Joshua 4

Ioridane e hanaia toana

Bese idoinai ese Ioridane sinavaina e hanaia vaitani, bena Iehova ese Iosua e hagania, eto, Iduhu gwauta-rua amo tatau ta ta amo bavabidia; ba haḡanidia, baoto “Nadi gwauta-rua Ioridane bogaraginai, hahelaḡa taudia e gini gabuna amo, bavabidia, ba huadia lao, hari hanuaboi ba taruha gabuna ai bavatodia”. Bena Iosua ese vada e abidia hidi taudia na iduhu ta ta amo ta ta e boiridia. Bena Iosua ese e haḡanidia, eto, Iehova, emui Dirava, ena taravatu mauana vairanai baola, Ioridane sinavaina bogaraginai; bena ta ta nadi ta ta bavabi isi, paḡamui ai ba hua, Israel iduhudia heḡereḡeredia. Ina na toa ai bainela bogaragimui ai. Bena kerukeru vanegai natumui ese bae nanadaimui, baeto “Ini nadi anidia be dahaka?” umui na ba hadibadia, baoto “Ioridane sinavaina na Iehova ena taravatu mauana vairanai e kororo; Ioridane amo e huaia hanai negana ai, ranu na e kororo”. Bena ini nadi na Israel taudia edia helalo-tao ḡaudia ai baela, ela bona hanaihanai.

Bena Israel taudia ese Iosua ena haheḡani heḡereḡerena e karaia: nadi gwauta-rua Ioridane sinavaina bogaragina amo e abidia, Israel iduhudia gwauta-ruaosi toadia, Iehova ese Iosua e haḡania heḡereḡerena. Bena e huadia lao, edia taruha gabuna ai e atodia diho. A Iosua na nadi gwauta-rua e abidia, Ioridane bogaraginai e haginidia, hahelaḡa taudia, hari taravatu mauana e huaia taudia, e gini gabuna. Idia na mimia ema bona hari dina. 10 Badina be hahelaḡa taudia, maua helaḡana e huaia taudia, na Ioridane bogaraginai e gini, ela bona Iehova ese Iosua e haduaia taunimanima baine haḡanilaidia karadia iboudiai vada e ore, Mose ena haheḡani iboudiai Iosua e henia heḡereḡeredia.

Bena taunimanima iboudiai e hanai haraḡa-haraḡa.
11 Taunimanima iboudiai e raka hanai vaitani, bena maua helaḡana bona hahelaḡa taudia e hanai, taunimanima vairadiai. 12 Ruben taudia bona Gad taudia bona Manase iduhuna kahana taudia, mai edia tuari ḡaudia imadia ai, na Israel taudia vairadiai e raka hanai, gunaguna Mose ese e haḡanidia heḡereḡerena. 13 Tuari taudia gerebu hani
Gerebu hani = 40,000.
Iehova vairanai e raka hanai, tuari ela, Ieriko taorana ai.
14 Una dina ai Iehova ese Iosua e imodaia, Israel taudia iboudiai vairadiai; idia ese e matauraia bada, ena mauri dinadia iboudiai, gunaguna Mose e matauraiava heḡereḡerena.

15 Bena Iehova ese Iosua e hamaoroa, eto, 16 Hahelaḡa taudia, taravatu mauana e huaia taudia, ba haḡanidia, Ioridane sinavaina amo bae dae. 17 Taunabunai, Iosua ese hahelaḡa taudia e haḡanidia, eto, Ioridane sinavaina amo ba dae. 18 Hahelaḡa taudia, Iehova ena taravatu mauana e huaia taudia, na Ioridane sinavaina bogaragina amo e dae; bena aedia na tano kaukauna ai e kau negana ai, Ioridane sinavaina ma e aru lou, abata ma e lasi, gunaguna heḡereḡerena.

19 Hua gini-gunana dinana ihagwautana ai Israel taudia na Ioridane sinavaina amo e dae ela, Gilgal ai e taruha, Ieriko mairiveina kahana ai. 20 Hari nadi gwauta-ruaosi, Ioridane ai e abi ḡaudia, na Iosua ese e haginidia Gilgal ai. 21 Bena ia ese Israel taudia e hamaorodia, eto, Kerukeru vanegai natumui bae nanadaimui, baeto “Ini nadi anidia be dahaka?” 22 umui ese natumui ba hadibadia, baoto “Israel na ina Ioridane sinavaina amo e raka hanai, tano kaukauna ai”. 23 Badina be Iehova, emui Dirava, ese Ioridane ranuna na emui ai e hakororoa, ela bona o raka hanai vaitani, gunaguna Iehova, emui Dirava, ese Davara Kakakakana na ai emai ai e hakororoa ela bona ai vada a raka hanai heḡereḡerena. 24 Taunabunai, tanobada taudia iboudiai bae diba Iehova imana na mai goadana; bona umui danu Iehova, emui Dirava, garina ba gari ela bona hanaihanai.

Copyright information for `MEU