Joshua 24

Iosua ese Israel iduhudia iboudiai e haboudia Sekem ai, bona edia tau-badadia bona edia hanua lohiadia bona edia hahemaoro taudia bona edia heitatao taudia e boiridia. Bena idia na Dirava vairanai e gini. Bena Iosua ese taunimanima iboudiai e hereva henidia, eto, Iehova, Israel Diravana, na ini e gwau tomamu: Senemui negadia ai Tera, Abraham bona Nahoro tamadia, na Eufrate sinavaina unukahana ai e nohova; unuseni ai idia ese dirava idaudia e toma henidia diho. Bena senemui Abraham na sinavai unukahana amo na abia, Kanaan tanona idoinai na hakaua hanai, natuna momo na henia; Isaak danu na henia, bona Isaak na Iakob bona Esau na henia. Esau na Seiri ororodia na henia, ena tano ai bainela; a Iakob mai natuna ida na Aigupto ela. Bena Mose bona Aaron na siaidia, Aigupto na hahisia, bogaraginai na kara karadia amo; una murinai na hakaumui lasi. Tamamui na Aigupto amo na hakaudia lasi; bena kone ai o lasi; bena Aigupto taudia ese tamamui e ḡavadia, mai edia kariota bona mai edia hosigui taudia, ela bona Davara Kakakakana. Bena tamamui ese Iehova e tai henia negana ai, ia ese umui bona Aigupto taudia padadia e havaburaia, davara amo e habubunidia. Aigupto ede na kara henia toma na matamui ese e itaia. Murinai tano ḡaḡaena ai o nohova, nega daudau.

Bena na hakaumui vareai, Amoro taudia edia tano Ialonai, Ioridane sinavaina unukahana ai; idia ese e tuan henimui, bena imamui ai na atodia. Edia tano o abia; lau ese umui vairamui ai na habuadia tari. Bena Balak Siporo, Moab pavapavana, e tore isi, Israel e tuari henia; ia ese Balaam Beoro e boiria, baine uduguiraimui totona; 10 a Balaam asina hakala henia, taunabunai ia ese e hanamomui; ia imana amo na hamaurimui. 11 Una murinai Ioridane sinavaina o hanaia, Ieriko ai o kau. Bena Ieriko taudia ese e tuari henimui; Amoro taudia bona Perisi taudia bona Kanaan taudia bona Hiti taudia bona Girigasa taudia bona Hivi taudia bona Iebusu taudia ese danu e tuari henimui; a lau ese umui imamui ai na atodia. 12 Nanigo danu na siaidia vairamui ai, idia ese Amoro pavapavadia raruosi na umui vairamui ai e luludia lasi, dia emui dare ese bona dia emui peva ese. 13 Asio ruaia tanona na henimui; asio hadai hanuadia o noholai; asio hado imeadia, vine imeadia bona olive imeadia, huahuadia o ani.

14 Taunabunai, Iehova garina ba gari, ia isiaina ba lao heni mai momokanimui bona mai kamonaimui ida. Senemui ese Eufrate sinavaina unukahana ai bona Aigupto ai e toma henidia diho diravadia ba rakatanidia, Iehova isiaina ba lao heni. 15 A Iehova isiaina ilao-henina ai boma daradara, hari ina dina ai ba haeroa, daika isiaina ba lao heni, senemui sinavai unukahana ai isiaidia e lao heni diravadia, eiava Amoro taudia edia dirava, ina o noholaiamu tanona diravadia. A lau be egu ruma taudia ida Iehova isiaina baia lao heni.

16 Bena hebou taudia ese e haere henia, eto, Ai ese Iehova basia rakatania, dirava idaudia basia toma henidia diho, lasi vaitani. 17 Badina be Iehova, eda Dirava, ese ita bona tamada na Aigupto tanona amo bona iḡui rumana amo e hakauda lasi, bona unu toa badadia e karava ita vairadai, bona eda laolao dalana idoinai ai e hamauridava, edia tano ta rakadia hanai taudia iboudiai bogaragidiai. 18 Iehova ese danu taunimanima iboudiai na ita vairadai e luludia lasi, Amoro taudia una tano ai e nohova ibouboudiai e luludia lasi. Taunabunai ai danu Iehova isiaina baia lao heni, badina be ia na emai Dirava.

19 A Iosua ese hebou taudia e hamaorodia, eto, Iehova isiaina basio lao heni diba; badina be ia na Dirava helaḡana, vageḡe Diravana; ia na emui kara dika bona emui kara havara basine gwaudia tao. 20 Iehova boma rakatania bona dirava idaudia isiaidia boma lao heni, ia ese ihanamomui baine hadokoa, ma baine hadikamui. 21 Hebou taudia ese Iosua e haere henia, eto, Lasi, ai na Iehova isiaina baia lao heni.

22 Bena Iosua ese e hamaorodia, eto, Emui hereva ihahedinaraina na umui sibomui; Iehova vada o abia hidi, ia isiaina ba lao heni o tomu. Idia na e haere, eto, Ai sibomai ese vada a gwauraia hedinarai. 23 Iosua ma eto, Benaini, dirava idaudia bogaragimui ai mimia na ba negedia, bona lalomui ba hamanadadia, Iehova, Israel Diravana, enai. 24 Hebou taudia ese Iosua e haere henia, eto, Iehova, eda Dirava, isiaina baia lao heni, ia erena baia kamonai.

25 Taunabunai, Iosua na hebou taudia ida e herohemaino una dina ai; bona taravatu bona haheḡani e henidia, Sekem ai. 26 Bena Iosua ese unu hereva na Dirava ena taravatu bukana ai e tore; bena nadi badana ta e abia,oak auna henunai e haginia, Iehova ena gabu helaḡana ai. 27 Bena Iosua ese taunimanima iboudiai e hamaorodia, eto, A itaia, ina nadi na ita ihabadelaida toana ai vada ela; badina be Iehova ese e henida herevadia iboudiai na ina nadi ese vada e kamonai: taunabunai Iehova, emui Dirava, ba koia negana ai, ina nadi ese baine hahemaoro henimui. 28 Bena Iosua ese idia iboudiai e siaidia karoho, ta ta ena tano ena tano baela.

Iosua e mase

29 Unu ḡau muridiai, Iosua Nunu, Iehova ena hesiai tauna, e mase. Ena laḡani iboudiai na sinahu-ta dikoana gwauta. 30 Ena tano ai e guria, Timnata-sera ai; una na Efraim ororodia ai, Gaasa ororona mirigini kahana ai.

31 Israel taudia ese Iehova isiaina e lao heniva, Iosua ena maun dinadia iboudiai lalodiai, bona tau-badadia, Iosua ena mase murinai dounu e mauriva bona Iehova ena kara Israel taudia ediai na matadia amo e itava taudia, edia mauri dinadia lalodiai danu.

32 Iosef turiana, Israel taudia ese Aigupto amo e mailaidia, na Sekem ai e guridia, Iakob ese Sekem tamana Hamoro ena amo e hoia tanona ai. Davana besilver monidia sinahu-ta e heni; bena Iosef garana edia tano ai ela.
Genese, Karoa 33, siri 19 ba itaia.


Eleasara e mase

33 Eleasara Aaron danu e mase; bena Gibea ai e guria, natuna Fineha vada e henia hanuana bunai, Efraim ororodia ai.

Copyright information for `MEU