John 10

Mamoe ireḡudia tauna namona

Momokani vaitani na hamaoromuimu, mamoe maḡuna ikoukouna amo se raka vareaimu, a maḡu gabana amo e daga hanaimu tauna na henao bona dadidadi tauna. A ikoukou amo e raka vareaimu tauna na mamoe ireḡudia tauna. Ikoukou igimana tauna ese ikoukou e kehoamu una tau ena; bena mamoe ese ia gadona e kamonaimu. Ia ese ena mamoe korikori ladadia e hatomu, bena e hakaudia lasimu. Ena mamoe korikori iboudiai e hakaudia lasimu, vairadiai e rakamu; bena ia gadona dibadia dainai idia ia murina amo e rakamu. A idau tauna murinai basie raka, lasi vaitani; bae heautania; badina be idau taudia gadodia na asi dibadia. Ina hereva heḡereḡerena na Iesu ese e herevalai henidia, to lalodia na asie parara.

Iesu ese ma e hereva henidia lou, eto, Momokani vaitani na hamaoromuimu, lau na mamoe ikoukouna. Ema guna taudia iboudiai na henao bona dadidadi taudia, bena mamoe ese eredia asie kamonaiva. Lau binai ikoukou. Lauegu amo baine raka vareai tauna na do baine mauri; ia na baine raka vareai, baine raka lasi, aniani baine davaria. 10 Henao tauna na henao, ala-ala, hahebua-tari totodia e maimu. Lau vada nama mauri bae abia, bae abia badabada, helaoreana.

11 Lau na mamoe ireḡudia tauna namona. Mamoe ireḡudia tauna namona ese ena mauri e atoa dihomu mamoe daidiai. 12 Hesiai tauna mai davana na dia mamoe ireḡudia tauna, bona dia mamoe biagudia: uda sisiana e maimu negana ai, ia ese e itaiamu bena ena mamoe e heautanidiamu, bena uda sisiana ese e dabaidia taomu bona e hakarohodiamu. 13 E heaumu badina be ia na hesiai tauna mai davana, mamoe se lalodiamu. 14 Lau na mamoe ireḡudia tauna namona. Egu mamoe vada dibagu; egu mamoe danu dibadia lau; 15 Tamagu dibana lau bona lau dibagu ia heḡereḡerena. Egu mauri danu na atoa dihomu, mamoe daidiai.

16 Lau na mai egu mamoe idaudia haida danu; idia na do dia ina maḡu lalonai. Idia danu do baina hakaudia mai, bena gadogu bae kamonai; bena seri baine tamona, ireḡudia tauna danu baine tamona.

17 Ina dainai Tamagu ese e lalokau henigumu, badina be egu mauri na atoa dihomu, baina abia lou helaoreana. 18 Ta ese egu mauri se abia ohomu; lau sibogu na atoa dihomu. Lau na mai siahugu baina atoa diho, bona mai siahugu baina abia lou. Haheḡani na binai Tamagu ena amo na abia.

19 Unu hereva daidiai Iuda taudia ma e haheparara lou. 20 Hutuma eto, Ia na lauma dikana ese e boloamu, e kavaiamu. Dahaka dainai o hakala heniamu? 21 Ma haida eto, Unu hereva na dia lauma dikana ese e boloamu tauna ena hereva. Lauma dikana ese mata-kepulu taudia matadia ihapapadia mai dibana a?

Dubu Ihahelaḡana Ariana

22 Dubu Ihahelaḡana Ariana negana vada e kau Ierusalem ai. Keru negana bunai. 23 Iesu na Dubu Helaḡa ai e raka, Solomon ena dehe ai; 24 bena Iuda taudia ese e ginia hegeḡe, e nanadaia, eto, Ba hadaradaramai ela bona edena nega ai? Oi na Keriso eiava lasi? A hamaoromai momokani.

25 Iesu ese e haere henidia, eto, Vada na hamaoromui, to asio kamonaimu. Tamagu ladana ai na karamu karadia ese e hahedinaraigumu; 26 to umui ese asio abiabiraigumu, badina be umui na dia lauegu mamoe. 27 Egu mamoe ese lau gadogu e kamonaimu; lau ese vada na dibadia, bona idia ese lau murigu ai e rakamu. 28 Mauri hanaihanai danu na henidiamu; idia na basie mase, lasi ona lasi vaitani; bona tau ta lau imagu amo basine dadidia. 29 Tamagu ese e henigu ḡauna ese ḡau iboudiai e hereadiamu; tau ta danu asi goadana ḡau ta Tamagu imana amo baine dadihaia. 30 Lau bona Tamagu na tamona.

31 Bena Iuda taudia ese nadi ma e abi isi, bae hodoa eto. 32 Iesu eto, Kara namo diaḡau na Tamada ena amo vada na hahedinarai henimui; edena kara dainai ba hodogu? 33 Iuda taudia eto, Kara namona ta dainai basia hodomu, a Dirava ihadikana dainai, badina be oi na taunimanima mo, sibomu Dirava ai o hahelaomu. 34 Iesu eto, Emui taravatu ai ini se torea toma, a: Lau nato, umui na dirava? 35 O Dirava ena hereva ediai e kau taudia na dirava e gwauraidia, (Buka Helaḡa na asi itata-utuna, ani), 36 edeheto Dirava ese e hahelaḡaia bona tanobada ai e siaia tauna na o gwau heniamu, o tomamu “Oi ese Dirava o hadikaiamu”, badina be lau nato “Lau na Dirava Natuna”, a? 37 Tamagu ena kara basinama kara, umui ese basioma abiabiraigu. 38 A baina kara negana ai na, ena be lau basio abiabiraigu, to egu kara bavabiabirai, bena lalomui bae parara bona ba diba Tamagu na lalogu ai, lau danu Tamagu lalonai.

39 Bena idia ese ma e dabaia tao toho lou, to idia imadia amo e hevai dae e raka oho. 40 Bena Ioridane unukahana e lou ela, gunaguna Ioane e hahebapatisova gabuna ai eha noho. 41 Hutuma na ia dekena ela; eto, Ioane ese toa ta se karaia, to ina tau herevana idoinai e gwaurai vada eme momokani. 42 Bena hutuma ese unuseni ai vada e abiabiraia.

Copyright information for `MEU