Matthew 12

Dina Helaḡa Taravatudia

Una negana ai Iesu na Dina Helaḡa ai uit umana e rakaia hanai. Ena hahediba na e hitolodiava, bena uit huahuadia e burukiva, e aniva. Farisea taudia ese e itadia, bena e hamaoroa, eto, O itaia, emu hahediba na hegwau-tao karana Dina Helaḡa ai e karaiamu. Ia ese e haere henidia, eto, Nega ta asio duahia, a, David ena kara ta, e hitoloava negana ai, ia mai bamona ida? Dirava ena ruma ai e dae kau, pata helaḡa malamalana e ania; a una malamala na helaḡa vaitani, ienai bona ia bamona ediai; hahelaḡa taudia sibodia bema ania. Eiava taravatu ai asio duahia, a, Dina Helaḡa ai hahelaḡa taudia ese dina helaḡa taravatudia e tata utu, to asi edia kerere? Na hamaoromuimu, iniseni ai ta ese Dubu Helaḡa e hereaiamu. Ina hereva anina boma diba “Lau na hebogahisi na uramu, dia boubou ḡauna” umui na asi edia kerere taudia basioma habadelaidia. Badina be Taunimanima Natuna na Dina Helaḡa biaguna.

Ia na unu amo e raka oho, bena edia dubu ai e dae kau. 10 Tau ta unuseni ai imana na heveri. Bena idia ese e nanadaia, eto, Dina Helaḡa ai gorere ihamaurina be maoro eiava? Edia ura be bae habadelaia. 11 Bena Iesu ese e haere henidia, eto, Umui daika ena mamoe bema tamona mo, bena Dina Helaḡa ai guri lalonai bema moru dobi, basioma abia basioma veria dae a? 12 Be, taunimanima ese mamoe asie hereadiamu a? Taunabunai, Dina Helaḡa ai kara namona ikarana be maoro. 13 Bena ia ese hari tau e haduaia, eto, Imamu a toia roro. E haroroa, vada e namo, imana kahana heḡereḡerena. 14 A Farisea taudia na e raka lasi, e henega bou, ia bae hadikaia dalana e tahua.

15 Iesu na mai dibana dainai, ia na dauha ela. Hutuma bada ese ia murinai e raka, bena ia ese iboudiai e hamauridia; 16 a e tamanudia, ia harina basie hapiua. 17 Unu amo Isaia, peroveta tauna, ena hereva vada e momokani, eto,

18 A itaia, egu hesiai tauna binai, vada na abia hidi,
Egu lalokau, na lalo namo heniamu;
Laumagu na ia latanai baina atoa kau,
Ia ese hahemaoro bese iboudiai baine hamaorolaidia.
19 Ia na basine heai, basine lolo;
Ariara ai ia erena basie kamonai.
20 Siriho pou basine hakwaidua,
Gida busine habodoa,
Ela bona hahemaoro na kwalimu ai baine halaoa.
21 Ia ladana bese iboudiai bae imodaia.

Lauma Helaḡa ihadikana

22 Una negana ai tau ta mai lauma-dikana ia dekena e laohaia; tauna na mata-kepulu bona mu danu. Iesu ese e hamauria, bena e hereva bona ḡau e ita danu. 23 Bena aru taudia iboudiai e hoa, eto, Ina na David natuna readia? 24 Farisea taudia e kamonai, bena idia eto, Ina tau be dia sibona, a Beel-sebul, lauma dikadia edia lohia, dainai lauma dikadia e luludia lasimu.

