Luke 17

Dika igwau-taodia

Iesu ese ena hahediba e hamaorodia, eto, Hekwakwanai ḡaudia na do bae vara, to ihavaradia tauna madi ihabaina. Namo huro badana ta aiona ai bema mataia, davara ai bema negea dobi; dika ini maraḡimaraḡidia tamona bema hahekwakwanaia. Nahuamui ba toho: tadikakamu baine hadikamu, ba sisiba henia, bena baine helalo kerehai negana ai na ena dika ba gwaua tao. Dina tamona ai nega hahitu baine hadikamu, bena nega hahitu baine lou henimu, baineto “Vada name helalo”, ena dika vada ba gwau tao.

Iesu ese ena aposetolo taudia e hagoadadia

Aposetolo taudia ese Lohiabada e noia, eto, Emai abidadama ame habadaia. Lohiabada ese e haere henidia, eto, Emui abidadama bema sinapi nadinadina na heto, umui ese ina budoa boma haḡania, boma toma “Ba heraḡa, davara ai ba hehado”, bena bema kamonai henimui. A umui daika ena hesiai tauna tano iruana eiava mamoe ireḡudia amo baine lasi negana ai baine hamaoroa, baineto “Ame ege diho haraḡa, bavaniani”? Lasi, ia na baineto “Agu a nadu, emu rami ba rioa, isiaigu ba lao heni ela bona baina aniani vaitani baina inuinu vaitani, murinai oi ma bavaniani bona ba inuinu” ani? Ia ese hesiai tauna e hanamoaunu, e hahedua karadia e kara dainai, a? 10 Benaini, umui danu, e haduamui karadia iboudiai ba kara, bena baoto “Ai na hesiai taumai dia nanamo, badina be e haduamai karadia mo vada a karamu”.

Iesu ese lepra taudia gwauta e hamauridia

11 Ia na Ierusalem e lao heniava negana ai, Samaria bona Galilea tanodia amo e raka hanai. 12 Hanua maraḡina ta ai e lasi, bena lepra taudia gwauta ia ida e hedavari, to dauhai e gini, 13 Iesu e boi henia eto, Iesu, biagumai e, ame bogamai hisi. 14 Ia ese e raraidia, bena e hereva henidia, eto, Hahelaḡa taudia dekedia hari aola, bae itamui. Bena vada ela. Dala amo e laova ai kopidia vada e ḡoeva. 15 Bena tamona mo kopina e itaia vada e ḡoeva, e lou ela, mai moale badana ida Dirava e imodaia, 16 bona Iesu aena badinai e goru diho, e hanamoa. A ia na Samaria tauna. 17 Bena Iesu eto, Gwautaosi asie ḡoeva a? Taurahani-ta be edeseni ai? 18 Haida asie lou, Dirava asie imodaia, ina idau bese tauna mo sibona a? 19 Bena ia ese e hamaoroa, eto, A tore isi, vada aola;emu abidadama ese vada e hamaurimu.

Iesu ese gabeai bae vara ḡaudia e gwaurai guna

20 Farisea taudia ese e nanadaia, eto, Dirava ena basileia na edena nega ai bainema? Ia ese e haere henidia, eto, Dirava ena basileia na basinema ena gini-dae ta nariamu ḡauna na heto. 21 Bona ta basineto “Ḡau na o ina” eiava “Ḡau na o una”; badina na Dirava ena basileia na lalomui ai.

22 Bena ia ese ena hahediba e hamaorodia, eto, Nega ta baine gini dae, umui na ba ura Taunimanima Natuna ena dina tamona mo ba itaia, to basio itaia. 23 Haida na baeto “Tauna o ina” eiava “Tauna o una”: to umui na basiola, muridiai basio raka. 24 Badina be kevaru guba kahana ai e kevaru isimu e laomu bona guba kahana na heto, Taunimanima Natuna ena dina lalonai unu baine heto. 25 A ia na hisi diaḡau do baine ani guna, bona ina uru taudia ese bae dadaraia.

26 Noa ena nega ai na heto, Taunimanima Natuna ena nega ai unu baine heto. 27 Idia na e anianiva, e inuinuva, e headavava, ema bona Noa lagatoi ai e ḡui dinana; bena utu-utu ese e utudia dae, e dono mamase.

28 Lot ena nega ai danu unu mo heto. E anianiva, e inuinuva, e hoihoiva, e hadohadova, ruma e karava. 29 A Lot na Sodoma amo e raka lasi dinana ai lahi bona nadi siahudia guba amo e moru, iboudiai e habuadia tari. 30 Taunimanima Natuna baine hedinarai dinana ai danu unu baine heto.

31 Una dina ai, tau ta bema guhi ai, ia na ruma lalonai basinema raka vareai, ena kohu basinema abi kau; bona tau ta bema uma ai, ia na hanua basinema lou henia. 32 Lot adavana ba laloa. 33 Ena mauri e abia tarikatarikamu tauna ese mauri baine reaia; a ena mauri e reaiamu tauna ese mauri baine abia. 34 Na hamaoromuimu, una hanuaboi ai tatau rarua geda tamona ai bae hekure; ta baine heabi oho, ta be baine noho. 35 Hahine rarua uit iririlaina nadina bae giroa; ta baine heabi oho, ta be baine noho. 36 Tatau rarua uma ai bae ḡaukara; ta baine heabi oho, ta be baine noho. 37 Idia ese e nanadaia, eto, Lohiabada e, edeseni ai? Ia eto, Mase ḡauna e miamu gabuna ai galo bae hebou.

Copyright information for `MEU