Matthew 11

Iesu ese ena hahediba gwauta-raruosi e haḡanidia vaitani, bena una gabu amo e raka oho, edia hanua lalodiai baine hahediba bona baine haroro totona.

Iesu ese Ioane Bapatiso e heatolaia

Ioane ese dibura rumana ai Keriso ena kara haridia e kamonai, bena ena hahediba rarua ia dekena e siaidia. Idia ese e nanadaia, eto, Be maimu tauna na oi, eiava idauna ta baita naria? Bena Iesu ese e haere henidia, eto, Vada aola, ome kamonai ome ita karadia na Ioane ba hamaorolaia: mata-kepulu taudia matadia e papamu, ae-hedairike taudia e raka namonamomu, lepra taudia e goevaḡoevamu, taia-kudima taudia e kamonaimu, mase taudia e tore isimu, bona sivarai namona na ogoḡami taudia e harorolai henidiamu. Hekwakwanai badina egu ai basine davaria tauna hari namo.

Raruosi e raka oho ai, Iesu ese aru taudia e hereva henidia matama, Ioane herevana e gwauraia, eto, Umui na dahaka itana tano ḡaḡaena ola? Siriho lai ese e haevaia a? A dahaka itana ola? Dabua manada-manadana e dokilaia tauna a? Dabua manada-manadadia e dokilaimu taudia na pavapava edia numa lalodiai e nohomu. A dahaka itana ola? Peroveta tauna a? Oibe, na hamaoromuimu, peroveta taudia loḡora iboudiai ia ese e hereadiamu. 10 Ia bunai herevana e torelaia, eto,

A itaia, lau ese egu gwaukau tauna
Oi vairamu ai name siaia,
Emu dala ilailaina.
11 Na hamaoromui momokanimu, hahine bogadia ai e vara taudia iboudiai na Ia ese Ioane se hereaiamu, a guba basileiana lalonai gabe tauna ese Ioane e hereaiamu. 12 Ioane Bapatiso negana ema bona harihari guba basileiana vada e dadia, bona dadidadi taudia ese vada e dabaia tao. 13 Badina be peroveta iboudiai bona taravatu e hahedibava ema bona Ioane. 14 Lalomui bema heḡereḡere, ina hereva boma abia dae: ina na Elia, maina e gwauraiava tauna. 15 Mai taiana tauna na baine hakala.

16 Ina uru taudia na daidia ida baina haheḡereḡeredia? Idia na memero-memero na heheto, hanua ariaradia ai hehelai, bamodia e boi henidiamu, 17 e tomu,

“Ai be ivilikou a hatai, to umui na asio mavaru;
Ai be a rohe ahu, to umui na asio taitai”.
18 Badina be Ioane Bapatiso ema, se anianiva, se inuinuva, a idia eto “Ia na mai lauma-dikana”. 19 A Taunimanima Natuna vada ema, e anianimu, e inuinumu, bena idia e tomu “Ina na ani-dae ani-dae bona vine ranuna e inua momomu tauna, tax gogo taudia bona kara dika taudia turadia”. A aonega ihamomokanina na natuna edia amo e hedinaraimu.

Iesu ese Galilea hanuadia e gwau henidia

20 lma negana ai siahu karadia diaḡau hanua lalodiai e karava hanuadia na ia ese e gwau henidia, badina be idia na asie helalo kerehai. 21 Eto, Korasin e, ihabaimu! Betesaida e, ihabaimu! Badina be siahu karadia lalomui ai na karava na Turo bona Sidono Ialodiai bama kara, idia na idau nega ai benla helalo kerehai mai davahadia bona mai rahurahudia ida. 22 Na hamaoromuimu, hahemaoro dinana ai Turo bona Sidono bae dika maragi, a umui na ba dika bada. 23 Oi danu, Kaperanaum e! Oi na guba ai ba heabi dae a? Lasi, tanobada henunai bae dorimu dobi. Badina be siahukaradia oi lalomu ai na karava na Sodoma lalonai bama kara, ia na bema mia ema bona hari. 24 Na hamaoromumu, hahemaoro dinana ai Sodoma baine dika maraḡi, a oi na ba dika bada.

Iesu ena boiboi

25 Una negana ai Iesu eto, Tamagu e, guba bona tanobada Lohiana, na hanamomumu, badina be ini ḡau na aonega taudia bona lalo-parara taudia edia amo vada o huni, a memero karukarudia ediai vada o hahedinarai. 26 Momokani, Tamagu e, badina be emu lalo-hadai namona benai.

27 Ḡau iboudiai na Tamagu ese vada e henigu; tau ta Tamada asi dibana, Natuna mo sibona, bona Natuna e uramu baine hahedinarai henia tauna.

28 Tau boera laumui bona maduna metau taumui iboumui ai, lau dekegu aoma, lau ese laḡa-ani baina henimui. 29 Egu maduna na paḡamui ai ba huaia, lau dekegu ai ba hahediba, badina be lau na manada bona lalo-manau taugu; bena laumamui do bae laḡa ani. 30 Badina be egu maduna na haraḡa, ihuana danu asi hekwarahina.

Copyright information for `MEU