Numbers 27

Selofehad natuna ahudia

Una negana ai Selofehad Hefere natuna hahinedia na e raka kahira. Hari Hefere na Gilead natuna; Gilead be Makiri natuna; Makiri be Manase natuna. Taunabunai, idia na Manase Iosef ena iduhu hahinedia Hahine ladadia be Mahala bona Noa bona Hogla bona Milka bona Tirisa. Idia na Mose bona hahelaḡa tauna Eleasara bona iduhu lohiadia bona hebou taudia iboudiai vairadiai e gini, hebou kalagana iduarana ai, eto, Tamamai na tano ḡaḡaena ai e mase: ia na dia Kora ida Iehova e heai henia oreana tauna ta, to ia sibona ena kara dika dainai e mase. Ia na asi natuna maruanena ta. Badina be dahaka tamamai ladana na ena iduhu amo baine heabi oho, asi natuna maruanena dainai? Tamamai varavarana bogaragidiai ai ahumai ba henimai.

Mose ese idia sivaraidia na Iehova e hamaorolaia. Bena Iehova ese Mose e hamaoroa, eto, Selofehad natuna hahinedia edia hereva na maoro; tamadia varavarana bogaragadiai ahudia ba henidia; tamadia ahuna na idia ese bae abia. Ina danu, Israel taudia ba hamaorodia, baoto: Tau ta baine mase, asi natuna mase maruanena, natuna hahinena ese ia ahuna baine abia; bema asi natuna hahinena danu, ahuna na tadikakana ba henia; 10 bema asi tadikakana, ahuna na tamana lahaidia ba henidia; 11 a bema asi:tamana lahaina ta, ahuna na varavara-dosina ba henia, ia ese baine abia. Ina na taravatu bona haheḡani Israel taudia ediai. Iehova ese Mose vada e henia heḡereḡerena.

Mose ibolona

12 Iehova ese Mose e haḡania, eto, Ina Abarim ororona ai ba dara dae, ba roha lao, Israel taudia vada na henidia tanona do ba itaia. 13 Ba itaia murinai oi na tubu tama dekediai ba hahebou, kakamu Aaron heḡereḡerena; 14 badina be Sin tano-ḡaḡaena ai umui raruosi ese o gwau edeede henigu, hebou taudia ese e heai henigu negana ai, ranu gabuna ai asio rimodaigu idia vairadiai. Una ranu ladana na Meriba; ia na Kade kahana ai, Sin tanoḡaḡaena ai. 15 Bena Mose ese Iehova e haere henia, eto, 16 Mani emu kara, Iehova, taunimanima iboudiai laumadia edia Dirava, ese tau ta baine abia hidi, ina orea taudia baine biagudia. 17 Ia be vairadiai baine raka lasi bona vairadiai baine raka vareai; baine hakaudia lasi bona baine hakaudia vareai. Iehova ena orea taudia na basie noho kava, mamoe asi ireḡudia na heheto. 18 Bena Iehova ese Mose e haḡania, eto, Iosua Nunu avabia: ia be lauma ese vada e rohea tauna; oi imamu na ia tubuana ai bavato kau. 19 Bena ba haginia, hahelaḡa tauna Eleasara vairanai bona hebou taudia iboudiai vairadiai; bena idia vairadiai dagi ba henia. 20 Oiemu siahu amo ba hasiahua; bena Israel oreana taudia iboudiai ese ia bae kamonai henia edia hebou ai. 21 Ia be hahelaḡa tauna Eleasara vairanai baine gini, bena Eleasara ese ia dainai Iehova ena ura baine tahua, Urim
“Urim”: Esodo 28, v 30 ba itaia.
ena amo; bena iena hereva dainai bae raka lasi bona iena hereva dainai bae raka vareai, ia bona Israel oreana taudia iboudiai.
22 Bena Mose ese Iehova ena haheḡani heḡereḡerena mo e karaia: Iosua e abia, hahelaḡa tauna Eleasara bona hebou taudia iboudiai vairadiai e haginia; 23 bena imana na ia tubuana ai e atodia kau, dagi e henia, Iehova ena haheḡani Mose ena amo e henia heḡereḡerena.

Copyright information for `MEU