Luke 5

Iesu ese ena hahediba e boiridia

Dina ta ia na Cenesaret gohuna konena ai e gini, hutuma danu e gini hesede-hesede, Dirava ena hereva ikamonaina. Ia na vanaḡi aurua e itadia, kone badinai e hetu; vanaḡi taudia na kone ai edia ole e kwadava. Bena ia na Simona ena vanaḡi ai e ḡui; bena e hamaoroa, taina bae doaia dae lao. Bena vanaḡi ai e helai diho, hutuma e hadibadia.

Ena hereva e hadoko, bena ia ese Simona e hamaoroa, eto, Dobuna aitala, emui ole ba torea, gwarume bavala. A Simona e haere, eto, Biagugu e, ai na vada ame hekwarahi rani, vada a bone, to emu hereva dainai ole na baina torea. Bena e torea, gwarume diaḡau e kou, edia ole mokona e hedare. Bena e hekalo, bamodia vanaḡi auta ai idurudia baema. Idia ema, bena vanaḡi ruaosi e honu, mokona e mutu.

Simona Petro ese una kara e itaia, bena Iesu tuina badinai e igo diho, eto, Lohiabada e, egu amo ba raka oho, badina be lau na dika taugu. Badina be ia mai bamona iboudiai ida e hoa dikadika, unu gwarume e ala dainai. 10 Simona ida e haoda hebouva taudia danu, Iakobo bona loane, Sebedeo natuna, e hoa. Bena Iesu ese Simona e hamaoroa, eto, Basio gari; ini amo ba haoda, taunimanima bavabidia. 11 Vanaḡi auruaosi na kone badinai e tudia, bena ḡau iboudiai e rakatani, ia murinai e raka.

Iesu ese lepra tauna e hamauria

12 Ia na hanua ta lalonai, bena tau ta, kopina idoinai lepra mo, ese Iesu e itaia; bena vairanai e goru diho, e noia eto, Lohiabada e, boma ura, boma haḡoevagu. 13 Iesu ese imana e toia roro, e daua toho, eto, Na uramu, vada a ḡoeva. Bena lepra tauna vada e ḡoeva. 14 Bena e taravaia, tau ta basine hamaoroa. Ma eto, Aola, hahelaḡa tauna baine itamu, bona haheḡoeva ḡauna, Mose ese e gwauraia heḡereḡerena, ba henia, taunimanima ihadibalaidia. 15 To ia ese harina e piua rohoroho; bena hutuma bada e hebou, iena hereva ikamonaidia bona edia gorere ihanamodia totona. 16 A ia na e raka oho, tano ḡaḡaena ai eha ḡuriḡuri.

Iesu ese pada tauna e hamauria

17 Dina ta ai, ia na e hahedibava; bona Farisea taudia bona taravatu ihadibalaidia taudia, Galilea hanuadia iboudiai amo bona Iudea amo bona Ierusalem amo, ia dekenai e helai. Bena ia ese Lohiabada siahuna ai gorere taudia e hamauridia. 18 Bena haida ese pada tauna geda ai hekurena ai e huaia lao, ivareailaina dalana e tahua, Iesu vairanai bae atoa eto. 19 A hutuma daidiai ivareailaina dalana ta asie davaria, bena pada tauna mai gedana ida e daelaia, guhi matuna amo e tua dobi Iesu vairanai, hutuma bogaragidiai. 20 Ia ese edia abidadama e itaia, bena eto, Tau e, emu dika vada eme hegwau tao.

21 Itorena taudia bona Farisea taudia e hereva heheni, eto, Ina Dirava e hadikaiamu tauna be daika? Daika dika igwau-taodia mai dibana? Dirava mo sibona. 22 A Iesu na edia lalo-hadai dibana, bena eto, Badina be dahaka lalomui ene o hadai tomamu? 23 Edena be haraga, nato “Emu dika vada eme hegwau tao”, eiava bama toma “A tore isi, a raka”? 24 A baina hadibamui Taunimanima Natuna na mai siahuna dika baine gwau tao tanobada ai, (ia ese pada tauna e hamaoroa, eto) Na haḡanimumu, a tore isi, emu geda a lokua, emu ruma aola. 25 Bena ia na idia vairadiai e tore isi, ena geda e lokua, ena ruma vada ela, Dirava e imodaia. 26 Bena iboudiai e hoa, Dirava e heatolaia mai garidia ida, eto, Hoa karadia hari dina ai tame ita.

Iesu ese tax tauna e boiria

27 Ia na e raka lasi, bena tax gogo tauna ta, ladana Levi, tax rumana ai helaina ai e itaia; bena e boiria, eto, Murigu ai ame raka. 28 Bena ena ḡau iboudiai e rakatani, ia murinai e raka.

29 Bena Levi ese Iesu irogonina anianina ena ruma ai e dabaraia; tax gogo taudia hutuma mai bamodia ida idia ida e ege diho. 30 Bena Farisea taudia bona itorena taudia ese e maumauraidia, ena hahediba e nanadaidia, eto, Dahaka dainai tax gogo taudia bona kara dika taudia ida o aniani heboumu? 31 Iesu ese e haere henidia, eto, Goada taudia na muramura tauna basie tahua, a gorere taudia hari; 32 lau danu dia kara maoromaoro taudia iboiridia asinama, a kara dika taudia bae helalo kerehai totona nama.

33 Idia ma eto, Badina be dahaka Ioane ena hahediba e anivaga louloumu, bona e ḡuriḡuri louloumu, bona Farisea taudia edia hahediba danu, a oiemu hahediba e anianimu bona e inuinumu. 34 Bena ia ese e haere henidia, eto, Headava matamata tauna na turana dekediai e nohomu ai na ba haduadia bae anivaga, bae kamonai eiava? 35 A negana baine gini dae, headava matamata tauna na edia amo baine heabi oho, una negana ai bae anivaga.

36 Ina hereva heḡereḡerena danu e henidia, eto, Tau ta ese dabua matamatana seana basine darea, dabua gunana ibanilaina; unu bema kara toma, matamatana bema hedare, bona matamatana seana gunana ida basiema heḡereḡere. 37 Bona tau ta ese vine ranuna matamata na kopi gunadia ai basine vedaia; unu bema kara toma, vine ranuna matamata ese kopi bema hapou, bena vine ranuna bema hebubu nege bona kopi danu bema dika. 38 A vine ranuna matamata na kopi matamatadia ai bae vedaia, bena ruaosi bae namo. 39 A vine ranuna gunana e inuamu tauna ese matamatana basine ura henia; badina be ia baineto “Gunana be namo herea”.

Copyright information for `MEU