Mark 6

Iesu Nasaret ela

Unu amo e tore isi, ena hahediba ida ena hanua korikori ela. Dina Helaḡa ai ia ese dubu ai ma e hadibadia matama; bena e kamonai taudia iboudiai e hoa, eto, Ina tau na ini ḡau ede amo e abi? Ena aonega danu daika ese e henia? Bona ini siahu karadia ia imana amo e karamu na edeheto? Ia na dia kamuta tauna natuna a? Ia na dia Maria natuna, lakobo bona losef bona Iuda bona Simona kakadia a? Ia taihuna danu padadai dia nonoho a? Bena lalodia na e hekwakwanai ia dainai.

Bena Iesu eto, Peroveta tauna na bae matauraia, a ena hanua korikori ai bona varavarana bogaragidiai bona ena ruma ai mo basie matauraia. Unuseni ai kara siahudia ikaradia na asi dibana; gorere taudia ta ta mo e daudia toho, e hamauridia. Ia na e hoa bada, badina be idia na asi edia abidadama. Gabeamo ia ese hanua maraḡidia ai e loaloava, e hahedibava.

Iesu ese ena aposetolo e siaidia

Bena ia ese gwauta-rarua taudia e boiridia, rarua rarua arno e siaidia; bona siahu e henidia, lauma dikadia bae luludia lasi. Bona e tamanudia, laolao kohudia haida basie abi kau: itotohi mo bae abi, a moda bona aniani bona moni vainana basie abi kau; tamaka bae abi, a hahedoki rua basie hahedoki eto. 10 E hamaorodia, eto, Ba dae kau rumana ba noho henia, ela bona una hanua ba rakatania. 11 A gabu ta ai basie abimui dae bona eremui basie kamonai, ba rakatania negana ai na aemui ḡahudia bavatu-atuoho, idia ihahebadelaidia.

12 Bena idia na vada ela, e harorova, taunimanima ihahelalokerehaidia; 13 Bona lauma dikadia diaḡau e luludia lasi; gorere taudia hutuma danu dehoro e dahulaidia, e hamauridia.

Ioane Bapatiso e mase

14 Herod Ḡaubada ese ini hereva e kamonai, badina be Iesu ladana e perea rohorohova. Haida eto, Ioane Bapatiso mase amo vada e tore isi, taunabunai ini siahu karadia e karamu. 15 Ma haida eto, Ina na Elia. Ma haida eto, Ina na peroveta tauna ta, peroveta gunadia heḡereḡeredia. 16 A Herod na e kamonai, bena ia eto, Hari Ioane, kwarana na utua oho tauna, na mase amo vada e tore isi reana.

17 Badina be Herod na vada e hesiai, Ioane e dabaia tao, dibura rumana ai e koua, e tahahaia hahinena Herodia, ia kakana Filipo adavana, dainai. 18 Badina be Ioane ese Herod vada e hamaoroa, eto, Oi ese kakamu adavana o tahahaia na o kereremu. 19 Taunabunai, Herodia ese e badu heniava, ia ialana urana e urava; to asi ena dala. 20 Badina be Herod ese Ioane magigina e magigiva, dibana ia na kara maoromaoro bona helaḡa tauna, una dainai ia ese e naria namonamova. Bona erena e kamonaiva negadia ai na lalona e hekwarahiva, to e kamonai henia loulouva mai moalena ida.

21 Herod ena vara dinana ilalolaina ariana badana ta e karaia; hanua lohiadia bona tuari biagudia bona Galilea tau-badadia e vavedia. 22 Herodianatuna haneulatona ese idia vairadiai e mavaru; bena Herod mai ena vadivadi iboudiai e moale bada, bona Ḡaubada ese haneulato e hamaoroa, eto, Emu ura ḡauna ba gwauraia be baina henimu. 23 Mai gwauhamata hereva metauna ida e hereva henia, eto, Emu ura ḡauna, ena be egu basileia kahana, to baina henimu. 24 Bena haneulato na e raka lasi, sinana e nanadaia, eto, Dahaka baina gwauraia? Ia na e haere, eto, Ioane Bapatiso kwarana. 25 Bena haneulato na e heau vareai, Ḡaubada e hamaoroa, eto, Lau na uramu Ioane Bapatiso kwarana harihari a henigu dihu ai. 26 Bena Ḡaubada lalona e hisihisi, to ena gwauhamata dainai, bona ena vadivadi hehelai daidiai, ena hereva ihalouna na asi dalana. 27 Taunabunai, Ḡaubada ese ena tuari tauna ta e siaia, e haḡania, kwara na baine mailaia. Bena ia na ela, Ioane kwarana dibura rumana ai e utua oho. 28 Kwarana na dihu ai e udaia, e laohaia, haneulato e henia; bena haneulato ese sinana e henia. 29 Ena hahediba e kamonai, bena idia na ela, tau-anina eha abia, vada eha ḡuria.

