Numbers 3

Levi taudia iduahidia

Aaron bona Mose garadia bini, Iehova ese Mose Sinai ororona ai e hereva henia negana amo. Aaron natuna ladadia bini: Nadab, tau roboana, bona Abihu, bona Eleasara, bona Itamara. Aaron natuna bunu, e horodia bona e hahelaḡadia, hahelaḡa taudia ai e halaodia. A Nadab bona Abihu na Iehova vairanai e mase, Sinai tano ḡaḡaena ai, lahi idauna Iehova vairanai e vareailaia negana ai. Idia na asi natudia. Taunabunai, Eleasara bona Itamara ese hahelaḡa ḡaukaradia e karava, tamadia Aaron vairanai.

Iehova ese Mose e haḡania, eto, Levi taudia ba hakaudia mai, hahelaḡa tauna Aaron vairanai bae gini, ia isiaina bae lao heni. Ia vairanai bona hebou taudia iboudiai vairadiai hebou kalagana bae reḡua, bona dubu ḡaukaradia bae kara. Hebou kalagana kohudia iboudiai bae naridia, bona hahelaḡa karadia bae kara dubu ai, Israel taudia daidiai. Levi taudia na Aaron mai natuna ida imadia ai bavatodia kau; Israel taudia iboudiai bogaragidia amo idia bavabidia, ia ba henia. 10 Aaron mai natuna ida ba gwauraidia hidi, hahelaḡa dagina na ediai baine mia. Idau tauna ta baine raka kahi, vada bae alaia mase.

11 Iehova ese Mose ma e hamaoroa, eto, 12 A itaia, lau ese Levi taudia vada na abidia hidi, Israel taudia bogaragidia amo, Israel taudia edia roboa mamaruanedia ibolodia. Idia na lauegu. 13 Badina be roboa mamaruanedia be lauegu, Aigupto taudia natudia mamaruanedia roboadia iboudiai na aladia mase dinana ai, lau ese roboa mamaruanedia iboudiai na abidia lauegu, taunimanima natudia roboadia bona mauri ḡaudia iboudiai natudia roboadia. Idia na lauegu: lau binai Iehova.

14 Iehova ese Mose e hereva henia, Sinai tano ḡaḡaena ai, eto, 15 Levi taudia iboudiai ba duahidia, tamadia edia ruma ai bona edia iduhu ai; hua ta vada - e hanaia mamaruanedia iboudiai ba duahidia. 16 Taunabunai,Mose ese e duahidia, Iehova ese ena hereva ai e haḡania heḡereḡerena. 17 Levi natuna ladadia bini: Gereson bona Kohat bona Merari. 18 Gereson ese e havaradia iduhudia bini: Libni bona Simei. 19 Kohat ese e havaradia iduhudia bini: Amram bona Isahara bona Heberon bona Usiele. 20 Merari ese e havaradia iduhudia bini: Mali bona Musi. Levi iduhudia bunu: ihavaradia taudia ladadia e nemaidia.

21 Gereson garana na Libni taudia bona Simei taudia: Gereson iduhudia bunu. 22 Edia mamaruane e duahidia, hua ta e hanaia amo, iboudiai na 7,500. 23 Gereson taudia edia taruha gabuna be dubu murina, lahara kahana ai. 24 Ikwaradia tauna na Eliasaf Laele. 25 Hebou kalagana lalonai Gereson taudia bae reḡu ḡaudia bini: dubu bona kalaga dabuadia, bona guhi dabuadia, bona kalaga iduarana dabuadia, 26 bona maḡu dabuadia, bona dubu maḡuna ikoukouna dabuadia, bona ihaboulaina patana, bona kwanau iboudiai. Bae reḡu ḡaudia bunu.

