Job 2

Ma dina ta ai, Dirava natuna verina na Iehova vairanai ma e hedinarai lou, bona Satana ma ema, idia bogaragidiai, Iehova vairanai baine hedinarai totona. Bena Iehova ese Satana e nanadaia, eto, Oi na ede amo oma? Satana ese Iehova e haere henia, eto, Tanobada ai na loa eva-evamu, na raka laomu na raka maimu. Iehova ese Satana ma e nanadaia, eto, Egu hesiai tauna Iobu vada o haeroa a? Tanobada ai ia na asi idaina; ia na asi ena kerere ta, bona kara maoromaoro tauna; Dirava garina e garimu bona kara dika amo e raka ohomu, ani? Ena be oi ese lalogu o ania, asi badina baina hadikaia bona baina habuaia tari, to ia na doini ena lalo-maoromaoro ai e haheaukamu. Bena Satana ese Iehova ma e haere henia, eto, Kopi davana na kopi. Tau ta ese ena orea bona ena kohu iboudiai baine heni, ena mauri ibodohilaina. A harihari imamu a toia roro, ia turiana bona hidiona ba daua toho, bena ia ese oi vairamu ai baine uduguiraimu. Bena Iehova ese Satana e hamaoroa, eto, A itaia, ia na oi imamu ai, ḡau tamona basio hamasea.

Taunabunai, Satana na Iehova vairana amo e raka lasi; bena ia ese Iobu na toto dika-hereadia amo e hahisia, aena lalona amo ela bona kwarana tubuana. Bena Iobu ese ataga e abia, sibona e henau, bona kahu ai e helai. Bena adavana ese e hereva henia, eto, Doini emu lalo-maoromaoro ai o haheaukamu a? Dirava ba uduguiraia, bena ba mase. 10 A ia ese e haere henia, eto, Oi na kavakava hahinedia edia hereva heḡereḡeredia ai o herevamu. Be, namo mo Dirava imana amo baita abi bona dika basita abi a? Ina idoinai lalonai Iobu na uduna bibinadia amo se kerere.

Iobu turana tatoiosi

11 Iobu turana tatoiosi na una dika idoinai ia latanai vada e kau harina e kamonai, bena ta ta ena hanua ena hanua amo ema: Elifasa, tau Teman; Bildad, tau Suhi; bona Sofara tau Naamata. Idia na e henega guna, baela, tauna bae haloa bona lalona bae hagoadaia totona. 12 Dauha amo e itaia negana ai, toana asie diba, bena e tai lolololo; bena edia dabua e dare, bona ḡahu na e peta peta isi atai ai, bena ḡahu na e moru idia kwaradia ai. 13 Bena tano ai e helai diho ia badibadinai, dina hitu hanuaboi hitu lalodiai hereva ta asie gwaurai henia; badina be e itaia, ena hisihisi na bada herea.

Copyright information for `MEU