Job 40

Iehova ese Iobu ma e hereva henia, eto:

Maumau tauna ese Siahu-idoinai Diravana na baine lodu henia a?
Dirava ida e hepapahuahumu tauna na baine haere.

Iobu ese Iehova e haere henia

Bena Iobu ese Iehova e haere henia, eto:

A itaia, lau na ḡau pipikina;
ede baina haere henimu toma?
Udugu na imagu amo baina koua.
Nega ta vada na hereva, harihari lau basina haere;
nega rua vada na hereva, egu hereva ma basina hadaudaua.

Iehova ese Iobu ma e hereva henia

Bena Iehova ese Iobu na koe-hirihiri lalona amo ma e hereva henia lou, eto:

Emu rami ba hekasilaia, tau karakara na heto;
baina nanadaimu, bena ba haere henigu.
Lau ba hahekwakwanaigu a?
Lau kereregu ba gwaurai, oi sibomu maoromu ba gwaurai totona a?
Oi imamu na Dirava imana heḡereḡerena,
bona gadomu ba habadaia diba ia gadona heḡereḡerena, a?

10 Siahu bona sibo-hemataurai oromadia ba heralai;
hairai bona ninina-namo ba hahedokilai.
11 Emu badu aine hepurai dobi;
hekokoroku taudia iboudiai ba itadia, bena ba hahemaraidia.
12 Hekokoroku taudia iboudiai ba itadia, bena ba doridia dobi;
kara dika taudia na edia gini gabudia ai ba moidia tao.
13 Iboudiai na ḡahu ai ba tahunidia hebou;
gabu hehunina ai vairadia ba ḡovadia ahu.
14 Bena lau ese danu baina imodaimu, bainato,
Oi imamu idibana sibona ese baine hakwalimumu.

15 Behemoto
“Behemoto” na sinavai ai e nohomu ḡauna ta, ita-itana na boroma bada-hereana na heto. Ladana English gado ai na “hippopotamus”.
ba itaia;
lau ese ia na karaia, oi na karamu heḡereḡerena;
ia na rei e animu, boromakau na heto.
16 A itaia, ena goada na koekoena ai,
bona ena siahu na bogana hidiona ai.
17 luna na e ha-aukaiamu, sida auna na heto;
mamuna varovarodia na e hebani boumu.
18 Ia turiana na auri labora-labora
bona reḡena na auri na heheto.

19 Dirava ese e kara ḡaudia hereana na ia;
e karaia Diravana na ena dare baine mailaia.
20 Badina be ororo ese ana e heniamu,
uda boromadia iboudiai e gadaramu gabuna ai.
21 Telimi
“Telimi” na au ta ladana, Heberu gado ai.
audia henudiai e hekuremu;
siriho lalodiai, bona gohu ai.
22 Telimi audia ese e hakerukeruamu,
bona sinavai isena audia ese e koua heḡeḡemu.
23 A itaia, abata e lasimu negadia ai ia na se garimu;
ena be Ioridane sinavaina ese ia uduna e toiamu, to asi ena gari.
24 Kimai amo ba veria diba,
eiava udu-baubauna ba idoaia, a?
Copyright information for `MEU