Proverbs 5

Natugu e, egu aonega ba hakede henia,
taiamu ba hakala, egu lalo-parara enai;
kara balaheni ba badinaia
bona bibinamu ese aonega bae gimaia totona.
Badina be bada-ranuna na lebulebu hahinena bibinana amo e hetuturu dobimu,
bona ena hereva digarana ese dehoro digarana e hereaiamu;
a dokona ai ia na idita, muramura iditana na heto;
bona mai ganona, isena ruaosi e segedia darena na heto.
Aena ese mase e diho heniamu,
mase gabuna e lao heniamu dalana ai e rakamu;
mauri dalana nahuana na se tohoamu;
e raka kava raka kavamu, to ena dala asi dibana.

Natu e, a kamonai henigu;
udugu herevadia basio rakatanidia.
Hahine unuhetomana na dauhai ba rakaia hanai,
ena ruma iduarana basio raka henia kahi;
ikwahimu na haida ese bae abi
bona emu mauri laḡanidia na asi edia hebogahisi taudia ese bae abi oho na garina;
10 idau taudia ese oi goadamu amo bae goada
bona emu hekwarahi anina ese idau tauna ena ruma baine hanamoa na garina;
11 ela bona emu mauri dokona ai ba ḡanaḡana,
gorere ese hidiomu bona tau-animu baine ha-ore negana ai.
12 Una negana ai baoto: Mata-hakani na inai heniava,
bona lalogu ese sisiba herevadia e dadaraidiava;
13 e hadibagu taudia eredia asina kamonaiva,
bona egu hahediba taudia asina hakala henidiava;
14 mokona na dika vaitani
hebou taudia bogaragidiai.

15 Sibomu emu ranu gabuna amo,
sibomu emu ranu gurina amo,
ranu ba inua.
16 Emu ranu baine lohilohi rohoroho
eiava ariara ai baine aru lao a?
17 Lasi, baine mia sibomu emu;
idau taudia ida basie inua hebou.
18 Emu ranu lohilohina baine namo;
eregabemu ai o adavaia hahinena na ba moalelaia.
19 Ia na dia hahinena namo-hereana na heto,
eiava-miara raho-namona na heto.
Ena lalokau ba moalelaia nega iboudiai;
ena uraheni ese lalomu baine hahonua hanaihanai.
20 Natugu e, anina be dahaka lebulebu hahinena boma ura henia lalo-dika?
Badina be dahaka anara hahinena ba rosia?
21 Badina be tau ta ena kara na Iehova ese e itadiamu;
Iehova ese ena dala iboudiai e itadia taomu.
22 Kara havara tauna na ena kara havara ese e idoaiamu,
ena kara dika ese e ḡuiamu.
23 Matana asi ihakanina dainai e masemu;
ena kavakava bada-herea dainai e boiomu.
Copyright information for `MEU