Leviticus 17

Boubou karadia ihakereredia

Iehova ese Mose e hamaoroa, eto, Aaron mai natuna ida bona Israel taudia iboudiai ba hereva henidia, baoto, Iehova ena hahedua binai: Israel tauna ta ese horomakau maruanena eiava mamoe natuna eiava nani baine alaia mase, taruha lalonai eiava taruha murimurinai, a hebou kalagana iduarana ai basine mailaia, Iehova ena ihaboulaina ḡauna ai basine halaoa Iehova ena ruma vairanai, rarana na ia latanai, badina be rara vada e hahebubua kerere: ia na ena bese amo bae negea daure. A Israel taudia na edia boubou ḡaudia taruha murimurinai bae aladia mase negadia ai, idia ese Iehova dekena bae mailaidia, hebou kalagana iduarana ai, unuseni ai hahelaḡa tauna bae henia, edia herohemaino bouboudia ai bae halaodia Iehova ena. Bena hahelaḡa tauna ese rara baine abia, Iehova ena ihaboulaina patana baine nevarilaia, hebou kalagana iduarana ai; bona digara baine haḡolea oho, bonana namo ḡauna ai bainela Iehova ena. Taunabunai, idia na dirava koikoidia basie boudia, bona vairadiai basie lebulebu. Baine mia hanaihanai taravatuna bunai, idia ediai, edia uru iboudiai lalodiai.

Ba haduadia danu, baoto: Israel tauna ta, eiava noho-hedoa tauna ta,ese ḡole-oho boubouna eiava idau boubouna ta baine alaia mase, a hebou kalagana iduarana ai basine mailaia, Iehova ena ihaboulaina ḡau, una tau be ena bese amo bae negea daure.

Rara Taravatuna

10 Israel tauna ta eiava noho-hedoa tauna ta, ese vamu mai rarana baine ania, lau ese una tau baina badu henia; ia na ena bese amo bae negea daure. 11 Badina be hidio ena mauri be rara ai; vada na henimui, ihaboulaina patana ena, laumamui ihaḡoevadia. Rara na haheḡoeva ḡauna, badina ia lalonai be mauri. 12 Taunabunai, Israel taudia vada na haḡanidia, nato: Asi tauna ta emui orea lalonai, bona asi tauna ta bogaragimui ai e noho hedoamu, vamu mai rarana baine ania.

13 Israel tauna ta eiava noho-hedoa tauna ta baine labana, bena udaḡauna ta eiava roho manuna ta, aniani ḡauna, baine alaia mase, ia ese rarana baine hadihoa tano ai, bona ḡahu amo baine tahunia. 14 Badina be mauri ḡaudia iboudiai edia mauri be rara ai. Taunabunai lau ese Israel taudia vada na haḡanidia, nato: Vamu mai rarana na basio ania, badina be mauri ḡaudia iboudiai edia mauri be rara ai; baine ania tauna na bae negea daure. 15 A tau ta, Israel tauna eiava noho-hedoa tauna, ese mase kava ḡauna eiava uda ḡaudia daḡedaḡedia ese e alaia ḡauna, baine ania, ia na ena dabua baine huri bona baine digu, bona baine taubu ela bona dina baine diho; una murinai ia na baine ḡoeva. 16 A ia na ena dabua basinema huri eiava basinema digu, ia na bema kerere.

Copyright information for `MEU