Judges 4

Debora

Ehud e mase murinai, Israel taudia ma e kara havara Iehova vairanai. Bena Iehova ese Iabin, Kanaan pavapavana, imana ai e atodia. Una tau na Hasoro Iohiana; ena tuari oreana biaguna na Sisera, Haroset-ha-goim ai e nohova tauna. Bena Israel taudia ese Iehova e tai henia, baine durudia eto. Badina be una tau ena auri kariotadia na sinahu taurahani-ta; laḡani ruahui lalodiai ia ese Israel taudia e hahisidia bada.

Una negana ai peroveta hahinena ta, ladana Debora, Lapidoto adavana, ese Israel ai e hahemaorova. Ena kara be pamu auna ta, ladana Debora ena pamu auna, henunai e helaiva, Rama bona Betele padadiai, Efraim ororodia ai. Israel taudia na unua ela ia dekenai, baine hahemaoro henidia totona.

Ia ese hereva e siaia, Barak Abinaom na Napatali hanuana ta amo e boiria: una hanua ladana na Kede. E hamaoroa, eto, Iehova, Israel Diravana, ese se haḡanimu a? Aola, emu tuari oreana na Taboro ororona ai ba haboudia: gerebu-ta
Gerebu-ta = 10.000.
bavabidia Napatali iduhuna amo bona Sebulun iduhuna amo.
Bena lau ese Sisera, Iabin ena tuari oreana biaguna, mai ena kariota bona ena tuari taudia ida, baina koia, Kison sinavaina isena ai baine vasi; bona oi imamu ai baina atoa. Barak ese e haere henia, eto, Oi ba bamogu, vada bainala; a basio bamogu, lau na basinala. Hahine na eto, Momokani baina bamomu; ḡau tamona una dala amo ihanamomu basio davaria, badina be Iehova ese Sisera na hahine ta imana ai baine atoa. Bena Debora e tore isi, Barak ida Kede hanuana ela. 10 Bena Barak ese Sebulun taudia bona Napatali taudia e boiridia, Kede hanuana baela. Tuari taudia gerebu-ta ia murinai e raka; bona Debora danu ia ida ela.

11 Hebere, tau Kene, ese Kene taudia, Mose ravana Hobab garana, edia amo vada e raka oho, ena kalaga na dauhai e haginia, Sanamimoak auna badibadinai, Kede hanuana badinai.

12 Haida ese Sisera e hamaoroa, Barak Abinaom na Taboro ororona vada ela. 13 Bena Sisera ese ena kariota iboudiai e haboudia, auri kariotadia sinahu taurahani-ta, bona ena tuari taudia iboudiai danu, bena Haroset-ha-goim amo Kison sinavaina ela. 14 Bena Debora ese Barak e haḡania, eto, A tore isi, dinana binai Iehova ese Sisera na oi imamu ai be atoamu. Iehova na oi vairamu ai basinela a? Taunabunai Barak na Taboro ororona amo e hekei, mai ena tuari taudia gerebu-ta ida.

15 Bena Iehova ese Sisera na dare amo e hadarerea, Barak vairanai; ia bona ena kariota iboudiai bona ena tuari oreana idoinai. A Sisera na ena kanota amo e diho, aena amo e heau. 16 Bena Barak ese kariota bona tuari taudia e hahavadia lao, ela bona Haroset-ha-goim. Sisera ena tuari taudia ibouboudiai na dare amo e aladia mase; ta se roho mauri.

17 Sisera na aena amo e heau, Iaele, Hebere tau Kene adavana, ena kalaga ela; badina be Iabin, Hasoro pavapavana, bona Hebere, tau Kene, ena iduhu vada e herohemaino. 18 Bena laele na e raka lasi, Sisera e hedavari henia, e hamaoroa, eto, Gauka e, a raka vareai dekegu ai; basio gari. Taunabunai, ia na ia dekenai e raka vareai, kalaga lalonai: hahine na hetaru e abia, e tarua ahu. 19 Sisera ese e hamaoroa, eto, Mani emu kara ranu kuri ta a henigu, aina inua, badina be ranu e masegu. Hahine na rata kopi ta e kehoa, rata kuri ta e henia, bena e inua. Ma e tarua lou. 20 Sisera ma e hamaoroa, eto, Kalaga iduarana ai ba gini; bena tau ta bainema, baine nanadaimu, baineto “Iniseni ai tau ta noho a?”, oi na ba haere, baoto “Lasi”.

21 Bena laele, Hebere adavana, ese ikoko ta e abia, bona lavu ta imana ai e abia, bena metaira-metaira Sisera e raka henia kahi, mahutana ai ibunina daena ai e kokoa uru, ikoko na tano ai e heholo; badina be tau boera dainai vada e hekure, vada e mahuta. Taunabunai vada e mase.

22 Bena Barak ese Sisera e hahavaia negana ai, Iaele na e raka lasi, ia ida e hedavari, e hamaoroa, eto, Aoma; o tahuamu tauna baina haheitalaimu. Taunabunai ia na hahine ena kalaga ai e raka vareai, unuseni ai Sisera na masena ai e hekure, ikoko na dounu ibunina daena ai mia.

23 Taunabunai, una dina ai Dirava ese Iabin, Kanaan pavapavana, e hadarerea, Israel taudia vairadiai. 24 Una negana ai Israel taudia edia kara e auka e laova Iabin, Kanaan pavapavana, enai, ela bona e habuaia tari.

Copyright information for `MEU