Job 22

Elifasa ena hereva ihatoina

Bena Elifasa, tau Teman, na e haere, eto:

Tau ta ese ḡau ta Dirava baine henia diba a?
Aonega tauna ese sibona ena ḡau e gogomu.
Siahu-idoinai Diravana na baine moale, emu kara maoromaoro dainai a?
Eiava iena namo baine bada, emu dala idoinai asi kererena ta dainai a?
Ia garina o garimu dainai ia ese e sisiba henimumu
bona e hahemaoro henimumu a?
Emu kara dika na daka bada!
Emu kara havara na asi dokodia!
Badina be gwauhamata toadia na tadikakamui edia amo o abi hai,
bona ḡaḡaedia taudia na edia dabua ma o abi oho.
Tau-boera taudia adia inuinu ranuna so henidia,
bona aniani na hitolo taudia edia amo vada o rua.
Mai siahuna tauna ese tano e ḡaunaia;
bona e lalo namo henia tauna ese e noholaia.
Vabu na una kavakavadia ai vada o siaidia oho,
bona ihareha imadia vada o taodia patapata.
10 Taunabunai, idoa ese vada e ḡeḡemu ahu,
bona gari-taku ḡaudia ese e habubunimu.
11 Emu diari vada e dibura, ḡau ta so itaiamu;
abata ese e habubunimu.

12 Dirava na dia guba doriva-dorivana ai a?
Atai hisiudia a itadia, idia na atai herea.
13 Taunabunai oi na o tomu: Dirava be dahaka dibana?
Dibura masemase ai ḡau toadia baine diba a?
14 Dagadaga ese e koua hegegemu,
una dainai ḡau ta se itaiamu;
ia na guba dorina ai e rakamu.
15 Dala gunana, kara dika taudia ese vada e rakalaia dalana, na
do ba badinaia a?
16 Edia nega do se ore ai e dadidia oho;
badidia na e ha-arudia oho.
17 Idia ese Dirava e hereva henia, eto “A rakatanimai”,
bona “Siahu-idoinai Diravana na dahaka baine karaia diba emai ai?”
18 Ḡau tamona, ia ese edia ruma na ḡau namodia amo e hahonudia.
A kara dika taudia edia hahealo na lauegu amo dauha verevai.
19 Kara maoromaoro taudia ese e itaiamu, bena e moalemu;
asi edia kerere taudia ese e ḡonaḡonalaidiamu;
20 e tomu: Momokani, inaida vada eme darere,
bona e rakatani ḡaudia na lahi ese vada e ha-oredia.

21 Dirava ida ba helalo tamona, bena maino ai ba noho,
bona namo na emu ai baine kau.
22 Hahediba herevadia ia uduna amo na bavabi dae,
bona ena hereva na lalomu ai ba haboudia.
23 Bema Siahu-idoinai Diravana ba lou henia, bona sibomu ba hahemanau,
bema kara dika na emu kalaga amo ba negea daure,
24 bemagold na ḡahu ai bavatoa,
bona Ofirigold -na na koupa nadidia bogaragidiai ba negea,
25 bema Siahu-idoinai Diravana na emugold ai
bona emusilver namo-hereana ai ba halaoa;
26 bena, Siahu-idoinai Diravana na ba moalelaia,
bona Dirava na ba roha dae henia.
27 Ia ba ḡuria, bena ia ese emu ḡuriḡuri baine kamonai;
bona emu gwauhamata karadia ba kara.
28 Kara ta ba haeroa, ede ba karaia toma;
bena unu baine hekara toma emu ai,
bona diari na emu dala ai baine tara.
29 Badina be Dirava ese hekokoroku tauna na e atoa tarimu,
a manau tauna na e hamauriamu.
30 Asi ena kerere tauna na e harohoa maurimu;
oi na imamu ḡoevaḡoevadia daidiai do ba roho mauri.
Copyright information for `MEU