka hahinedia a boiridia baema.
18 Idia na bae kara haraḡa, bae tailaidia,
bena iruru-matada bae diho;
matada kopidia amo ranu baine aru diho.
19 Badina be taitai reḡena na Siona amo e maimu, e tomu,
Madi, vada ta dika vaitani,
vada ta hemarai vaitani;
badina be eda tano vada ta rakatania,
badina be eda ruma vada e gigidia dobi.

20 Hahine e! Iehova ena hereva ba kamonai,
ia uduna herevana na taiamui ai baine vareai;
natumui kekenidia na rohe-ahu ba hadibadia,
bona dekemui hahinedia na tai hahane ba hadibalaidia.
21 Badina be mase na eda ruma gaba-maurudia ai vada e dae vareai,
eda lohia rumadia ai vada e dae kau;
memero bona kekeni na ruma ariaradia ai vada e hamasedia,
bona eregabe taudia danu hanua ariaradia ai.
22 A hereva, baoto,
Iehova na ini e gwau tomamu:
Mase taudia na bae heḡiḡi dobi,
boromakau tagena tano paka ai na heto,
eiava uit ikumidia uit iutuna tauna murinai na heto,
ta ese basine haboudia.

Dirava i'imodaina

23 Iehova na ini e gwau tomamu: Aonega tauna ese ena aonega basine heaḡilaia; goada tauna ese ena goada basine heaḡilaia; taḡa tauna ese ena taḡa basine heaḡilaia. 24 A heaḡi e wamu tauna ese ina na baine heaḡilaia: ia dibana lau bona egu ai lalona e pararamu; dibana lau na Iehova, hebogahisi karadia bona hahemaoro ḡoevaḡoeva bona kara maoromaorodia na karamu tanobada ai; badina be unu ḡau na moalelaidiamu. Iehova na e herevamu.

25 Iehova na e tomu. A itaia, negana vada e maimu, vada e heperitome to asi anina peritomena taudia iboudiai na lau ese davadia baina henidia, 26 Aigupto, Iuda, Edom, Amono besena, Moab, bona tano ḡaḡaena ai e nohomu bona bagudia huidia e merameramu taudia iboudiai. Badina be ini bese iboudiai na asie peritomedia, bona Israel taudia danu peritome ai lalodia asie hahelaḡadia.

Copyright information for `MEU