Nehemiah 10

Edia toa amo e hamomokaniamu taudia bini: Nehemia, hekwara tauna, Hakalia natuna; Sedekia, Seraia, Asaria, Ieremia, Pasahuru, Amaria, Malkia, Hatusu, Sebania, Maluku, Harimi, Meremoto, Obadia, Daniel, Ginetono, Baruku, Mesulama, Abia, Miamini, Maasia, Bilgai, Semaia. Hahelaga taudia bunu. Levi taudia: Iesua, Asania natuna; Binui, Henadad natuna ta; Kadmiele; 10 bona tadikakadia, Sebania, Hodia, Kelita, Pelaia, Hanana, 11 Mika, Rehob, Hasabia, 12 Sakuru, Serebia, Sebania, 13 Hodia, Bani, Beninu. 14 Iduhu kwaradia: Paroso, Pahata-moab, Elam, Satu, Bani, 15 Buni, Asgada, Bebai, 16 Adonia, Bigvai, Adini, 17 Atere. Hesekia, Asuru, 18 Hodia, Hasumu, Besai, 19 Harifi, Anatoto, Nebai, 20 Magapiasa, Mesulama, Hesiri, 21 Mesesabele, Sadok, Iadua, 22 Pelatia, Hanana, Anaia, 23 Hosea, Hanania, Hasub, 24 Halohese, Pilha, Sobek, 25 Rehumu, Hasabana, Maaseia, 26 Ahia, Hanana, Anana, 27 Maluku Harimi, Baanaha.

28 Bese orena, hahelaḡa taudia, Levi taudia, ikoukou igimadia taudia, ane-abi taudia, dubu ena hesiai taudia, bona tano taudia edia amo vada e raka oho Dirava ena taravatu enai vada e tao taudia, mai adavadia bona natudia mamaruanedia bona hahinedia ida, mai aonegadia bona mai lalopararadia taudia iboudiai, ese 29 tadikakadia, edia bese lohiadia, ida e tao heboumu, gwauhamata metauna bona helaḡana lalonai e vareaimu, Dirava ena taravatu, ena hesiai tauna Mose ena amo e heni ḡauna, bae rakalaia, bona Iehova, eda Ḡaubada, ena haheḡani iboudiai bona ena hahemaoro herevadia bona ena hahedua herevadia bae badinadia, bona karadia bae kara. 30 Ita ese natuda hahinedia na tano taudia basita henidia, eiava idia natudia hahinedia na basita abidia, natuda mamaruanedia adavadia ai basiela; 31 bona tano taudia ese kohu eiava aniani na dina helaḡa ai bema mailai, hoihoi totona, ita na ediai basita hoihoi, Dina Helaḡa ai eiava helaḡa dinana ta ai; bona laḡani ihahituna ai baita kau ai uma anidia bona abitorehai davadia baita gwau tora.

32 Ita ta hegwauhamata hehenimu, laḡani ta ta amo ita ta ta ese sekele kaha toiosi ai ta baita heni, Dirava ena dubu ḡaukarana ena, 33 flaoa helaḡana, bona flaoa bouboudia bona ḡole-oho bouboudia, e hahelaḡadia louloumu ḡaudia, bona dina helaḡadia, hua matamatadia, bona e gwaurai ariadia, bona ḡau helaḡadia, bona kara dika bouboudia Israel ena dika iabi-ohona ḡaudia, bona eda Dirava ena dubu ḡaukaradia iboudiai, inanatalaidia. 34 Ita ese danu hahelaḡa taudia bona Levi taudia bona hanua taudia na mari amo vada ta duanaidia, boubou audia bae mailai, Dirava ena dubu lalonai, eda iduhu ta ta heḡereḡeredia ai, bae gwaurai negadia ai laḡani ta ta amo, Iehova eda Dirava ena ihaboulaina patana latanai bae ha-ara, taravatu ai e torea heḡereḡerena. 35 Ta gwau hamatamu, eda tano anidia roboadia bona huahua audia iboudiai anidia roboadia na laḡani ta ta amo Iehova ena dubu baita laohai; 36 bona natuda mamaruanedia roboadia bona eda boromakau natudia roboadia danu eda Dirava ena dubu baita laohaidia, hahelaḡa taudia eda Dirava ena dubu ai e ḡaukaramu dekediai, taravatu ai e torea heḡereḡerena, bona roboa gaudia eda nani bona eda mamoe seridia amo danu; 37 bona eda flaoa, e tari baroko guna ḡaudia, bona eda herahia ḡaudia, au-huahua idau-idau bona vine ranuna bona dehoro, na hahelaḡa taudia dekedia baita laohai, eda Dirava ena dubu ena habou-habou daiutudia lalodiai; bena eda tano anidia baita karoadia, karoa gwauta, bena karoa ta na Levi taudia dekedia baita laohai, badina be hari Levi taudia ese karoa ihagwautadia e haboumu, eda digi hanuadia iboudiai lalodiai. 38 Hahelaḡa tauna, Aaron garana, na Levi taudia ida bae tao hebou, Levi taudia ese karoa ihagwautadia bae abi negana ai; bena Levi taudia ese edia karoa ihagwautadia ma bae karaoadia, karoa gwauta, bena una ikaroana amo karoa ta na eda Dirava ena dubu ai bae daelaia, habou-habou daiutudia ai bae haboua. 39 Badina be Israel taudia bona Levi garana taudia ese herahia ḡaudia, aniani bona vine ranuna bona dehoro, na habou-habou daiutudia lalodiai bae vareailai, gabu helaḡana kohudia e miamu, bona hahelaḡa taudia, dubu ḡaukaradia e karamu taudia, bona ikoukou igimadia taudia bona ane-abi taudia e nohomu gabuna ai. Eda Dirava ena dubu basita laloa herekwa.

Copyright information for `MEU