Joshua 20

Roho-mauri Hanuadia

Iehova ese Iosua e hereva henia, eto, Israel taudia ba hamaorodia, baoto: Roho-mauri hanuadia bavabidia hidi, Mose uduna amo na haḡanimui heḡereḡerena. Bena taunimanima ta baine hapididia tauna ese unu baine heau lao: unuseni ai mase tauna varavarana imana amo ba roho mauri. Hapadidi tauna na unu hanua ta baine heau henia, bena hanua ikoukouna ai baine gini, hanua tau-badadia vairadiai ia sibona sivaraina baine gwauraia hedinarai. Bena idia ese hanua lalonai bae hakaua vareai, gabu ta bae henia, unuseni ai baine noho. Mase tauna varavarana ese bema ḡavaia, hapadidi tauna na basie henia; badina be ia ese dekena tauna e hapadidia, dia badu dainai se alaia mase. Bena hapadidi tauna na una hanua ai baine noho, ela bona hebou vairanai baine gini, hebou ese baine hahemaoro henia. Ma baine noho, ela bona hahelaḡa tauna badana baine mase; una murinai ia na ena hanua korikon bona ena ruma korikori, e heautania gabuna, ma baine lou henia diba.

Taunabunai, idia na Kede, Galilea tanona ai, Napatali ororodia ai, bona Sekem, Efraim ororodia ai, bona Kiriat-araba (ladana ta be Heberon), Iuda ororodia ai, e abidia hidi. Bona Ioridane sinavaina unukahanai, Ieriko mairiveina kahana ai, idia na Besere, tano ḡaḡaena ororo-taorana ai, Ruben taudia edia, bona Ramoto, Gilead tanona ai, Gad taudia edia, bona Golan, Basan tanona ai, Manase taudia edia, e abidia hidi. Hanua bunu idia ese e gwauraidia, Israel taudia iboudiai edia, bona noho hedoa tauna ena: hapadidi tauna na unuseni ai baine heau maun, mase tauna varavarana ese baine alaia mase na garina, ela bona hebou vairanai baine gini.

Copyright information for `MEU