Matthew 26

Iesu ialana dalana e tahuava

Iesu na unu hereva iboudiai e hadoko, bena ia ese ena hahediba e hamaorodia, eto; Dibamui vainana-negai Lagau-hanai Ariana bae karaia; una negana ai Taunimanima Natuna taona bae torea, bae hasatauroa.

Bena hahelaḡa taudia bona itorena taudia bona hanua tau-badadia ese hahelaḡa tauna badana, ladana na Kaiafa, ena ruma ai e hebou; e henega, dibaka karadia amo Iesu bae dabaia tao bae alaia mase eto. To idia eto, Dia aria dinadia ai, aru taudia bae heloḡo-heloḡo na garina.

Hahine ta ese Iesu e horoa

Iesu na Betania ai, Simona, lepra tauna, ena ruma ai. Bena hahine ta ia dekena ela, nadi kavabuna ta e abia kau, lalonai na dehoro namohereana, davana bada ḡauna; bena Iesu ege-dihona ai hahine ese dehoro e horolaia. Ena hahediba ese e itaia, bena e badu, eto, Dahaka dainai ina dehoro e negea kavamu? Bema hoia, moni diaḡau bema abi, bena ogoḡami taudia bema henidia. 10 Iesu na dibana, bena e hamaorodia, eto, Dahaka dainai o turiariki heniamu? Kara namona egu ai vada e karaia. 11 Ogoḡami taudia be nega idoidiai dekemui ai nonoho, bena ba ura negadia ai vada ba hanamodia. A lau be nega idoidiai dekemui ai basina noho. 12 Ina dehoro amo taugu vada eme dahua heḡaeḡae, igurigu totona. 13 Na hamaoromui momokanimu, ina sivarai namona bae harorolaia gabudia iboudiai, tanobada heḡegemadai, hari eme karaia karana bae gwauraia, ia ihelalolaina.

Iuda ese Iesu taona e torea

14 Bena gwauta-rarua tauna ta, ladana na Iuda Iskariote, hahelaḡa taudia dekedia ela, 15 eto, Taona bama torea, dahaka boma henigu? Bena idia ese silver monidia toi-ahui e henia. 16 Una negana ela ia ese taona itorena negana namona e tahuava.

Anibou Helaḡa

17 Asie hatubua flaoana Ariana dinana gini-gunana, hahediba na Iesu dekena ela, e nanadaia, eto, Edeseni ai Lagau-hanai baia karaia heḡaeḡae, bena bavania? 18 Bena ia na e haere, eto, Hanua aola, tau ta dekenai, ba hamaoroa, baoto, Hahediba tauna na e tomu “Egu nega vada eme kahikahi, egu hahediba ida Lagau-hanai na emu ruma ai baia ania”. 19 Bena hahediba na Iesu ese e haduadia heḡereḡerena vada e karaia, Lagau-hanai Ariana vada e karaia heḡaeḡae.

20 Adorahi ai, ia na ena hahediba gwauta-raruosi ida e ege diho. 21 Bena e anianiva negana ai ia eto, Na hamaoromui momokanimu, umui ta ese taogu baine torea. 22 Idia na lalodia e hisihisi, bena ta ta ese e nanadaia, eto, Lohiabada e, ina lau a? 23 Ia e haere, eto, Lau ida nau tamona ai a dau dobimu tauna ese lau taogu baine torea. 24 Taunimanima Natuna vada be laomu, e torelaia heḡereḡerena; a Taunimanima Natuna taona itorena tauna madi ihabaina! Una tau basinema vara hari namo! 25 Bena luda, tao-tore tauna, ese e nanadaia, eto, Hahediba taumu, ina lau a? Iesu eto, O ena vada o gwaumu.

26 Idia na e anianiva lalonai, Iesu ese flaoa atagana ta e abia, e hanamoa, bena e bitua, ena hahediba e henidia, eto, Avabia, avania, lau taugu binai. 27 Ma kehere ta e abia, e hanamoa, e henidia, eto, Iboumui ai a inua; 28 badina be ina na lau raragu, herohemaino rarana, hutuma daidiai baine hebubu, dika igwautaona. 29 Na hamaoromuimu, vine ranuna do basina inua lou, ela bona dinana baine kau lau umui ida matamatana baita inua, Dirava ena basileia lalonai.

