John 1

Matamana negana ai Hereva vada e nohova; una Hereva na Dirava ida e nohova; una Hereva na Dirava. Ia na matamana negana ai Dirava ida e nohova. Ḡau iboudiai iena amo e vara: e vara ḡaudia ta ia murinai se vara, lasi vaitani. Mauri be ia lalonai: una mauri na taunimanima edia diari. Diari be dibura lalonai e hedinaraimu; bona dibura ese se habodoamu.

Tau ta e vara, Dirava ese e siaia, ladana be Ioane. Ia na hereva momokani igwauraina bona diari ihahedinaraina totona ema, taunimanima iboudiai ia dainai bae kamonai.

Ia na dia una diari; to diari iharorolaina totona ema. Diari korikori, taunimanima iboudiai ihadiarilaidia diarina, una negana ai tanobada e mai heniava.

10 Ia na tanobada ai e nohova, tanobada danu iena amo e vara; to tanobada na asi dibana ia. 11 Iena tanobada ema; to iena taunimanima ese asie abia dae. 12 A haida ese e abia dae bona ia ladana e abiabiraia, bena ia ese siahu vada e henidia, Dirava natuna ai baela. 13 Idia na dia tau-anina ena ura amo asie vara, dia tau ta ena ura amo asie vara, a Dirava ena ura amo e vara.

14 Hereva na taunimanima tau-anina ai ema, ai bogaragimai e taruhava. Ia hairaina danu a itaiava, natuna vara-edeana tamana ese e henia, hariharibada bona hereva momokani ai e honu honu dae.

15 Ia herevana Ioane ese e gwauraia, e lolo, eto, Lau vada na herevalaia tauna binai, nato “Lau murigu ai be maimu tauna ese baine gunalaigu, badina be ia na vada e nohova, a lau be do asina vara”.

16 Ena honuhonu-dae amo ita iboudai tame abi, harihari ma hariharibada. 17 Badina be Mose ese taravatu e henida; a harihari-bada bona hereva momokani na Iesu Keriso ese vada e mailai. 18 Matamana negana ema bona harihari tau ta ese Dirava se itaia; Natuna vara-edeana, Tamana kemena ai e nohomu, ia ese vada e gwauraia hedinarai.

Ioane Bapatiso

19 Ioane ena hereva binai. Iuda taudia ese hahelaḡa taudia bona Levi oreana taudia haida Ierusalem amo e siaidia, bae nanadaia, baeto “Oi na daika?” 20 Bena ia na e gwau hedinarai, se heḡore, eto, Lau na dia Keriso. 21 Ma e nanadaia, eto, Benaini, oi Elia a? Ia eto, Lau na dia ia. Ma eto, Oi na peroveta tauna a? Ia e haere, eto, Lasi.

22 Bena idia ese e nanadaia lou, eto, Oi be daika? Emu haere na e siaimai taudia baia hamaorolaidia lao. Sibomu harimu be ede o piua tomamu? 23 Bena ia sibona e hehari piu, eto, Lau na

Gado ta tano ḡaḡaena ai e boi lolomu, e tomamu,
Lohiabada ena dala ba lailaia;
Isaia, peroveta tauna, ese vada e gwauraia guna.

24 Hari e siaidia taudia na Farisea taudia. 25 Bena idia ese ma e nanadaia lou, eto, O matona, oi ese taunimanima o bapatisodiamu, a oi be dia Keriso, dia Elia, dia peroveta tauna o tomamu? 26 Ioane e haere, eto, Lau na ranu amo na hahebapatisomu; a umui bogaragimui ai asi dibamui tauna ta vada e ginimu: 27 ia na lau murigu ai be maimu, bona lau na dia namo ena tamaka varona baina ruhaia.

