Luke 14

Iesu ese Dino Helaḡa ai ma e hahemauri

Dina Helaḡa ta ai, ia ese Farisea biagudia ta ena ruma ai e dae kau, bae aniani. Bena idia ese e itaia tao. Rara dika ese e daea tauna ta ia vairanai e helai; bena Iesu ese taravatu taudia bona Farisea taudia e nanadaidia, eto, Gorere taudia Dina Helaḡa ai baita hamauridia na mai taravatuna eiava? A idia na asie hereva. Bena ia ese hari gorere tauna e abia, e hamauria, bena e siaia. Bena e hamaorodia, eto, Umui daika ena doniki eiava ena boromakau guri ai bema moru dobi, ia ese Dina Helaḡa ai basinema veria dae a? Idia ese ia asie haere henia diba.

Hahemanau herevadia

Ia ese vadivadi taudia e itadia, helai gabudia hereadia e abi hidi, bena sivarai heḡereḡerena ta e henidia, eto, Tau ta ese baine vavemui, headava ariana baola, gabu hereadia ai basio ege diho, aria biaguna ese herea tauna ta bema vavea na garina; bena bema vasi hamaoromu, bema toma “A siri, ena na ina tau ena gabu”. Una negana ai oi na mai hemaraimu ida henu gabuna ai boma ege diho. 10 A baine vavemu ai na henu gabuna ai ba ege diho, bena e vavemu tauna baine vasi hamaoromu, baineto “Turagu e, oi na atai ai ba dae”. Bena bae ege diho taudia iboudiai ese bae imodaimu. 11 Badina be sibona e heimodai tauna na baine baia, a sibona e hahemanau tauna na bae imodaia.

12 Bena Iesu ese ia e vavea tauna e hamaoroa, eto, Dina tubua anianina eiava adorahi anianina ba dabaraia negana ai, turamu eiava tadikakamu eiava varavaramu eiava taḡa taudia dekemu ai nonoho na basio vavedia, kerukeru vanegai bae hadavaia, oi ma bae vavemu, na garina. 13 To aniani ba dabaraia negana ai, ogoḡami taudia bona anina-doko taudia bona aehedairike taudia bona mata-kepulu taudia ba vavedia; 14 unu amo vada ba namo, badina be idia na asi edia kohu bena basie hadavaia, bena kara maoromaoro tore-isina ai davamu bavabia.

Sivarai heḡereḡerena: Anibou badana

15 Ia ida e aniani hebou tauna ta ese una hereva e kamonai, bena e hamaoroa, eto, Dirava ena basileia anibouna ai baine ege diho tauna na baine namo. 16 A Iesu eto, Tau ta ese aria badana e karaia, bena taunimanima hutuma e vavedia. 17 Aniani idabarana negana ai, ia ese ena hesiai tauna ta e siaia, e vavedia taudia baine hamaorodia, baineto “Vada aoma, ḡau iboudiai vada e lai heḡaeḡae”. 18 To idia iboudiai e gwau edeede. Ta eto “Lau na tano ta vada na hoia, be itana ba laomu; mani emu kara biagumu ba hamaoroa”. 19 Ma ta eto “Lau be boromakau gwauta vada na hoidia, be itohodia ba laomu; mani emu kara biagumu ba hamaoroa”. 20 Ma ta eto “Lau na harihari name headava, una dainai lau na basina vasi diba”.

21 Hesiai tauna e lou ela, unu hereva na biaguna e hamaorolaia lao. Biaguna na e badu dikadika; bena ena hesiai tauna e haduaia, eto, Aola haraḡa, hanua ariaradia ai bona dala ai ogoḡami taudia bona anina-doko taudia bona mata-kepulu taudia bona ae-hedairike taudia ba hakaudia mai.

22 Hesiai tauna ma ema, eto, Ḡaubada e, hari o hahedua heḡereḡerena ai vada na karaia, to ruma na do asie helaia davana.

23 Bena biaguna ese hesiai tauna ma e haduaia, eto, Baola, uma daladia ai bona ara badidiai haida ma ba haboudia, egu ruma baeme helaia davana. 24 Badina be lau na hamaoromuimu, na vavedia tauna ta ese egu anibou sisina taina basine ania.

Ba haheauka!

25 Hutuma ia ida e loava; bena e gini kerehai, e hamaorodia, eto, 26 Ta dekegu bema mai, to tamana, sinana, adavana, natuna, tadikakana, bona ena mauri danu, basinema lalodia nege, ia na dia lauegu hahediba. 27 Bona ena satauro basinema huaia lau murigu ai basinema raka tauna na dia lauegu hahediba.

28 Umui daika kohoro baine larebaia e tomamu, basine helai diho guna, davana do basine laloa, basine haeroa guna baine haḡuḡurua diba eiava? 29 Ia na badina bema matamaia, a kohoro basinema ha-orea, bena bema itaia taudia iboudiai ese bema kirikirilaia, 30 bema toma “Ina tau ese kohoro ilarebana e matamaia, to asi goadana, seme ha-orea” na garina.

31 Eiava, edena hanua pavapavana, idau hanuana pavapavana baine tuari henia e tomamu, basine helai diho guna, basine haeroa, iena tuari taudia gerebu tamona bae heḡereḡere e maimu tauna ena tuari taudia gerebu rua bae hadareredia diba eiava? 32 Bema lasi, padadia dounu daudauna ai, ia ese ena hesiai taudia maino igwauraina baine siaidia lao.

33 Taunabunai, umui ese emui ḡau iboudiai basioma rakatani, umui na dia lauegu hahediba. 34 Damena na ḡau namona; a damena basinema tadika, dahaka ese bema hatadikaia. 35 Ia na dia tano iubulaina, dia seriseri ḡauna; vada negenege ḡauna mo. Mai taiana tauna na baine hakala.

Copyright information for `MEU