Proverbs 15

Haere manauna ese badu e laoa ahumu,
a gwau turianki ese badu e havaraiamu.
Aonega tauna malana amo aonega herevadia na e hetuturumu,
a kavakava taudia ududia amo kavakava herevadia na e aru lasimu.
Iehova matana ese gabu iboudiai e nenediamu,
dika taudia bona namo taudia e itadia taomu.
Mala manadana na mauri auna ta,
a mala gageva-gagevana ese dara doko e havaraiamu.
Kavakava tauna ese tamana ena hahediba e dadaraiamu,
a sisiba herevadia e hakala henidiamu tauna na lalo-parara tauna.
Kara maoromaoro tauna ena ruma ai na kohu momo,
a kara dika tauna ena davari-davari ḡaudia ese ena hekwakwanai e havaraiamu.
Aonega na aonega taudia bibinadia ese e piuamu,
a kavakava taudia lalodia na unu asie kara tomamu.
Kara dika tauna ena boubou ḡauna na Iehova ese e ihi-ihiraiamu,
a kara maoromaoro tauna ena ḡuriḡuri na ia ese e moalelaiamu.
Kara dika tauna ena dala na Iehova ese e ihi-ihiraiamu,
a kara maoromaoro e ḡavaiamu tauna na ia ese e lalokau heniamu,
10 Mata-hakani auka-hereana na dala e rakataniamu tauna enai;
sisiba e inai heniamu tauna na baine mase.
11 Mase gabuna bona dobu masemase gabuna na hehedina-rarai, Iehova vairanai;
matona, taunimanima lalodia na ienai eme hedinarai ḡuḡuru.
12 Ḡonaḡona tauna na se uramu bae sisiba henia;
ia na aonega tawla dekena basinela.
13 Lalo moale na vaira namo ai e hedinaraimu,
a lalo hisihisi ese dara doko e havaraiamu.
14 Lalo-parara tauna lalona ese aonega e tahuamu,
a kavakava taudia ududia ese kavakava e aniamu.
15 Hisi e animu tauna ena mauri dinadia iboudiai na didika,
a lalo-moale tauna na bogana e kunu hanaihanaimu.
16 Ḡau maraḡi-maraḡina Iehova igari-henina ida ese
taḡa badana mai hekwakwanaina ida e hereaiamu.
17 Aniani asi ianimaina lalokau e miamu gabuna ai ese
vamu manoka-manokana heinai-hehenina ai e animu na e hereaiamu.
18 Badu haraḡa tauna ese heiri-heiri e havaraiamu,
a badu ai e halahemu tauna ese heiri-heiri e haumaia tarimu.
19 Lahedo tauna ena dala na au ḡiniḡini ai e bubunimu,
a kara maoromaoro tauna ena dala na dala avohana.
20 Aonega merona ese tamana e hamoaleamu,
a kavakava tauna ese sinana e dadaraiamu.
21 Asi darana tauna ese kavakava e moalelaiamu,
a lalo-parara tauna na e raka maoromaoromu.
22 Ta se hahealomu negana ai, taunimanima edia lalo-hata ḡaudia asie tubu namonamomu;
a hahealo taudia na hoho negana ai na e tubu ḡoevaḡoevamu.
23 Haere maorona ese taunimanima e hamoaleamu,
bona nega korikorina ai e gwauraiamu herevana be daka namo!
24 Aonega tauna ena dala ese mauri e dae heniamu,
mase ena dobu gabuna ai basine kau helaoreana.
25 Iehova ese hekokoroku tauna ena ruma e veria garimu,
a vabu ena tano hetoadia e gimadiamu.
26 Kara dika taudia edia lalo-hadai na Iehova ese e inai henidiamu,
a lalo-ḡoevaḡoeva taudia edia hereva na ia ese e moalelaimu.
27 Mata-ḡaniḡani tauna ese hekwakwanai e havaraiamu ena ruma taudia ediai,
a henitao dikadia e inai henimu tauna na baine mauri.
28 Kara maoromaoro tauna ese lalona e hadaia namonamomu ede baine haere toma,
a kara dika tauna uduna amo hereva dikadia na e aru lasimu.
29 Iehova bona kara dika taudia padadia na daudau,
a kara maoromaoro tauna ena ḡuriḡuri ia ese e kamonaiamu.
30 Mata diaridia ese tau lalona e hamoaleamu,
bona hari namodia ese turia e ha-aukadiamu.
31 Sisiba herevadia namodia e hakala henimu tauna na
aonega taudia bogaragidiai baine noho.
32 Hahediba se abi daemu tauna na sibona e hedadaraimu,
a sisiba herevadia e kamonaimu tauna lalona na e pararamu.
33 Iehova igari-henina na aonega idavarina badina,
bona manau ese heimodai e gunalaiamu.
Copyright information for `MEU