28 Ini ḡau na Betania, Ioridane unukahana ai, e vara. Ioane na unuseni ai e hahebapatisova.

Ioane ese Iesu e duanaia

29 Daba ai ia ese Iesu e itaia, ia dekena e maiva, bena eto, Dirava ena Mamoe Natuna a itaia; ia na tanobada ena dika iabi-ohona tauna. 30 Vanegai na gwauraiava tauna binai. Lau nato “Lau murigu ai be maimu tauna ese baine gunalaigu, badina be ia na e guna, lau na gabe amo”. 31 Lau na asi dibagu ia; to Israel ai baine hedinarai helaoreana lau nama, ranu ai na hahebapatisomu.

32 Ioane ma e hereva hedinarai, eto, Lauma vada na itaia guba amo e diho, pune na heto, ia tubuana ai e kau. 33 Lau na asi dibagu ia; to e siaigu ranu amo baina hahebapatiso Diravana ese e hamaorogu, eto “Tauna na oi ese ba itaia, Lauma baine diho tubuana ai baine kau tauna, ia na Lauma Helaḡa amo baine hahebapatiso”. 34 Lau ese vada na itaia, bona vada na gwauraia hedinaraimu: ia na Dirava Natuna.

Ioane ena hahediba Iesu murinai e rako

35 Daba ai Ioane mai ena hahediba rarua ida ginidia ai 36 Iesu e raka hanaiva ai e itaia; bena Ioane eto, Dirava ena Mamoe Natuna a itaia. 37 Hahediba raruosi iena hereva e kamonai, bena idia ese Iesu e ḡavaia. 38 Iesu e gini kerehai, e gavaia taudia raruosi e itadia, bena e nanadaidia, eto, Dahaka o tahuamu? Idia e haere, eto, Rabi e, oi be edeseni ai o nohomu? (“Rabi” anina be “hahediba tauna”). 39 Ia eto, Aoma, ba itaia. Bena idia ela, ena noho gabuna eha itaia, bena una dina ai ia dekenai e noho. Negana be adorahi kahanai.

40 Ioane ena hereva e kamonai bena Iesu e ḡavaia tauna ta be Andrea; ia na Simona Petro tadina. 41 Ia ese kakana korikori Simona maoromaoro e ha davaria, bena e hamaoroa, eto, Ai na Mesia vada ame davaria. (“Mesia” anina be “Keriso”). 42 Bena Iesu dekena e hakaua lao. Iesu ese e raraia, bena eto, Oi na Simona, Iona natuna: Kefa na ba nemaia. (“Keta” bona “Petro” anidia tamona, “Papapapa”).

Filipo bona Natanael Iesu murinai e raka

43 Daba ai, Iesu e ura Galilea bainela eto, bena Filipo e davaria, e hereva henia, eto, Murigu ai a raka. 44 Filipo na Betesaida tauna, Andrea bona Petro edia hanuua tauna. 45 Filipo ese Natanael e ha davaria, bena e hamaoroa,eto, Mose ena taravatu ai bona peroveta taudia edia buka ai harina e piuava tauna vada ame davaria: ia na Iesu, Nasaret tauna, Iosef natuna. 46 Natanael eto, Nasaret amo ḡau namona ta bainema a? Filipo eto, Aoma, a itaia.

47 Iesu ese Natanael e itaia, ia na ia dekena ema, bena e herevalaia, eto, Israel tauna korikorina ta a itaia; ia na asi ena koikoi. 48 Natanael ese e hereva henia, eto, Ede o dibagu toma? Iesu ese e haere henia, eto, Filipo ese do se boirimu, suke auna henunai o nohova ai, na itamu. 49 Natanael e haere, eto, Rabi e, oi na Dirava Natuna, oi na Israel Pavapavana. 50 Iesu ma e hereva henia, eto, Na hamaoromu nato “Suke auna henunai na itamu” dainai o abiabiraigumu a? Ini ḡau e hereamu ḡaudia do ba ita. 51 Ma e hamaoroa, eto, Momokani vaitani na hamaoromuimu, guba do ba itaia, baine parara, bona Dirava ena aneru ba itadia, bae dae, bae diho, Taunimanima Natuna latanai.

Copyright information for `MEU