25 Iesu na edia lalo-hadai dibana, bena ia eto, Basileia ta sibona bema haheparara, ia na bema dika; bona hanua ta eiava iduhu ta sibona bema haheparara, ia na basinema gini diba. 26 Bona Satana ese Satana bema lulua lasi, ia na bema parara, bena ena basileia ede bema gini toma? 27 Lau be Beel-sebul siahuna ai lauma dikadia na luludia lasimu o tomamu, matona umui natumui be daika siahuna ai e luludia lasimu? Benaini, idia ese bae hahemaoro henimui. 28 A, bema lau ese Dirava Laumana dainai lauma dikadia na luludia lasimu, Dirava ena basileia na emui ai vada eme kau. 29 Tau ta ese goada tauna ena ruma ede baine raka vareai toma, ena kohu ede baine dadihai toma? Ia na goada tauna baine ḡuia guna, bena ena ruma kohuna baine dadi. 30 Egu ai se taomu tauna ese e laogu ahumu; bona lau ida asia gogomu tauna ese e ḡiḡi rohorohomu. 31 Taunabunai na hamaoromuimu, taunimanima edia kara dika bona edia ere dika iboudiai bae hegwau tao; a Lauma e ere dika heniamu tauna na ena dika basine hegwau tao. 32 Taunimanima Natuna baine ere dika henia tauna na ena dika baine hegwau tao; a Lauma Helaḡa baine ere dika henia tauna ena dika basine hegwau tao, hari ina mauri ai bona mauri gabena ai danu.

33 Au bona huahua ba hanamodia, eiava au mai huahuana ida ba hadikadia; badina be huahuana amo au bae dibaia. 34 Gaigai natudia e, mai dikamui ida o nohomu be hereva namodia ede ba gwaurai toma? Lalona e honu honu daemu ḡaudia amo uduna e herevamu. 35 Tau namona ese ḡau namodia lalona ai e haboumu amo ḡau namodia e vaimu; tau dikana ese ḡau dikadia lalona ai e haboumu amo ḡau dikadia e vaimu. 36 Na hamaoromuimu, hereva-kava iboudiai taunimanima ese bae gwaurai na hahemaoro dinana ai bae davalai. 37 Badina be emu hereva ese bae hanamomu, bona emu hereva ese bae hadikamu.

Toa e tahua Iesu enai

38 Bena itorena taudia bona Farisea taudia haida ese e hamaoroa, eto, Hahediba taumu e, ai na a uramu toa ta oiemu amo baia itaia. 39 Ia ese e haere henidia, eto, Uru dikana mai heuda-hanaina ida toa e tahuamu, a toa ta ediai basine hedinarai, Iona, peroveta tauna, toana mo vadaeni, 40 Badina be Iona na heto, dina toi boi toi lakara-donodono bogana ai e nohova, unuhetomana Taunimanima Natuna danu dina toi boi toi tano lalonai baine noho. 41 Hahemaoro negana ai, Nineve taudia ina uru taudia ida bae gini hebou, bae dunidia dae, badina be Iona ena haroro dainai e helalo kerehai; a iniseni ai ta ese lona e hereaiamu. 42 Hahemaoro negana ai danu diho kahana pavapavana hahinena ina uru taudia ida bae gini hebou, baine dunidia dae, badina be ia na tanobada dokona amo Solomon ena aonega ikamonaina ema; a iniseni ai ta ese Solomon e hereaiamu.

Sivarai heḡereḡerena: Lauma dikana ese e rakatania tauna

43 Lauma dikana ta na tau ta ena amo e raka lasi, bena gabu kaukaudia e raka hanai, baine laḡa ani eto, to laḡa-ani gabuna ta se davaria. 44 Bena eto, Na rakatania rumana ma baina lou henia. E lou lao, e davaria, e mia kava, asi inoholaina, vada e ḡoevaḡoeva. 45 Bena ia ese lauma dika-hereadia hahitu ma e hakaudia lao, iboudiai e raka vareai, lalona ai e noho. Taunabunai, una tau be matamana ai ena dika na taina maraḡi, a dokona ai ena dika na bada herea.

Varavara korikori

46 Ia dounu aru taudia e hereva henidiava ai, sinana bona tadina murimuri ai e gini, bae hereva henia eto. 47 Bena ta ese e hamaoroa, eto, E, sinamu bona tadimu ounu murimuri ai gigini, oi bae hereva henimu e tomu. 48 A Iesu ese e hamaoroa tauna na e haere henia, eto, Sinagu bona tadigu be daidia? 49 Bena ena hahediba e duanaidia, eto, Sinagu bona tadigu bini; 50 badina be Tamagu guba ai e nohomu na ena ura bae kara taudia, idia hari tadigu bona taihugu bona sinagu.

Copyright information for `MEU