Aposetolo ma e lou

30 Aposetolo taudia na Iesu dekenai ma e hebou lou, edia kara iboudiai bona edia hahediba herevadia idoidiai e hamaoroa. 31 Bena ia ese e hamaorodia, eto, Gabu ḡaḡaena ta aitala, laḡada baita ani. Badina be hutuma ini e laova unu e maiva, taunabunai asi edia nega bae aniani. 32 Bena vanaḡi ai e gui, e heau hehuni, gabu ḡaḡaena ta ela. 33 A haida ese e laova ai e itadia, bena hutuma na hanua iboudiai amo tano ai e heau bou heau bou ela, una gabu eha guna henia. 34 Dihona ai Iesu ese hutuma bada e itadia, bona e bogadia hisi, e kara mamoe asi ireḡudia na heheto. Bena e hadibadia.

Iesu ese taunimanima 5000 e ubudia

35 Adorahi ai, ena hahediba ia dekena ela, eto, Ina na gabu ḡaḡaena, bona dina be dihomu; 36 boma siaidia, uma gabudia ai bona hanua lalodiai adia bema ha hoi. 37 A ia ese e haere henidia, eto, Umui ese adia ba henidia. Idia eto, Be, ai nadollar ruahui davana anianidia na baia ha hoi baia henidia a? 38 Ia eto, Emui aniani ḡaudia be hida? Aola, a itaia. Eha itaia, bena e hamaoroa, eto, Ima, bona gwarume rua. 39 Ia ese e haduadia, taunimanima iboudiai na masia ai bae helai helai diho. 40 Taunabunai, idia na sinahu sinahu amo bona imahui imahui amo e helai ere-ere. 41 Bena ia ese aniani ḡaudia imaosi bona gwarume ruaosi a abi, guba ai e gaga dae, e hanamoa; bena aniani e baki sisi, ena hahediba e henidia, bae heni hagauhagau; gwarume ruaosi danu unu e kara toma. 42 Iboudiai e aniani, bogadia e kunu. 43 Bena aniani bona gwarume bahudia e habou, bosea gwauta-rua e hahonu. 44 Aniani e ani taudia na daha-ima reana.

Iesu gohu kopina ai e raka

45 Unu amo ia ese ena hahediba e haduadia, vanaḡi ai bae gui, bae guna, Betesaida baela. A ia be aru taudia baine siaidia karoho eto. 46 E hatonidia, bena ororo ai e dara dae, ḡuriḡuri totona.

47 Mairumairu ai, vanaḡi na gohu bogaraginai, a ia sibona tano ai. 48 Ia ese e itadia, lai vairadia amo ema, e baraia hekwarahiva. Bena kokoroku e tai, ia ese e lao henidia, gohu kopina amo e raka ela, e kara vanaḡi baine rakaia hanai na heto. 49 Bena idia ese gohu kopina ai rakana ai e itaia, idia banava laulau ta eto, bena e lolo dagu; 50 badina be iboudiai ese e itaia, bona kudoudia e hetaha. A ia ese e hereva henidia, eto, A boga auka, ina na lau, asio gari. 51 Vanaḡi ai e dae, bena lai e doko. Idia na laumadia e daure, 52 badina be una anibou anina do asie laloa davari, lalodia na duduhu dainai.

Genesaret ai

53 Idia na e heau hanai, Genesaret konena ai e toa. 54 Bena dihodia ai taunimanima vada dibadia Iesu. 55 Bena idia ese una tano idoinai goreredia na e huadia lao, Iesu ena noho gabuna e laohaidia. 56 Bona e loa henidia gabudia iboudiai, hanua maraḡidia ai bona hanua badadia ai bona uma gabudia ai, idia ese gorere taudia ariara ai bona dala ai e atodia; bena e noia, ena dabua isena ai mo bema dau kau. Bena e dau kau taudia na vada e namo.

Copyright information for `MEU