Matthew 19

Ioridane unukahana ai

Unu hereva e hadoko murinai, Iesu ese Galilea e rakatania, Iudea kahana ela, Ioridane sinavaina unukahana ai. Hutuma bada ese ia e gavaia, bena ia ese edia gorere e hamauridia unuseni ai.

Bena Farisea taudia haida ia dekena ela, e nanadaia hedibaḡani, eto, Tau ta, mai badina baine ura adavana baine hadihoa, baine hadihoa diba eiava? Bena ia ese e haere henidia, eto, Be, asio duahia a, matamana negana ai e karadia Diravana ese maruane bona hahine e karadia, bena eto, Badina bunai, tau be tamana sinana baine rakatanidia, adavana enai baine tao, bena raruosi vada tamona na heto. Taunabunai, idia na dia rarua, anidia vada tamona. Dirava ese vada e hahekapudia taudia na taunimanima ese basie hapararadia. Idia ma eto, O badina be dahaka Mose e haheḡani, eto “Hekoho revarevana baine torea, hahine baine henia, bena baine hadihoa”? Ia eto, Emui lalo-duhu dainai Mose ese e haduamui, adavamui ba hadihodia; a matamana negana ai na dia unuheto. A lau ese na hamaoromuimu, adavana se heuda hanai to baine hadihoa bona hahine ta ma baine adavaia tauna na heuda-hanai tauna.

10 Ena hahediba ese e hereva henia, eto, Headava dalana bema unuheto, taunimanima basiema headava hari namo. 11 Ia eto, Taunimanima iboudiai ina hereva basie abia dae diba, to e henidia taudia mo sibodia. 12 Badina be haida na sinadia bogadia amo e vara vada helaḡa; a haida be taunimanima ese e hahelaḡadia; a haida be guba basileiana dainai sibodia e hahelaḡa. Ina hereva iabi-daena mai dibana tauna ese baine abia dae.

Iesu ese maraḡidia e hanamodia

13 Haida ese natudia ia dekena e laohaidia, imana tubuadia ai baine ato kau bona baine ḡuriḡuri eto; to hahediba ese e gwaudia tubu. 14 A Iesu eto, Ene memero-memero na dekegu aema, asio luludia; badina be enehetomadia na guba basileiana taudia. 15 Bena ia imana idia tubuadia ai e ato kau. Bena una gabu amo e raka oho.

Mauri hanaihanai herevadia

16 Tau ta ia dekena ela, eto, Hahediba taumu e, dahaka ḡau namona baina karaia, mauri hanaihanai iabina totona? 17 Iesu na e haere, eto, Dahaka ḡau namona o nanadailaigumu? Tamona mo vada e namo. Mauri iabina urana boma ura, taravatu boma badina. 18 Ia eto, Edena? Iesu elo, Ḡaudia bini: Basio aIa-ala; Basio heuda hanai; Basio henao; Basio hahebade koikoi; 19 Tamamu sinamu ba matauraidia; bona, Dekemu tauna ba lalokau henia, sibomu o helalokaumu heḡereḡerena. 20 Eregabe tauna eto, Ene iboudiai vada na badina namonamo, ma dahaka ai doini na dabumu? 21 Iesu na e haere, eto, Boma ura boma ḡoeva dae, emu kohu boma ha hoi, ogoḡami taudia boma harihari henidia, guba kohuna boma abia; bena murigu ai boma raka. 22 A eregabe tauna ese una hereva e kamonai, bena mai lalo-hisihisina e raka oho, badina be ia na taḡa tauna.

23 Bena Iesu ese ena hahediba e hereva henidia, eto, Na hamaoromui momokanimu, taḡa tauna na guba basileiana iduarana ai baine heloge. 24 Ma na hamaoromuimu, kamelo na kobi matuna ai e vareaimu be haraḡa, a taḡa tauna na Dirava ena basileia lalonai baine vareai na mai hekwarahina. 25 Ena hahediba ese una hereva e kamonai negana ai, e hoa dikadika, bena eto, Be, daika mauri baine davaria? 26 Iesu ese e raraidia, bena eto, Taunimanima ese basie karaia diba, a Dirava hari ḡau iboudiai ikaradia dibana.

27 Bena Petro ese e hereva henia, eto, Ai na ḡau iboudiai vada a rakatani, oi vada a ḡavamu; ai na dahaka baia abi? 28 Iesu ese e hamaorodia, eto, Na hamaoromui momokanumu, umui o ḡavagumu taumui ese ḡau ihamatamatadia negana ai, Taunimanima Natuna ena terono diaridiarina ai baine helai kau negana ai, terono gwauta-rua ai ba helai, Israel iduhudia gwautaruaosi ba hahemaoro henidia. 29 Ruma, eiava tadikakana, eiava taihuna, eiava tamana, eiava sinana, eiava adavana, eiava natuna, eiava tano, lau daigu ai vada e rakatanidia tauna ese sinahu sinahu be abimu, bona mauri hanaihanai danu do baine abia. 30 A guna taudia hutuma do bae gabe, bona gabe taudia do bae guna.

Copyright information for `MEU