Micah 5

Harihari vada e maḡumu ahu;
vada e kouda heḡege;
hebota auna amo
Israel lohiana vahana e botaiamu.

Hahemauri Tauna Betelehem amo

Betelehem Efrata e,
oi na maragi, Iuda iduhudia bogaragidiai,
to oiemu amo tau ta baine tore isi egu,
ia na Israel lohiana ai bainela;
ena hematama na nega gunana amo,
sene negadia amo.

Taunabunai, ia ese baine rakatanidia,
ela bona hekamonai hahinena baine mara negana ai,
benil tadikakana orena bae lou mai
Israel taudia dekediai.
Bena ia na baine gini, ena mamoe serina baine ubua,
Iehova goadana ai,
Iehova, ena Dirava, ladana siahuna ai.
Idia na mai mainodia ida bae noho,
badina be ia na baine bada,
ela bona tanobada dokodia.

Maino dalana binai,
Asuria tauna na eda kaha ai bainema,
bona eda tano baine moimoilaia negana ai:
ita ese mamoe ireḡudia taudia hahitu baita haginidia, ia ilao-ahuna,
bona hanua lohiadia taurahani danu.
Idia ese Asuria tanona bae lohiaia, dare amo;
bona Nimrod ena tano danu, ala-ala darena amo.
Idia ese Asuria tauna imana amo bae hamaurida,
eda kaha bainema, eda tano baine moimoilaia, negana ai.

Bena Iakob taudia kwabukwabudia na
bese momo bogaragidiai bae noho,
hunu Iehova ena amo na heto,
medu batugu rei latanai na heto;
unu na asie halahemu, taunimanima daidiai,
taunimanima natudia asie naridiamu.
Iakob taudia kwabukwabudia na
basileia idau-idau bogaragidiai bae noho,
bese momo bogaragidiai bae noho,
leona uda boromadia bogaragidiai na heto,
leona natuna mamoe seridia bogaragidiai na heto;
e raka hanaimu negana ai,
e moi tao moi taomu,
e dare patapatamu,
asi tauna ta baine hahemauri.
Imamui na bae heabi isi, amui inai taudia daediai,
inaimui na bae henege daure.

10 Iehova na e tomu: Una dina ai
emui hosi na baina aladia mase bogaragimui ai,
bona emui kariota baina hamakohidia rohoroho.
11 Emui tano hanuadia baina habuadia tari,
bona emui gabu aukadia iboudiai baina ḡiḡidia dobi;
12 mea ḡaudia na imamui ai baina hamakohidia,
emui rohe taudia na bae ore;
13 emui kaivakuku baina utudia gari,
bona emui au-tubua danu bogaragimui ai;
bena imamui amo e kara ḡaudia na
basio toma henidia diho lou;
14 emui au-tubua helaḡadia baina hagaridia bogaragimui ai,
bona emui hanua baina habuadia tari.
15 Mai badugu ida bona mai badu-ḡaraḡaragu ida,
lau ese dava baina kara,
asi edia kamonai besedia latadiai.
Copyright information for `MEU