Luke 7

Tuari biaguna ena mero

Ena hereva iboudiai taunimanima vairadiai e gwaurai vaitani, bena Kaperanaum ai e raka vareai. Tuari biaguna ta ese ena hesiai merona e lalokau henia. Mero na e gorere dikadika, mokona e mase. Hari tau ese Iesu harina e kamonai, bena Iuda tau-badadia haida e siaidia lao, bae noia, hari hesiai merona na baine hamauria. Bena idia na Iesu dekena ela, e noia lalo-dika, eto, Ia na tau namona, ini boma karaia toma bema namo; badina be ia ese ita beseda e ura henidamu, bona emai dubu ia sibona ese davana e karaia.

Taunabunai, Iesu na idia ida ela. A ruma na e raka henia kahi negana ai na hari tuari biaguna ese turana haida ma e siaidia, Iesu vairana ela, eto, Lohiabada e, asio hekwarahi; lau na dia namo egu ruma ai ba dae kau, una dainai baina vasi danu dia heḡereḡere nato. A mani a hereva mo, bena egu hesiai merona na aine mauri. Badina be lau danu haida henudiai, bona tuari taudiana lau henugu ai: ta baina hamaoroa “Aola”, bena bainela; ma ta haina hamaoroa “Aoma”, bena bainema; ma egu hesiai merona baina hamaoroa “Ina na a karaia”, bena baine karaia. Iesu ese una hereva e kamonai, e hoa dikadika, e gini kerehai, ia murinai e raka taudia hutuma e hamaorodia, eto, Na hamaoromuimu, abidadama inihetomana Israel ai asina davaria, lasi ona lasi vaitani. 10 Bena tuari biaguna ese e siaidia taudia na e lou ruma ai, gorere merona e davaria, vada e mauri.

Iesu ese mase tauna e hatorea isi

11 Daba ai, Iesu na hanua ta ela, ladana na Nain; ena hahediba bona taunimanima hutuma danu ia ida ela. 12 Hanua ikoukouna e raka kahi laova ai, haida ese mase taunal ta e huaia lasi, vabu ta natuna vara-edeana. Hanua taudia hutuma ese hari vabu e bamoa. 13 Lohiabada ese e itaia, bena e bogaia hisi, e hereva henia, eto, Asio tai. 14 Bena e raka kahi lao, mase patana ai e dau kau; bena e huaia taudia na e gini. Bena e hereva, eto, Tauhau e, na haḡanimumu, a tore isi. 15 Bena mase tauna e helai tore, e hereva; bena Iesu ese sinana e henia. 16 Gari ese iboudiai e butudia tao, bena Dirava e imodaia, eto, Peroveta tauna badana ta bogaragidai vada eme hedinarai. Ma eto, Dirava ese ena bese taudia vada eme igoda ita. 17 Bena una kara sivaraina na Iudea idoinai bona badina tanodia idoidiai eha piua rohoroho.

Ioane Bapatiso e daradara

18 Ioane ena hahediba ese ini hereva iboudiai ia e hamaorolaia. 19 Bena Ioane ese ena hahediha rarua e boiridia, e siaidia, Lohiabada bae nanadaia, baeto “Be maimu tauna na oi, eiava idauna ta baita naria?” 20 Raruosi na ia dekenai e kau, eto, Ai na Ioane Bapatiso ese e siaimai, e tomu “Be maimu tauna na oi, eiava idauna ta baita naria?”

21 Una negana ai Iesu ese hutuma e hamauridiava: gorere taudia, hisi-ani taudia, lauma dikadia ese e bolodia taudia. Bona mata-kepulu taudia hutuma danu matadia e hapapa. 22 Bena ia ese hari raruosi e haere henidia, eto, Vada aola, ome ita ome kamonai karadia Ioane ba hamaorolaia: matakepulu taudia matadia e papamu: ae-hedairike taudia e raka namonamomu, lepra taudia e ḡoevaḡoevamu, taia-kudima taudia e kamonaimu, mase taudia e tore isimu, bona ogoḡami taudia sivarai namo e kamonaiamu. 23 Hekwakwanai badina egu ai basine davaria tauna hari namo.