30 Idia na ane e abia vaitani, bena e didi lasi, Olive ororona ela. 31 Bena Iesu ese e hamaorodia, eto, Iboumui ai lau daigu ai ba hekwakwanai, badina be ini e torea toma,

Mamoe ireḡudia tauna baina gwadaia,
Bena mamoe vada bae karoho.
32 A lau baina tore isi lou, bena baina gunalaimui Galilea ai. 33 Petro ese e haere henia, eto, Ena be taunimanima iboudiai oi daimu ai bae hekwakwanai, to lau be lasi. 34 Bena Iesu ese e hamaoroa, eto, Na hamaoromu momo-kanimu, hari ina hanuaboi, kokoroku do basine tai, oiese hatoi ba ḡoregu. 35 A Petro eto, Ena be oi ida baita mase hebou, tolau oi basina ḡoremu. Ena hahediba iboudiai danu unu mo e gwau toma.

Getesemane

36 Iesu na idia ida gabu ta ai e lasi, ladana Getesemane. Bena ia ese ena hahediba e hamaorodia, eto, Iniseni ai ba helai; lau do baina ha ḡuriḡuri. 37 Bena ia ese Petro bona Sebedeo natuna raruosi e hakaudia siri. Bena laumana e daure, darana e doko. 38 Bena e hamaorodia, eto, Lau na lalogu eme hisihisi bada, mokona name mase; iniseni ai ba noho, baita gima. 39 Taina ma e raka lao, bena tano ai e goru parapara, e ḡuriḡuri, eto, Tamagu e, bema mai dalana ina kehere na egu amo boma abia oho; to dia lauegu ura, oiemu ura hari. 40 Ena hahediba dekedia e lou lao, mahutadia ai e davaridia. Bena ia ese Petro e gwau henia, eto, Be, asi goadamui hora tamona mo lau ida baitama gima a? 41 Ba gima, ba guriḡuri, hedibaḡani ai ba vareai na garina. Lauma na e uramu, a tau-anina na eme manoka.

42 Nega iharuana e raka lao, eha ḡuriguri, eto, Tamagu e, ina kehere iabi-ohona readia asi dalana dahaka, ela bona baina inua; emu ura baine ḡuḡuru. 43 Ma e lou lao dekedia, mahutadia ai ma e davaridia, badina be matadia e mahutava.

44 E rakatanidia, e lou ela, nega ihatoina ma eha ḡuriḡuri, ena ḡuriḡuri herevadia gunadia ma e gwaurai Iou. 45 Ma e lou lao, ena hahediba dekediai, e hamaorodia, eto, Madi, vada a mahuta, lagamui avani. Vadaeni, negana vada eme kahira-kahira, Taunimanima Natuna na dika taudia imadia ai be atoamu. 46 Be, o tore, aitala; taogu itorena tauna vada e maimu.

Iesu e dabaia tao

47 Ia dounu e herevava ai, Iuda, gwauta-rarua tauna ta, e gini dae, hutuma bada ida, mai edia dare bona mai edia kareva: hahelaḡa taudia bona hanua tau-badadia ese e siaidia taudia bunu. 48 Tao-tore tauna es toa ta e henidia guna, eto, Baina harahua tauna ḡaunabunai: ba dabaia tao. 49 Taunabunai, ia na Iesu dekena e raka kahi lao, eto, Hahediba taumu e, ba mauri! Bena e harahua. 50 Iesu ese e hereva henia, eto, Henamo e, ikarana totona oma karana vada a karaia. Bena idia ese Iesu imadia ai e daua kou, e dabaia tao. 51 Iesu ena orea tauna ta ese imana e dau tari, ena dare e veria lasi, hahelaḡa tauna badana ena hesiai tauna ta e taraia, taiana e dapaia oho. 52 Bena Iesu ese e gwau henia eto, Emu dare na gabuna ai ba toia vareai lou; badina be dare e abi taudia iboudiai na dare amo do bae mase. 53 Emu lalo hadai be lau asi siahugu a, Tamagu bama noia bena ia ese aneru oreadia gwauta-rua, ma haida danu, bema siaidia, lau idurugu? 54 To unu bema heto, revareva helaḡa na ede bema momokani toma, vada e torea ini baine hekara toma? 55 Una negana ai Iesu ese hutuma e gwau henidia, eto, Umui na mai daremui bona mai karevamui ida lau idabai-taogu oma, dadidadi tauna idabai-taona boma mai na heto. Dina iboudiai lau na dekedekemui ai na helaiva bona na hahedibava, Dubu Helaḡa lalonai, to asio dabaigu tao. 56 A ini ḡau iboudiai vada e vara, peroveta taudia ese e tore herevadia ihamomokanilaidia. Bena ena hahediba iboudiai ese e heautania.

