John 16

Ini hereva na gwaurai henimuimu, ba hekwakwanai na garina. Dubu amo bae dorimui lasi; oibe, negana vada be maimu, baine alamui mase tauna na lalona ai baineto ia na Dirava isiaina e lao heniamu. Unu bae kara toma badina be Tamagu na asi dibadia, bona asi dibadia lau. Ini hereva name gwaurai henimui badina be anidia bae vara negadia ai ba helalo une, lau ese vada na hamaoromui. Nega gunadia ai ini ḡau asina hamaorolaimui, badina be una negana ai lau na umui ida ta nohova. Harihari vada ba laomu, e siaigu Diravana dekena; a umui ta ese asio nanadaigu, asioto “Ede baola?” A ini hereva vada na gwaurai henimui dainai daramui vada e dokomu.

Hereva momokani na gwaurai henimuimu: ihanamomui totona baina rakatanimui; badina be basinama rakatanimui, Hekaha Tauna na dekemui basinema mai; a bainala, bena baina siaia dekemui ai. Tanobada taudia ese kara dika bona kara maoromaoro bona Dirava ena hahemaoro e lalodia kereremu. Hekaha Tauna bainema negana ai, ia ese edia lalo-hadai kereredia baine hahedinarai henidia. Kara dika e lalo hadailaia kereremu, badina be asie abiabiraigu. 10 Kara maoromaoro e lalo hadailaia kereremu, badina be Tamagu dekena ba laomu, bena basie itagu lou. 11 Hahemaoro e lalo hadailaia kereremu, badina be ina tanobada lohiana na vada e hahemaoro henia vaitani.

12 Egu hereva diaḡau mimia, bama herevalai henimui, to umui na ina harihari basioma abi dae diba. 13 A Hereva Momokani Laumana do bainema, bena ia ese hereva momokani idoidiai lalodiai baine hakaumui; badina be ia sibona ena lalohadai basine gwaurai, a baine kamonai herevadia iboudiai baine gwaurai; gabeai bae vara ḡaudia danu baine hamaorolaimui guna. 14 Ia ese lau baine heatolaigu, badina be lauegu amo baine abi ḡaudia baine hamaorolaimui. 15 Tamagu ena ḡau idoidiai na lauegu: una dainai na tomamu, ia ese lauegu amo baine abi ḡaudia na baine hamaorolaimui. 16 Asi vanahana na basio itagu; ma asi vanahana ma ba itagu.

17 Ena hahediba haida sibodia e henanadai heheni, eto, Ina na dahaka ia ese e hamaorodamu, e tomamu, “Asi vanahana na basio itagu, ma asi vanahana ma ba itagu” bona “Badina be Tamagu dekena bainala”? 18 Ma e henanadai heheni loulou, eto, Ina “asi vanahana” e gwauraiamu anina be dahaka? Ena hereva na laloda seme parara.

19 Iesu dibana idia na ia inanadaina urana e urava, bena eto, Egu hereva anina o henanadailai hehenimu, nato “Asi vanahana basio itagu, ma asi vanahana ma ba itagu”, a? 20 Momokani vaitani na hamaoromuimu, umui na do ba tai, ba tai hetutu, to tanobada na do baine moale. Umui na daramui bae doko, to emui dara-doko na moale ai bainela. 21 Hahine ta be hekamonai ai darana e dokomu, badina be ena nega vada eme gini dae; a natuna e abiamu, bena ena hisihisi na se laloamu, taunimanima matamatana ta tanobada ai vada e vara moalena dainai. 22 Umui danu, ina harihari daramui vada eme doko; a lau ese do baina itamui lou, bena lalomui na bae moale, tau ta ese emui moale basine abia oho diba. 23 Una dina ai ḡau ta egu ai basio gwauraia. Momokani vaitani na hamaoromuimu, ḡau ta ba noia, Tamada na lau ladagu ai do baine henimui. 24 Ema bona harihari ḡau ta lau ladagu ai do asio noia. Ba noinoi, vada bavabi; bena emui moale baine ḡuḡuru.

25 Ini na hereva heḡereḡeredia ai vada na herevalai henimui, to negana vada e maimu, hereva heḡereḡeredia ai basina herevalai henimui lou, a hereva hedinaraidia ai Tamada sivaraina baina hamaorolaimui. 26 Una dina ai lau ladagu ai do ba noinoi. Lau asina tomamu Tamada baina noia umui daimui ai; 27 badina be Tamada ese e ura henimuimu, umui ese lau o ura henigumu dainai, bona o abia daemu lau na Tamada ena amo nama dainai. 28 Lau na Tamada ena amo ina tanobada nama; ma tanobada ba rakataniamu, Tamada dekena bainala.

29 Ena hahediba eto, Ina harihari o hereva hedinaraimu, hereva heḡereḡeredia so gwauraimu. 30 Harihari lalomai vada eme parara, oi na ḡau iboudiai dibamu; asi badina danu tau ta ese baine nanadaimu. Ini amo vada ame abia dae oi na Dirava ena amo oma.

31 Iesu eto, Harihari vada ome abiabiraigu a? 32 A kamonai: negana be maimu, oibe, vada eme gini dae, umui iboumui ai do ba karoho, ba rakatanigu, ta ta ena gabu ena gabu baola. Bena lau baina noho edea; ḡau tamona sibogu basina noho, badina be Tamagu na dekegu ai noho. 33 Ini ḡau vada na hamaorolaimui, lalogu ai maino bavabia helaoreana. Tanobada ai umui na hisi bavani; to, ba haheauka, badina be lau ese tanobada vada name hadarerea.

Copyright information for `MEU