Joshua 19

Simeon ahuna

E duanaia oreana iharuana na Simeon iduhuna, ena doḡoro ta ta ai: edia tano na Iuda taudia edia tano bogaraginai. Ahudia bini: Bere-sieba; Sieba; Molada; Hasara-sual; Bala; Eseme; Eltolad Betulu; Horoma; Siklaḡ Bete-makaboto; Hasara-susa; Bete-lebaoto; Saruhene: hanua gwauta-toi mai edia hanua maraḡidia ida. Ini danu: Ain; Rimon; Etere; Asana: hanua hani mai edia hanua maraḡidia ida. Hanua maraḡidia iboudiai danu, hetabira tanodia ai, na idia edia, ela bona Baalata-bere bona Rama, diho kahana ai. Simeon taudia ahudia bunu, edia doḡoro ta ta ai. Simeon taudia edia tano na Iuda taudia edia tano lalonai; badina be Iuda ahuna na bada herea. Una dainai Simeon taudia na ahudia e abi, idia edia tano lalonai.

Sebulun ahuna

10 E duanaia oreana ihatoina na Sebulun iduhuna, ena doḡoro ta ta ai. Edia tano e abia ela bona Saridi. 11 Unu amo hetoana na lahara kahana ai ela, ela bona Mareala, ma ela bona Dabesete; unu amo sinavai maraḡina isena amo ela, Iokoneam mairiveina kahana ai. 12 A Saridi amo hetoa na mairiveina dina dae kahana ai ela, ela bona Kisloto-taboro; 13 ma unu amo ela bona Daberata. Bena e dae ela, ela bona Iafia. Unu amo ma ela, mairiveina dina dae kahana ai, ela bona Gata-hefere bona Ete-kasin. Ma unu amo ela, ela bona Rimon bona Nea.

14 Mirigini kahana ai, hetoa na Hanaton amo ela, ela bona Iftahele kourana ai e hadoko. 15 Katata bona Nahalala bona Simron bona Idala bona Betelehem danu idia edia. Edia hanua iboudiai na gwauta-rua, mai edia hanua maraḡidia ida. 16 Sebulun taudia ahudia bunu, edia dogoro ta ta ai: unu hanua e abi, mai edia hanua maraḡidia ida.

Isakara ahuna

17 E duanaia oreana ihahanina na Isakara iduhuna, ena doḡoro ta ta ai. 18 Edia tano bini: Iesrele; Kesuloto; Sunem; 19 Hafaraim; Sion; Anaharata; 20 Rabiti; Kision; Ebe; 21 Remete; En-ganim; En-hada; Bete-pase. 22 Edia tano hetoana danu ela, ela bona Taboro bona Sahasuma bona Bete-semese; bena hetoa na Ioridane sinavaina ai e hadoko. Hanua iboudiai na gwautatauratoi, mai edia hanua maraḡidia ida. 23 Isakara taudia ahudia bunu, edia doḡoro ta ta ai: hanua bona hanua maraḡidia.

Asere ahuna

24 E duanaia oreana iha-imana na Asere iduhuna, edia doḡoro ta ta ai. 25 Edia tano bini: Helkat bona Hali bona Betene bona Akasaf 26 bona Alamelek bona Amad bona Misala. Lahara kahana ai, edia tano hetoana na ela, ela bona Karamele bona Sihoro-libnata. 27 Una amo mairiveina kahana amo ela, ela bona Bete-dagon bona Sebulun bona Iftahele kourana; ma mirigini kahana amo ela, ela bona Bet-emek bona Neiele; ma mirigini kahana amo ela, ela bona Kabulu 28 bona Ebron bona Rehob bona Hamon bona Kana, ma ela bona hanua badana Sidono. 29 Unu amo hetoa ma ela, ela bona Rama, ela bona maḡu badana hanuana Turo; unu amo ma ela, ela bona Hosa, bona kone ai e hadoko; Mahalab bona Aksib 30 bona Umaha bona Afek bona Rehob danu idia edia. Hanua iboudiai na ruahui-rua, mai edia hanua maraḡidia ida. 31 Asere taudia ahudia bunu, edia doḡoro ta ta ai: hanua bona hanua maragidia.

Napatali ahuna

32 E duanaia oreana ihatauratoina na Napatali iduhuna, ena doḡoro ta ta ai. 33 Edia tano hetoana na Helef amo e matamaia,oak auna Saananim ai amo, bona Adaminekeb bona labnele amo, ela bona Lakumu; bena Ioridane sinavaina ai e hadoko. 34 Bena hetoa na lahara kahana ai ela, ela bona Asnoto-taboro, ma unu amo ela bona Hukok. Sebulun na diho kahana ai, Asere na lahara kahana ai, bona Iuda na mairiveina kahana ai, Ioridane sinavaina badinai. 35 Hanua mai maḡudia bini: Sidim, Sere, Hamat, Rakata, Kinerete, 36 Adama, Rama, Hasoro, 37 Kede, Edrei, Enhasoro, 38 Irono, Migdalele, Horeme, Bet-anata, Bete-seme. Hanua iboudiai na gwauta taurahani-ta, mai edia hanua maraḡidia ida. 39 Napatali taudia ahudia bunu, edia doḡoro ta ta ai: hanua bona hanua maraḡidia.

Dan ahuna

40 E duanaia oreana ihahituna na Dan iduhuna, ena doḡoro ta ta ai. 41 Edia tano bini: Sora; Estaol; Iri-semese; 42 Saalabin; Aialono; Itla; 43 Elon; Timuna; Ekron; 44 Elteke; Gibeton; Baalata; 45 lehud; Beneberak; Gatarimon; 46 Meiakon; Rakon; bona lopa kahana tanodia.

47 A Dan taudia edia tano na edia amo e heabi oho: bena e tore isi, Leseme taudia e tuari henidia. Hanua na e abia, bona hanua taudia e aladia ore; bena edia hanua ai e halaoa, e noholaia, bona ladana e hatoa Leseme-dan, senedia e nemaia. 48 Dan taudia ahudia bunu, edia doḡoro ta ta ai: hanua bona hanua maraḡidia.

Tano iharina e haḡuḡurua

49 Tano na e haria vaitani, hetoa iboudiai e gwauraidia ore, bena Israel taudia ese Iosua Nunu ahuna e henia, idia bogaragidiai. 50 Iehova ena hahedua dainai idia ese ia e noilaia hanuana e henia, ladana na Timnata-sera, Efraim ororo-tanodia ai. Ia ese hanua ma e hadaia lou, bena e noholaia.

51 Tanodia bunu, hahelaḡa tauna Eleasara bona Iosua Nunu bona Israel iduhudia ikwaradia taudia ese mari amo e hari Silo ai, Iehova vairanai, hebou kalagana iduarana ai. Tano iharina na unu e haḡuḡurua toma.

Copyright information for `MEU