Iesu e hahemaoro henia hahelaḡa tauna badana vairanai

57 Bena Iesu e dabaia tao taudia ese hahelaḡa tauna badana Kaiafa dekena e dabuia lao, unuseni ai itorena taudia bona hanua tau-badadia vada e hebou. 58 Petro ese e ḡavaia, to mai padana, ela bona hahelaḡa tauna badana ena ruma maḡuna lalonai e raka vareai, hesiai taudia ida e helai hebou, una kara dokona be dahaka baine ita eto.

59 Bena hahelaḡa taudia bona kaunsil taudia iboudiai ese hahebade koikoi taudia e tahudia malaka-malaka, ialana badina bae davaria eto. 60 Hahebade koikoi taudia diaḡau e tore isi, to ialana badina ta asie davaria; ela bona koikoi taudia rarua ma e tore isi, eto, 61 Ina tau e hereva, eto “Lau na mai siahugu Dirava ena Dubu Helaḡa baina rohoa, bena dina toi lalodiai ma baina hadaia lou”. 62 Bena hahelaḡa tauna badana e tore isi, e nanadaia, eto, Oi to herevamu a? Ini edia hahebade herevadia be dahaka? 63 A Iesu na asi reḡereḡena. Bena hahelaḡa tauna badana ese ma e hereva henia, eto, Mauri Diravana ladana ai na haḡanimumu: a hamaoromai, oi na Keriso, Dirava Natuna, eiava? 64 Iesu ese e haere henia, eto, O ena vada o gwaumu. Ina danu ma aina hamaorolaimui: Taunimanima Natuna do ba itaia, Siahu imana idibana ai baine helai, bona guba oridia ai bainema. 65 Bena hahelaḡa tauna badana ese sibona ena dabua e darea, eto, Dirava ihadikana herevana vada e gwauraiamu, ma dahaka hahebadena ta tahuamu a? Dirava ihadikana herevana vada eme gwauraia ome kamonai. 66 Dahaka o tomamu? Idia e haere, eto, Baine mase hari namo. 67 Bena idia ese ia vaira huahuana e kanudia, e tutua, e pataia ahu, bena eto, 68 Keriso e, a hamaoromai, daika ese e tutumumu?

Petro hatoi e heḡore

69 Petro na murimuri ai, maḡu lalonai e helaiva, bena hesiai hahinena ta dekena ela, eto, Ina oi danu Iesu, Galilea tauna, o bamoava ani? 70 To ia na iboudiai vairadiai e heḡore, eto, Emu hereva na lalogu seme parara.

71 Ia na e raka oho, ela ikoukou badibadinai. Ma hahine ta ese e itaia, bena dekedekena taudia e hamaorodia, eto, Ina tau danu Iesu, Nasaret tauna, e bamoava. 72 Bena ia e ere dika, e heḡore lou, eto, Una tau na asi dibagu.

73 Asi vanahana una gabu ai e gini taudia na Petro dekena ela, eto, Momokani, oi na idia ta, badina be gadomu ese e hahedinaraimumu. 74 Bena sibona vada e heuduguirai, e ere dika, eto, Una tau lau asi dibagu. Bena kokoroku vada e tai. 75 Bena Petro ese Iesu e gwauraia herevana vada e helalolaia une, eto “Kokoroku do basine tai, oi ese hatoi ba ḡoregu”. Bena e raka lasi, e tai dikadika.

Copyright information for `MEU