27 Kohat garana na Amram taudia bona Isahara taudia bona Heberon taudia bona Usiele taudia: Kohat iduhuna bunu. 28 Edia mamaruane e duahidia, hua ta e hanaia amo, iboudiai na 8,600; idia na dubu inarina taudia. 29 Kohat taudia edia taruha gabuna be dubu diho kahana ai. 30 Ikwaradia tauna na Elisafan Usiele. 31 Bae reḡu ḡaudia bini: maua helaḡana, bona pata helaḡana, bona lamepa patana bona ihaboulaina patadia, bona gabu helaḡana ena kohu iboudiai, hahelaḡa taudia ese kara helaḡadia e karalaimu ḡaudia, bona seseahu. Bae reḡu ḡaudia bunu. 32 Eleasara, hahelaḡa tauna, Aaron natuna, na Levi taudia iboudiai ikwaradia, bona gabu helaḡana ḡaukaradia ikaradia taudia edia heitatao tauna.

33 Merari garana na Mali taudia bona Musi taudia: Merari iduhudia bunu. 34 Edia mamaruane e duahidia, hua ta e hanaia amo, iboudiai na 6,200. 35 Ikwaradia tauna na Suriele Abihaili. Edia taruha gabuna na dubu mirigini kahana ai. 36 Bae reḡu ḡaudia bini: dubu habana kahadia, bona raroraro, bona ihua-ihua, bona hahelai-kau ḡaudia mai kohudia iboudiai; 37 bona maḡu duna iboudiai mai ihahelai-kaudia ḡaudia, bona edia ikokobona edia kwanau.

38 Dubu mairiveina kahana ai bae taruah taudia, hebou kalagana vairanai, dina e daemu kahana ai, be Mose bona Aaron mai natuna ida. Idia ese gabu helaḡana ḡaukaradia bae kara, Israel taudia daidiai. Idau tauna ta baine raka kahi, vada bae alaia mase. 39 Levi taudia, Mose bona Aaron ese iduhu ta ta amo e duahidia, Iehova ena haheḡani dainai, ibouboudiai, hua ta e hanaia amo, na 22,000.

Roboa mamaruanedia ibololaidia

40 Iehova ese Mose e hamaoroa, eto, Israel taudia natudia mamaruanedia roboadia ba duahidia, bona ladadia ba tore, hua ta vada e hanaia amo. 41 Bena Levi taudia bavabidia, lau Iehova egu, hari Israel taudia natudia mamaruanedia roboadia ibololaidia; Levi taudia edia boromakau danu bavabidia, Israel taudia edia boromakau natudia mamaruanedia roboadia ibololaidia. 42 Taunabunai, Mose ese Israel taudia natudia mamaruanedia roboadia e duahidia, Iehova ese e haḡania heḡereḡerena. 43 Roboa mamaruanedia dia iboudiai hua ta e hanaia amo, e duahidia bona ladadia e tore. Ibouboudiai na 22,273.

44 Bena Iehova ese Mose e hamaoroa, eto, 45 Levi taudia bavabidia, Israel taudia natudia mamaruanedia roboadia ibololaidia, bona Levi taudia edia boromakau bavabidia, edia boromakau ibololaidia. Levi taudia na lauegu: lau binai Iehova. 46 A Israel taudia natudia mamaruanedia roboadia sinahu-rua hitu-ahui toi asi ibololaidia Levi oreana amo be davadia bakara: 47 ta ta amo sekele ima ima amo ba heni. Unu sekele be gabu helaḡana ena sekele: sekele ta lalonai gera
“Sekele” bona “gera” be Heberu taudia edia metau hahetoho ḡaudia. Sekele ena metau be 16 grams sisivana. Sekele ta lalonai gera be ruahui.
be ruahui.
48 Bena una moni, hari roboa mamaruanedia ese Levi taudia e hereadia taudia davadia, be Aaron mai natuna ida ba henidia. 49 Taunabunai hari Levi taudia ese asie bololaidia taudia davadia be Mose ese e abi, 50 Israel taudia natudia mamaruanedia roboadia edia amo, sekele daha-ta sinahu-toi tauratoi-ahui ima, gabu helaḡanaena sekele heḡereḡerena. 51 Bena Mose ese una moni na Aaron mai natuna ida e henidia, Iehova ese e haḡania heḡereḡerena.

Copyright information for `MEU