Proverbs 30

Aguru Iake, tau Masa, ena hereva bini. Hari tau eto:

Na hesikumu, Dirava e, na hesikumu;
Dirava e, egu goada vada e ore.
Momokani, lau na kavakava herea, dia taunimanima na heto;
asi daragu taunimanima darana na heto.
Aonega asina davaria;
Helaḡa Diravana na asi dibagu.
Daika na guba ai vada e dae, bona ma e diho?
Daika ese lai na imana ai vada e kahua tao?
Daika ese davara na dabua ai vada e kumia?
Daika ese tanobada dokodia iboudiai vada e hadai?
Ia ladana be daika, bona natuna ladana be daika?
Vada o diba, ani!

Dirava ena hereva iboudiai na momomo-kakani;
enai e roho maurimu taudia edia kesi na ia.
lena hereva latadiai hereva ta basio atoa kau,
baine gwau henimu bena emu koikoi baine hedinarai na garina.
Ḡau rua emu ai na noimu;
do asina mase ai basio rudia.
Koikoi karadia bona herevadia egu amo bavabidia daudau;
ogoḡami eiava taḡa basio henigu,
a egu hitolo heḡereḡerena ai mo ba ubugu;
bogagu baine kunu bena baina ḡoremu,
bainato “Iehova be daika?” na garina;
eiava baina ogoḡami, bena baina henao-henao,
bona egu Dirava ladana baina ḡonaḡonalaia na garina.

10 Hesiai tauna na biaguna enai basio habadelaia koikoi;
baine uduguiraimu, bena kereremu bae gwauraia na garina.

11 Haida ese tamadia e uduguiraidiamu,
bona sinadia asie hanamodiamu.
12 Haida na sibodia edia ita-ita ai ḡoḡoeva-ḡoḡoeva etomamu,
a ḡau be edia miro amo do asie ḡoeva.
13 Haida be matadia e heaḡimu,
bona ibunidia e haroroka-rorokamu.
14 Haida na isedia be dare,
bona gadigadidia be kaia;
idia ese ogoḡami taudia tanobada amo e anidia oremu,
bona e dabumu taudia taunimanima bogaragidia amo danu.
15 Doma na mai natuna hahinedia rua;
“A henimai, a henimai” e tomu.
Ḡau toi bogadia asie kunumu;
ḡau hani nega ta asie tomu “Vadaeni”.
16 Gaudia be mase gabuna, bona gabani hahinena bogana,
bona tanobada, nega idoinai ranu e maseamu,
bona lahi, nega ta asine tomu “Vadaeni”.
17 Tamana e ḡonaḡonalaiamu bona sinana e gwau edeede heniamu tauna matana na
koura galodia ese bae giboa lasi,
bona ugava ese bae ania.

18 Ḡau toi na mai hoadia bada egu ai;
ḡau hani be asi dibagu.
19 Ḡaudia be ugava ena dala guba ai,
bona gaigai ena dala hagahaga nadina ai,
bona lagatoi ena dala gadobada ai,
bona tauhau ena dala hane-ulato enai.

20 Heuda-hanai hahinena ena dala binai:
e anianimu, bena uduna e dahuamu,
bena e tomu “Asina kerere”.

21 Ḡau toi henudiai tanobada e heude-heudemu;
ḡau hani henudiai basine gini auka.
22 Ḡaudia be hesiai tauna, pavapava ai e hahelaomu negana ai;
bona kavakava tauna, bogana e kunumu negana ai;
23 bona ta ese se lalokau heniamu hahinena, e headavamu negana ai;
bona hesiai kekenina, biaguna gabuna e abiamu negana ai.

24 Ḡau hani tanobada ai na mamaraḡi,
a idia na a'aonega heherea:
25 dimairi na asi goadadia,
to taboro negana ai adia e haboumu;
26 miḡu danu asi goadadia,
to edia ruma na tano lalonai e karamu;
27 kwadi na asi edia pavapava,
to e raka ere-eremu, tuari oreana na heto;
28 vaboha na imamu ai bavabia diba,
to ia na pavapava edia ruma ai e nohomu.

29 Ḡau toi e raka ruturutumu;
ḡau hani e raka turiaturiamu.
30 Ḡaudia be leona, uda ḡaudia bogaragidiai ia mo herea,
bona ḡau ta vairanai ia na se raka murimu;
31 bona kokoroku maruanena; bona nani maruanena;
bona hanua pavapavana, ena orea matana ai e rakamu.

32 Boma kavakava, sibomu boma heaḡi,
eiava kara dika boma laloa hata,
bena udumu na imamu amo ba koua.
33 Badina be rata ba taoa, rata-hetarina digarana ba davaria;
bona udu baubauna ba taoa tari, bena rara baine aru;
bona badu ba taoa, bena heiri-heiri baine vara.
Copyright information for `MEU