Luke 18

Sivarai heḡereḡerena: Hahemaoro tauna dikana

Ia ese sivarai heḡereḡerena ta e henidia, nega iboudiai bae ḡuriḡuri, basie hesiku, helaoreana. Eto, Hanua ta ai hahemaoro tauna ta e nohova: ia na Dirava garina se gariva, bona taunimanima se matauraidiava. Una hanua vabuna ta hari hahemaoro tauna dekena ela, bena eto, E inai henigumu tauna davana ba henia. Dina haida ia na se kamonai; gabeamo sibona lalona e hadaia, eto, Lau na Dirava garina asina garimu bona taunimanima asina matauraidiamu, ḡau tamona ina vabu ese e haturiagumu dainai ena hahemaoro na baina karaia, baine loulou henigu baine hahekwarahigu na garina.

Lohiabada eto, Una hahemaoro tauna dikana ena hereva ba haeroa. Benaini, Dirava ese e abidia hidi taudia, e tai henia boi tai henia rani taudia, inaidia davadia basine henidia a? Ena be e kara e halahemu na helu, to, na hamaoromuimu, davadia do baine henidia haraḡa. Ḡau tamona, Taunimanima Natuna bainema negana ai abidadama tanobada ai baine davaria eiava?

Sivarai heḡereḡerena: Farisea tauna bona tax gogo tauna

Idia sibodia edia kara maoromaoro e abiabirai bona idau taudia e dadaraidia taudia na ina sivarai heḡereḡerena e henidia. 10 Tatau rarua Dubu Helaḡa ai e raka vareai, ḡuriḡuri totona; ta be Farisea tauna, ma ta taona gogo tauna. 11 Farisea tauna e gini edea, e guriḡuri, eto, Dirava e, lau ese na hanamomumu, badina be lau na dia haida heḡereḡeredia, dadidadi taudia, kara gageva-gageva taudia, heuda-hanai taudia; oibe, lau na dia ina tax gogo tauna bamona. 12 Lau na pura ta lalonai harua na anivagamu; na davaridia kohudia idoidiai karoadia na ha-gwautamu, karoa ta herahia ḡauna ai na halaoamu. 13 A tax gogo tauna na dauhai e gini, matana e igo diho, kemena e pataia, eto, Dirava e, lau na dika taugu, ame bogagu hisi. 14 Lau na hamaoromuimu, una tau na ena ruma e lou henia mai lalo ḡoevana ida; a hari Farisea tauna be lasi. Badina be sibona e heimodai tauna na baine baia, a sibona e hahemanau tauna na bae imodaia.

Iesu ese maraḡidia e hanamodia

15 Haida ese natudia karukarudia ia dekena e laohaidia, ediai baine dau kau eto; to hahediba ese e itadia, bena e gwaudia tubu. 16 A Iesu ese e boiridia, eto, Memero-memero na dekegu aema, asio luludia; badina be enehetomadia na Dirava ena basileia taudia. 17 Na hamaoromui momokanimu, ta ese Dirava ena basileia basine abia mero-mero na heto, ia na basine raka vareai unuseni ai.

Mauri herevadia

18 Lohia ta ese e nanadaia, eto, Hahediba taumu namona e, lau na mauri hanaihanai iabina be ede baina kara toma? 19 Iesu eto, Dahaka dainai namogu o gwauraigumu? Ta dia namo, Dirava mo sibona. 20 Taravatu vada dibamu: Basio heuda hanai; Basio ala-ala; Basio henao; Basio hahebade koikoi; Tamamu sinamu ba matauraidia. 21 Ia eto, Ene iboudiai vada na badinadia, maraḡigu negana amo. 22 Iesu una hereva e kamonai, bena e hamaoroa, eto, Oi na ḡau tamona mo o dabumu: emu kohu iboudiai ba ha hoi, ogoḡami taudia ba harihari henidia, guba kohuna bavabia; bena baoma, murigu ai bame raka. 23 Ia ese una hereva e kamonai, bena lalona e hisihisi bada, badina be ia na taḡa tauna.

24 Iesu ese e raraia, eto, Taḡa taudia na Dirava ena basileia iduarana ai bae heloge. 25 Kamelo na kobi matuna ai e vareaimu be haraḡa, a taḡa tauna na Dirava ena basileia lalonai baine vareai mai hekwarahina ida. 26 E kamonai taudia eto, Be, daika mauri baine davaria? 27 A ia eto, Taunimanima ese ikaradia asi dibadia ḡaudia na Dirava ese baine karadia diba.

28 Petro eto, Ai na emai ḡau iboudiai vada a rakatani, oi vada a ḡavamu. 29 Ia ese e hamaorodia, eto, Na hamaoromui momokanimu, ta ese ruma eiava adavana eiava tadikakana eiava tamana eiava sinana eiava natuna Dirava ena basileia dainai vada e rakatani, 30 ia na ina negana ai ḡau momo be abimu, bona nega gabena ai danu mauri hanaihanai baine abia.

Iesu ese ena mase bona ena tore-isi-lou e gwaurai guna

31 Ia ese gwauta-raruosi e hakaudia siri, e hamaorodia, eto, Ita na Ierusalem ta dara daemu, unuseni ai peroveta taudia ese Taunimanima Natuna sivaraina e tore guna herevadia na iboudiai anidia do bae vara. 32 Badina be ia na idau bese taudia ediai taona do bae torea; bae ḡonaḡonalaia; bae ihi-ihiraia; bae kanudia; 33 bae dadabaia; bae alaia mase; a dina ihatoina ai ma baine tore isi lou.

34 Ina idoinai na asi dibadia. Hereva e kamonai, to lalodia na asie parara; ia ese e gwaurai herevadia anidia na asie davari.

Iesu ese mata-kepulu tauna e hamauria

35 Ia na Ieriko e raka henia kahi. Mata-kepulu tauna ta dala isena ai helaina ai e noi hegameva; 36 hutuma dala amo e laova reḡedia e kamonai, bena e henanadai, reḡe anina be dahaka? 37 Idia ese e hamaoroa, eto, Iesu, Nasaret tauna, e raka hanaimu. 38 Bena ia na e boiboi, eto, Iesu, David natuna e, ame bogagu hisi. 39 Vairai e raka taudia ese e gwau henia, basine hereva eto; to ia na e boi lalo-dika, eto, David natuna e, ame bogagu hisi. 40 Bena Iesu vada e gini, eto, A hakaua mai. E raka kahi lao, bena Iesu ese e nanadaia, eto, 41 Dahaka emu ai baina kara? Ia eto, Lohiabada e, matagu boma hapapa. 42 Iesu eto, Matamu be papamu; emu abidadama ese vada e hamaurimu. 43 Matana vada e papa, bena Iesu murinai e raka, Dirava e imodaia. Una kara e itaia taudia iboudiai ese Dirava e hanamoa.

Copyright information for `MEU