Numbers 30

Gwauhamata

Mose ese Israel iduhudia lohiadia e hereva henidia, eto, Iehova ena haheḡani binai: tau ta ese Iehova baine gwau henia hamata, eiava Iehova vairanai baine gwau hamata kara ta baine karaia, ia na basine koikoi; ena gwau hamata do baine hamomokania.

Tamana ena ruma ai nohona ai, hane-ulato ta ese Iehova baine gwau henia hamata, bona Iehova vairanai baine gwau hamata kara ta baine karaia, bena tamana ese ena gwau hamata baine kamonai a hereva ta basine gwauraia, una hane-ulato ena gwau hamata baine gini. A ena gwau hamata baine kamonai negana ai tamana ese baine gwaua tao, ena gwau hamata na asi anina: Iehova ese danu baine gwaua tao, badina be hane-ulato tamana ese e gwaua tao.

Hane-ulato ese ena gwau hamata karana do basine haḡuḡurua negana ai baine headava, bena adavana ese ena gwau hamata sivaraina baine kamonai dinana ai hereva ta basine gwauraia, una hahine ena gwau hamata baine gini, anina do baine karaia. A baine kamonai dinana ai adavana ese baine gwaua tao, ena gwau hamata na asi anina; Iehova ese danu baine gwaua tao.

Vabu ta, eiava diho hahinena ta, ena gwau hamata do baine gini, anina do baine karaia. 10 Bema adavana dekenai e nohova ai na e gwau hamata, 11 bena adavana na e kamonai a hereva ta se gwauraia; gwauraia bona se gwaua tao, ena gwau hamata do baine gini, anina baine karaia. 12 A bema e kamonai dinana ai adavana ese e gwaua tao, ena gwau hamata na basine gini: adavana ese vada e gwaua tao; Iehova ese danu baine gwaua tao. 13 Hahine ena gwau hamata adavana ese baine hamomokania diba, eiava baine gwaua tao diba. 14 A dina haida baela, adavana ese hereva ta basine gwauraia, una be ena gwau hamata hamomokania karana; vada e hamomokania, badina be e kamonai dinana ai ia na se hereva. 15 A baine kamonai murinai baine gwaua tao, hahine ena kerere be ia ese baine huaia.

16 Iehova ena haheḡani bunu, ia ese Mose e henia: tau mai adavana ida taravatudia, bona tau mai natuna kekenina ida taravatudia, kekeni na tamana ena ruma nohona ai.

Copyright information for `MEU