Iesu ese Ioane e heatolaia

24 Ioane ena hesiai taudia e raka oho, bena Iesu ese aru taudia e hereva henidia matama, Ioane herevana e gwauraia, eto, Umui na dahaka itana tano ḡaḡaena ola? Siriho lai ese e haevaia a? 25 A dahaka itana ola? Dabua manada-manadana e dokilaia tauna a? Dabua mai hairaidia e dokilaimu bona aniani namodia e animu taudia na pavapava edia ruma ai e nohomu. 26 A dahaka itana ola? Peroveta tauna a? Oibe, na hamaoromuimu, peroveta taudia loḡora iboudiai ia ese e hereadiamu. 27 Ia bunai herevana e torelaia, eto,

A itaia, lau ese egu gwaukau tauna oi vairamu ai name siaia,
Emu dala ilailaina.
28 Na hamaoromuimu, hahine bogadia ai e vara taudia iboudiai na ta ese Ioane se hereaiamu; a Dirava ena basileia lalonai gabe tauna ese Ioane e hereaiamu.

29 Taunimanima iboudiai bona tax gogo taudia danu una hereva e kamonai ai, idia ese Dirava e imodaia, badina be Ioane ese e bapatisodia. 30 A Farisea taudia bona taravatu taudia ese ena bapatiso e dadaraia; unu amo Dirava ena lalo-iladai e lao ahu.

31 Iesu ma eto, Ina uru taudia be dahaka ida baina haheḡereḡeredia? 32 Idia na edeheto? Idia na memero-memero na heheto, hanua ariarana ai hehelai, bamodia e boi henidiamu, e tomu,

Ai be ivilikou a hatai, to umui asio mavaru;
Ai be a rohe ahu, to umui asio taitai.
33 Badina be Ioane Bapatiso ema, se anianiva, vine ranuna se inuva, bena umui oto “Ia na mai lauma-dikana”. 34 A Taunimanima Natuna ema, e anianimu, e inuinumu, bena umui o tomu “Ina na ani-dae ani-dae tauna bona vine ranuna e inua momomu tauna, tax gogo taudia bona kara dika taudia turadia”. 35 A aonega ihamomokanina na natuna edia amo e hedinaraimu.

Hahine ta ese Iesu e horoa

36 Farisea tauna ta ese Iesu e vavea, bae aniani hebou eto. Bena ia ese hari Farisea tauna ena ruma ai e raka vareai, aniani gabuna ai e ege diho.

37 Una hanua hahinena ta, ariara hahinena, dibana Iesu na Farisea tauna ena ruma ai e ege diho, bena nadi kavabuna ta e abia kau, lalonai na dehoro namo-hereana. 38 Ela, Iesu murinai e gini, aena badibadidiai e tai, bona iruru-matana amo aena e haparipari, bena huina amo e dahu kaukau. Bena aena e harahu, bona dehoro amo e dairi.

39 Farisea tauna, hari e vavea tauna, ese una kara e itaia, bena lalona e hadaia, eto, Ina tau bema peroveta tauna, ia na bema diba ina ienai e dau kau hahinena na ariara hahinena.

40 Bena Iesu ese e hereva henia, eto, Simona e, lau na mai egu hereva taina. Ia eto, Hahediba taumu e, mani a hereva. 41 Iesu eto, Tau ta mai ena ima doa taudia rarua: ta ena abitorehai na dollar imahui, ma ta ena be dollar ima. 42 Asi edia ḡau, edia abi-torehai davadia ihaloudia; bena ia ese raruosi edia abi-torehai e gwau tao. Idia raruosi daika ese baine lalokau henia bada? 43 Simona e haere, eto, Reana ena abi-torehai badana e gwaua tao tauna. Iesu eto, Oibe, momokani. 44 Ia ese hari hahine e haḡerea, bena Simona e gwau henia, eto, Ina hahine o itaiamu a? Lau na emu ruma ai name dae kau, aegu ihurilaina ranuna so mailaia; a ia ese iruru-matana amo aegu eme haparipari bona huina amo eme dahu kaukau. 45 Oi ese so harahugu; a ia ese dae-kaugu ai ema hari aegu eme harahu. 46 Oi ese kwaragu so horoa; a ia ese aegu dehoro amo eme dairi. 47 Taunabunai, na hamaoromumu, ena dika, ena be babada, to vada eme hegwautao, badina be ena lalokau na bada. A ena dika maraḡina mo e hegwau tao tauna na ena lalokau danu maraḡi. 48 Bena ia ese hari hahine e hamaoroa, eto, Emu dika vada eme hegwau tao.

49 Ia ida e ege diho hebou, taudia na e henanadai heheni, eto, Ina na daika, dika e gwau taomu? 50 A ia ese hahine ma e hamaoroa, eto, Emu abidadama ese vada e hamaurimu; mai mainomu ida aola.

Copyright information for `MEU