Proverbs 6

Natugu e, dekemu tauna dainai boma gwau hamata,
eiava idau tauna dainai boma gwau guna,
eiava bibinamu reḡedia ese bema idoamu,
eiava udumu herevadia ese bema hahekwakwanaimu,
natugu e, ini boma kara toma, sibomu boma hahemauri,
badina be oi na dekemu tauna imana ai:
aola haraḡa, dekemu tauna ba noia.
Matamu basie mahuta,
matamu kopidia basie kapu;
ba roho mauri, uda nanina ese labana tauna imana amo
eiava manu ese manu-tahu tauna imana amo
e roho maurimu na heto.

Lahedo taumu e, dimairi ba lao henia;
ena kaura ba laloa, bena aonega ba davaria.
Ia na asi lohiana, asi biaguna, asi pavapavana,
to lahara negana ai ana aniani e abimu,
bona taboro negana ai e haboumu.
Lahedo taumu e, ba hekure ela bona edena nega ai?
Edena nega ai emu mahuta amo ba noga?
10 Matamu ba taia, ba laḡa ani sisina,
nega sisina kwaramu na imamu ai ba hahekwinaia;
11 bena ogoḡami ese baine abimu, dadidadi tauna na heto,
bona dabu na emu ai baine kau, tuari tauna na heto.

12 Kara kava tauna, kara dika tauna,
e loa eva-evamu mai hereva gageva-gagevana ida;
13 matana e hakunumaiamu, aena amo tano e dadaroamu,
bona dodoriana e duduiamu;
14 lalona gageva-gagevana amo kara dika e laloa hatamu,
heiriheiri e havaraia louloumu.
15 Taunabunai hahedika ese baine halahuia;
mata-kunumai tamona ai baine dika,
ta basine hamauria diba.

16 Ḡau tauratoi Iehova ese e inai henidiamu,
ḡau hitu ia ese e badulaidiamu:
17 hekokoroku matadia, koikoi malana,
bona asi ena kerere tauna rarana e hahebubuamu imadia;
18 lalo-hadai dikadia e lalo hatamu lalona,
bona kara dika e heau heniamu aedia;
19 hahebade koikoi tauna, koikoi herevadia mo e gwauraimu,
bona heiri-heiri na tadikaka bogaragidiai e havaraiamu tauna.

20 Natugu e, tamamu ena haheḡani ba badinaia,
bona sinamu ena hahediba herevadia basio rakatanidia.
21 Nega idoinai lalomu ai ba ḡuidia,
bona aiomu ai ba taudia dae.
22 Ba raka negana ai bae hakaumu;
ba hekure negana ai bae gimamu;
ba noga negana ai bae hereva henimu.
23 Badina be haheḡani na lamepa,
bona hahediba na diari,
bona mata-hakani na mauri dalana.
24 Idia ese hahine dikana ena amo bae hamaurimu,
bona ariara hahinena malana gaihona amo danu.
25 Ia hairaina na lalomu ai basio ḡahusia,
bona nahuamu ba tohoa, matana rauna ese baine idoamu na garina;
26 badina be ariara hahinena na flaoa igabu ta bae davalaia,
a heuda-hanai hahinena ese tau ta ena mauri e rau heniamu.
27 Tau ta ese lahi na kemena ai bema abia loaloa,
ena dabua basinema ara a?
28 Eiava tau ta ese gida latadiai bema raka,
aena basinema haraka a?
29 Dekena tauna adavana dekenai e raka vareaimu tauna na unuheto;
enai e daukaumu tauna ta na mata-hakani amo basine roho mauri.
30 Hitolo dainai aniani baine henaoa tauna na
taunimanima ese bae ihi-ihiraia ani?
31 A bema davaria, ia na dava baine heni hahitu;
ena ruma kohuna idoinai baine heni.
32 E heuda hanaimu tauna na asi darana;
ia na sibona e healamu;
33 bero bona hedadarai baine abi,
ena hemarai na basine heroho.
34 Badina be mama ese tau ta lalona e habaduamu;
dava iabina negana ai, ia na asi ibogahisina.
35 Heaiva kohuna basine abia;
bona herahia momo amo ia lalona basio hakerua diba.
Copyright information for `MEU