Joshua 1

Iosua ena ḡaukara e matamaia

Iehova ena hesiai tauna Mose e mase murinai, Iehova ese Iosua Nunu, Mose iduruna tauna, e hereva henia, eto, Egu hesiai tauna Mose vada e mase; taunabunai, a tore isi, ina Ioridane sinavaina ba hanaia, oi bona ina bese idoinai, hari Israel taudia na henidiamu tanona ai ba raka vareai. Aemui palapaladia bae moi tao tanodia iboudiai baina henimui, Mose na gwau henia hamata heḡereḡerena. Tano ḡaḡaena bona ina Lebanon ororona amo ela bona sinavai badana ladana Eufrate, Hiti taudia edia tano idoinai ela bona Davara Badana dina e dihomu kahana ai na bavabia, emui tano. Emu mauri dinadia iboudiai tau ta ese basine laomu ahu diba. Mose na bamoava heḡereḡerena, oi baina bamomu; lau na basina lalomu rea bona basina rakatanimu. Ba goada; ba haheauka. Badina be senedia na gwaurai henidia tanona na oi ese ina bese ba henidia, edia tano ai bainela. Ḡau tamona, ba goada bona ba haheauka. Egu hesiai tauna Mose e henimu taravatuna idoinai ba badinaia bona karana ba karaia; iena amo basio raka siri, idiba kahana ai eiava lauri kahana ai basiola; bena ba lao heni gabudia iboudiai emu kara anidia bae namo. Ina taravatu bukana herevadia na udumu ai bae mia; ia anina ba laloa boi, ba laloa rani. Unu amo ia lalonai e tore herevadia iboudiai ba badinadia bona karadia ba kara; bena emu raka baine namo bona emu kara anidia bae namo. Vada na haḡanimu, ani, ba goada bona ba haheauka. Basio gari, daramu basine doko; badina be Iehova, emu Dirava, ese e bamomumu, emu laolao iboudiai lalodiai.

10 Bena Iosua ese bese lohiadia e haduadia, eto, 11 Taruha amo ba raka hanai, taunimanima ba haḡanidia, baoto “Amui dala lakwana bavabia heḡaeḡae, badina be dina toi basie ore ai na ina Ioridane sinavaina ba hanaia, Iehova, emui Dirava, ese be henimuimu tanona ai ba raka vareai, bona bavabia emui tano.”

12 Bena Iosua ese Ruben iduhuna taudia bona Gad iduhuna taudia bona Manase iduhuna kahana taudia e hamaorodia, eto, 13 Iehova ena hesiai tauna Mose e haḡanilaimui herevana ba laloa tao. Ia eto “Iehova, emui Dirava, ese emui laḡa-ani gabuna baine henimui bona ina tano danu baine henimui e tomu”. 14 Adavamui bona natumui maraḡidia bona emui boromakau na hari Mose e henimui tanona ai bae noho, Ioridane sinavaina inikahana ai; a tuari mai dibamui taumui iboumui ai na emui tuari ḡaudia bavabi kau, tadikakamui vairadiai ba raka hanai, ba durudia, 15 ela bona Iehova ese tadikakamui edia laḡa-ani gabuna baine henidia, umui e henimui heḡereḡerena. Bena idia danu Iehova, emui Dirava, ese be henidiamu tanona bae abia, edia tano ai bae halaoa. Una negana ai, umui emui tano, Iehova ena hesiai tauna Mose ese e henimui tanona Ioridane sinavaina mairiveina kahan ai, vada ba lou henia bona ba noholaia.

16 Bena idia ese Iosua e haere henia, eto, Vada o haḡanilaimai karadia iboudiai baia kara, bona ba siaimai gabudia baiala. 17 Ḡau iboudiai lalodiai Mose a kamonai heniava na heto, oi danu baia kamonai henimu; bona Iehova, emu Dirava, ese baine bamomu, Mose e bamoava heḡereḡerena. 18 Daika ese baine papamu ahuahu bona emu haheḡani herevadia baine dadarai, una tau bae alaia mase. Ḡau tamona, ba goada bona ba haheauka.

Copyright information for `MEU