Luke 2

Iesu e vara

Unu dinadia ai Kaisara Augusto ese ena haheḡani herevana ta e siaia lao, tanobada taudia iboudiai ladadia bae tore: lada itoredia gini-gunana binai, Kurenio ese Suria e lohiaia negana ai. Taunabunai, taunimanima iboudiai ese ladadia itoredia totona ena hanua ena hanua e lou heni.

Iosef danu Nasaret, Galilea kahana hanuana ta, amo ela, David ena hanua ladana Betelehem, Iudea kahana ai, e lasi, badina be ia na David ena iduhu tauna; unuseni ai ladana baine torea. Ia maohenina danu, Maria, ia ida ela; ia na vada e rogorogo. Bena raruosi unuseni ai e nohova ai na ena mara dinana e kau. Ia na e mara, mero roboana e abia, dabua amo e tarua, bena boromakau edia aniani patana ai e kurea, badina be henitao rumana lalonai asi gabuna.

Mamoe ireḡudia taudia haida vahu ai e nohova, hanuaboi ai edia seri e gimadiava. Bena Lohiabada ena aneru ta ela, dekedekediai e gini, bona Lohiabada diaridiarina ese e hadiaridia heḡeḡe; bena gari bada ese e butudia tao. 10 To aneru ese e hamaorodia, eto, Asio gari; hereva namona lau ese vada na mailaia, taunimanima iboudiai ihamoaledia. 11 Badina be ina harihari, David ena hanua ai, emui Hahemauri Tauna vada e vara, Keriso Lohiabada bunai. 12 Toana binai: mero karukaruna ba ha davaria, boromakau edia ruma patana ai hekure, dabua ai e tarua. 13 Bena guba anerudia hutuma bada hari aneru ida e hedinarai taku, Dirava e hanamoa, eto,

14 Atai doriva-dorivana ai Dirava bae imodaia,
Bona tanobada ai na maino, ena lalo-namo taudia ese bae abia.
15 Aneru loḡora ese e rakatanidia, guba e lou henia, muridiai mamoe ireḡudia taudia e hereva heheni, eto, Ita na Betelehem aitala, Lohiabada ese vada e hadibada ḡauna baita itaia. 16 Bena e raka haraḡa, ela, Maria bona Iosef e davaridia, bona mero karukaruna, boromakau edia aniani patana ai hekure. 17 Mero e itaia, bena e kamonai herevana e gwauraia hedinarai. 18 Bena e kamonai taudia iboudiai ese mamoe ireḡudia taudia edia hereva e hoalaia. 19 A Maria na unu hereva iboudiai e haero bona e lalo tao.

20 Bena mamoe ireḡudia taudia e lou, Dirava e heatolaia, e imodaia, badina be e kamonai bona e ita ḡaudia na vada e hadibadia heḡereḡerena.

21 Dina ihataurahanina ai, mero iperitomena negana ai, idia ese ladana e hatoa IESU, sinana do se rurua negana ai aneru ese e hatoa ladana.

Iesu Ierusalem e laohaia

22 Idia ihaḡoevadia dinadia, Mose ena taravatu heḡereḡerena, e ore, bena idia ese Ierusalem e laohaia, Lohiabada vairanai bae hahedinaraia totona; 23 Lohiabada ena taravatu ai e torea heḡereḡerena, eto, Roboa mamaruanedia iboudiai na hehelaḡa, Lohiabada ena. 24 Bona boubou ḡauna bae henia eto, Lohiabada ena taravatu heḡereḡerena, kerea rua eiava pune natuna rua.

25 Tau ta Ierusalem ai, ladana na Simeon; ia na kara maoromaoro tauna bona Dirava garina e gariva tauna; ia ese Israel edia tauhalo tauna e nariava, bona Lauma Helaḡa ese e rohea. 26 Lauma Helaḡa ese danu e hamaoroa, ia na basine mase ela bona Lohiabada ena Keriso do baine itaia. 27 Lauma ese Dubu Helaḡa lalonai e hakaua vareai, bena mero maraḡina Iesu na tamana sinana ese e rakalaia vareai, taravatu karana ibadinana totona. 28 Bena ia ese e abia, e rosia, Dirava e hanamoa, eto,

29 Lohiabada e, emu hesiai tauna harihari ome kahugu nege,
Mai mainogu ida bainala, emu gwau-hamata heḡereḡerena;
30 Badina be matagu ese emu Hahemauri vada eme itaia,
31 Oi ese vada o seua taunimanima iboudiai vairadiai.
32 Diari na binai, bese idauidau ihadiarilaidia.
Bona oiemu bese Israel iheatolaidia.
33 Mero tamana sinana ese unu hereva e kamonai, e hoa. 34 Bena Simeon ese raruosi e hanamodia; bona sinana Maria e hamaoroa, eto, Ina mero na Israel taudia hutuma ihaketodia bona ihatore-isidia ai bainela; bona ia na toa ta taunimanima ese bae gwaua heiri. 35 Hutuma edia lalo-hadai hehunidia bae hedinarai; a oi lalomu dare ese baine daia uru.

36 Peroveta hahinena ta danu, ladana na Ana, Fanuel natuna, Asere ena iduhu hahinena: ia na hane badana, e headava, laḡani hitu adavana ida e noho bou, 37 murinai laḡani taurahaniahui hani vabuna ai e nohova. Ia ese Dubu Helaḡa se rakataniava, Dirava e toma henia dihova, e ḡuriḡuriva, e anivagava. 38 Una hora ai ia danu e kau, bena Dirava e hanamoa, bona Israel ihamaurina e nariava taudia Ierusalem ai mero herevana e hamaorolaidia.

Iesu Nasaret ai e bada oho bada oho

39 Lohiabada ena taravatu karadia iboudiai raruosi ese e haḡuḡuru vaitani, bena Galilea e lou henia, edia hanua korikori Nasaret ela. 40 Bena mero na e bada, mai goadana bona mai aonegana ida, bona Dirava ena hariharibada na ia latanai.

Mero Iesu na Ierusalem ela

41 Laḡani iboudiai tamana bona sinana Ierusalem e laova, Lagau-hanai Ariana negadia. 42 Bena Iesu laḡanina ihagwauta-ruana ai, tatoiosi na una Aria ikarana totona Ierusalem ma e dara dae. 43 Aria dinadia e ore, bena idia vada e lou, to Iesu na Ierusalem ai e noho. Tamana sinana na asi dibadia; 44 idia banava ia na laolao taudia bogaragidiai eto. Bena dina ta e raka, murinai varavaradia bona turadia dekediai e tahua. 45 Asie davaria, taunabunai Ierusalem e lou henia, ma e tahua. 46 Dina ihatoina ai, idia ese Dubu Helaḡa lalonai e davaria, hahediba taudia bogaragidiai e helai, edia hereva e kamonai bona e nanadaidia danu; 47 erena e kamonai taudia iboudiai na ena lalo-parara bona ena haere e hoalai. 48 Raruosi e itaia, e hoa, bena sinana ese e hereva henia, eto, Natugu e, dahaka dainai ini o karamai toma? Lau tamamu ida vada a tahumu lai tahumu taimu. 49 A ia eto, Dahaka dainai o tahugu? Asi dibamui Tamagu ena ruma be egu noho rumana? 50 Ena hereva e kamonai, to lalodia asie parara.

51 Ia na idia ida Nasaret ela, bona e kamonai henidia; a sinana ese ini hereva iboudiai e lalo tao. 52 Bena Iesu e bada-oho bada oho mai aonegana ida; Dirava bona taunimanima ese e ura heniava.

Copyright information for `MEU