Matthew 8

Iesu ena siahu: gorere taudia e hamauridia

Ororo amo e hekei, bena hutuma bada na ia murinai e raka. Bena lepra tauna ta ia dekena ela, e toma henia diho, eto, Lohiabada e, boma ura boma haḡoevagu. Iesu imana e toia roro, enai e dau kau, eto, Lau na uramu: a ḡoeva. Bena lepra tauna vada e ḡoeva. Iesu ese e hamaoroa, eto, Tau ta basio hamaoroa; aola, hahelaḡa tauna ese baine itamu, bona haheḡoeva ḡauna Mose ese e gwauraia heḡereḡerena na ba henia, taunimanima ihadibalaidia.

Iesu na Kaperanaum ai e lasi. Bena tuari lohiana ta ia dekena ela, e noia, eto, Lohiabada e, egu hesiai merona na ruma ai e hekuremu; ia na e padaia, bona tauna eme hisihisi bada. Iesu ese e hamaoroa, eto, Baina vasi, bena baina hamauria. A tuari lohiana e haere, eto, Lohiabada e, lau na dia namo be egu ruma ai basio dae kau. Mani a hereva mo, bena egu hesiai merona na aine mauri. Badina be lau danu haida henudiai, a tuari taudia na lau henugu ai. Ta baina hamaoroa, bainato “Aola”, bena bainela; ma ta baina hamaoroa, bainato “Aoma”, bena bainema; ma egu hesiai merona baina hamaoroa, bainato “Ina na a karaia”, bena baine karaia. 10 Iesu ese una hereva e kamonaia, bena e hoa dikadika; bena ia murinai e raka taudia e hamaorodia, eto, Na hamaoromui momokanimu, abidadama inihetomana Israel ai asina davaria, lasi ona lasi vaitani. 11 Na hamaoromuimu danu, hutuma na dina dae amo bona dina diho amo baema, Abraham bona Isaak bona Iakob ida bae ege diho, guba basileiana lalonai; 12 a basileia memerodia korikoridia na murimuri diburana ai bae doridia lasi, unuseni ai bae tai, gadigadidia bae hahedai. 13 Bena Iesu ese tuari lohiana e hamaoroa, eto, Aola, emu abidadama heḡereḡerena bavabia. Hesiai merona na una hora lalonai vada e mauri.

14 Iesu na Petro ena ruma ai e dae kau, unuseni ai Petro ravana hahinena e davaria, tauna e siahu, e hekure. 15 Imana ai e dau kau, bena tauna siahuna e doko; bena hahine na e tore isi, ia isiaina e lao henia.

16 Adorahi ai, hutuma, lauma dikadia ese e bolodia taudia, na ia dekena e hakaudia lao. Bena ena hereva amo ia ese hari lauma dikadia e luludia lasi; bona gorere idau-idau taudia iboudiai danu e hamauridia. 17 Unu amo Isaia, peroveta tauna, ese e gwauraia herevana vada e momokani; eto, Ia ese eda manoka-manoka e abi isi, bona eda gorere e huahaida.

Iesu iḡavana

18 Iesu ese aru taudia e itadia, e ginia heḡeḡe, bena e hahedua, gohu kahana ai bae hanai eto. 19 Bena itorena tauna ta e raka kahi lao, e hereva henia, eto, Hahediba taumu e, emu laolao iboudiai baina bamomu. 20 Iesu na e haere, eto, Uda sisiadia na mai edia kohua, bona atai manudia na mai edia ruma, a Taunimanima Natuna na asi ena hekwina gabuna. 21 Ena hahediba ta ese danu e hereva henia, eto, Lohiabada e, mani emu kara tamagu do baina ha ḡuria guna. 22 Iesu eto, Murigu ai a raka; mase taudia ese edia mase bae guridia.

Iesu ena siahu: lai bona hurehure e gwau tao

23 Ia na vanaḡi auta ai e gui, bona ena hahediba ese e gavaia. 24 Gohu ai guba badana e kau, bena hurehure ese vanagi e habubunia, a ia na mahuta. 25 Bena idia ela, e haoa, eto, Lohiabada e, ame hamaurimai; ita aita mase. 26 Ia ese e gwau henidia, eto, Abidadama maraḡi-maraḡi taumui e, dahaka dainai o garimu? Bena e tore isi, lai bona hurehure e gwau tao; bena e gaima vaitani. 27 Bena idia na e hoa, eto, Ina lai bona hurehure na erena e kamonaimu tauna be daika?

Iesu ena siahu: lauma dikadia e luludia lasi

28 Unukahai idia na Gadarene tanona ai eha kau, bena lauma dikadia ese e bolodia taudia rarua na ia ida e hedavari; idia na gara gabudia amo e lasi, bona e daḡedaḡe bada, taunabunai taunimanima na una dala amo basie raka hanai diba. 29 Idia raruosi na e lolo, eto, Dirava Natuna e, dahaka emai ai bo karamu? Emai nega be dounu, ihahisimai totona vada oma a?

30 Una gabu ai, a taina dauhai, boroma serina badana ta e nuanuava. 31 Bena lauma dikadia ese e noia, eto, Boma lulumai, boma siaimai boroma lalodiai. 32 Bena ia ese e hamaorodia, eto, Aola. Taunabunai, idia na e lasi, boroma lalodiai e vareai; bena seri idoinai na hagahaga amo e rourou hekei gohu ai, unuseni ai e maloa bou.

33 Boroma ireḡudia taudia na e heau, hanua ela, lauma dikadia ese e bolodia taudia sivaraidia idoinai e gwauraia hedinarai. 34 Taunabunai hanua taudia iboudiai e aru ela, Iesu ida e hedavari; e itaia, bena e noia, edia tano amo baine raka oho eto.

Copyright information for `MEU