Nahum 3

Nineve ihabua-tarina

Rara hebubu hanuana, madi ihabaina!
Koikoi bona dadidadi ḡaudia ai e honu honu daemu;
dadidadi karadia na asi dokodia.
Hekwadi varona bona ava-keikei reḡedia e daemu;
hosi bona kariota e heau lalo-dikamu.
Hosi gui taudia e tata laomu,
dare e hururu-hururumu, io e kiama-kiamamu;
hutuma bada e masemu,
mase tau-anidia na e hasenudiamu,
mase tau-anidia na asi dokodia,
ediai e hetutuhimu.

Ini na ariara hahinena ena ariara karadia momo-herea daidiai,
mai hairaina bona mai ena mea dikadia,
ena ariara karadia amo basileia idau-idau e dibaḡanidiamu,
bona ena mea karadia amo bese ulau-idau e hahekwakwanaidiamu.
Iehova Sabaota na e tomu:
A itaia, lau ese na inai henimumu,
bona vairamu na ramimu amo baina ḡovaia ahu.
Bese idau-idau baina haheitalaidia, oi na gagaemu mo,
basileia idau-idau emu hemarai baina haheitalaidia.
Lau ese miro amo baina hodomu, baina dadaraimu,
bona hamue ḡauna ai baina halaomu.
Bae itamu taudia iboudiai na bae lagagalaimu, baeto,
Nineve vada e vahu; daika ese baine tailaia?
Ia tauna ihalona taudia na edeseni ai baina tahudia?

Oi ese Tebe o hereaia a?
Ia na Nilo sinavaina isena ai e daia,
ranu ese e ḡeḡea ahuva,
ia inaina ilao-ahudia ḡauna na davara,
bona ena maḡu na ranu.
Etiopia na ena goada,
bona Aigupto danu, asi hetoana;
Put bona Libia taudia ese e kahaia.

10 Ḡau tamona, vada e abia oho,
mai iḡuina ida e laohaia;
ena memero maraḡidia na e huaridia patapata,
ariara iboudiai doridia ai;
ena taunimanima namodia, e matauraidia taudia, na
mari amo e abidia,
bona ena lohia badadia na
auri gadeadia amo e ḡuidia.
11 Oi danu ba kekero,
matamu bae madai-madai;
roho-mauri gabuna do ba tahua,
inaimu amo ba roho mauri totona.
12 Emu kohoro iboudiai na suke audia na heheto,
huahuadia e dobi matama negana ai;
bema haheude-heudedia,
idia na ianidia taudia ududia ai bema moru.
13 A itaia, emu tuari oreadia na hahine na heheto,
oi bogaragimu ai.
Emu tano ikoukoudia na e hekeho vaitani, oi inaimu vairadiai;
emu kahitao audia na lahi ese vada e aradia ore.

14 Ranu ba utua, ba hekou ahu negana ranuna,
emu maḡu ba ha-aukadia;
raro gabuna baola, raro ba kuia,
raro mauana bavabia.
15 Unuseni ai lahi ese baine hamasemu,
dare ese baine gwadamu mase,
baine animu ore kwadi na heto.

Ba hutuma, kwadi na heto;
ba hutuma, rei kwadidla na heheto.
16 Emu hoihoi taudia o hahohodia,
idia ese guba hisiudia e hereadia;
kwadi ese hanina e toi roromu,
e roho laomu.
17 Emu hanua lohiadia na rei kwadidia na heheto,
emu toretore taudia na kwadi tabatabadia na heheto;
era ai e helaimu,
keru dinana ai,
a dina e daemu negana ai e roho laomu,
tau ta asi dibana idia na edeseni ai.

18 Asuria pavapavana e,
emu mamoe ireḡudia taudia na e mahutamu,
emu lohia taudia na e mahuta hedavauhemu,
emu taunimanima na ororo ai e karoho rohorohomu,
asi ihaheboudia tauna ta.
19 Emu hisihisi na asi ihanamona dalana,
beromu na dika herea;
oi harimu e kamonaimu taudia iboudiai ese
imadia na e patapata henimumu.
Badina be oiemu hahedika karadia asi dokodia be
daika ese se mamia toho a?
Copyright information for `MEU