Micah 3

Israel lothiadia ihabadedia

Bena lau nato: Iakob besena ikwarana taumui e!
Israel besena ilohiana taumui e!
Hahemaoro ḡoevaḡoeva ikarana boma diba ani?
Umui ese namo o inai heniamu,
bona dika o ura heniamu;
umui ese egu bese taudia kopidia o kopadia ohomu,
bona hidiodia na turiadia amo o vakadia ohomu;
umui ese egu bese taudia hidiodia o animu,
bona kopidia o kopadia ohomu,
bona turiadia o hakwaidudia rohorohomu,
bona o utudia sisisisimu,
vamu uro lalonai na heto,
hidio tohe lalonai na heto.

Bena Iehova bae tai henia,
a ia ese basine haere henidia;
una negana ai vairana na edia amo baine hunia,
badina be idia na vada e kara dika.

Peroveta taudia ese egu bese taudia na
e hakaudia kereremu;
adia e davariamu negana ai
e boiboimu, e tomu “Maino”,
a adia se henidiamu tauna na
e tuari heniamu.
Iehova ese unu e herevalaidia tomamu.
Taunabunai hanua baine boi emui ai,
basio mata hanai,
bona baine dibura emui ai,
asi bagu-haoro ḡauna.
Dina baine diho peroveta taudia latadiai,
dina baine dibura idia daediai;
mata-hanai taudia na bae hahemaraidia,
bagu-haoro taudia danu bae hahemaraidia;
iboudiai ese ududia bae tao ahu,
badina be asi haere ta Dirava ena amo.
A lau na siahu ai vada name honu,
Iehova ena Lauma ese vada e rohegu,
mai hahemaoro ḡoevaḡoevagu bona mai goadagu ida,
Iakob ena kerere bona Israel ena kara dika
ihahedinarai-henidia totona.

Iakob besena ikwarana taumui e!
Israel besena ilohiana taumui e!
Ina na ba kamonai.
Umui ese hahemaoro ḡoevaḡoeva o inai heniamu,
bona ahu korikoridia iboudiai o hakererediamu.
10 Umui ese Siona o haginiamu rara amo,
bona Ierusalem kara dika amo.
11 Ikwarana taudia na hahemaoro e karaiamu,
koikoi henitaona dainai;
ena hahelaḡa taudia e hahedibamu, hevatu dainai;
ena peroveta taudia e bagu haoromu, moni dainai;
ḡau tamona, idia ese Iehova e abidadama heniamu, e tomu:
Iehova na ita bogaragida ani?
Dika ta na latadai basine kau.
12 Taunabunai, umui daimui ai Siona bae ruaia,
biru tanona na heto;
Ierusalem na vada e heḡiḡi dobi rumadia senudia ai bainela,
bona dubu ororona na uda ese baine udaia ahu.
Copyright information for `MEU