Psalms 106

Iehova ba imodaia!
Iehova ba hanamoa, badina be ia na namo,
ena hebogahisi na e hesiriu hanaihanaimu.
Daika ese Iehova ena siahu karadia baine herevalaidia?
Daika ese ena heimodai karadia iboudiai baine hahedinaraidia?
E hahemaoro goevaḡoevamu bona nega iboudiai kara maoromaoro e karamu
taudia na nanamo.

Iehova e, emu orea taudia ba hanamodia negana ai na lau danu ba lalogu;
ba hamauridia negana ai na lau danu ba durugu;
unu amo emu abi-hidi taudia edia namo ihabadana baina itaia,
emu orea taudia edia moale baina moalelaia,
bona oi ahumu baina heaḡilaia.
Ai bona tamamai vada a kerere,
vada a kara dika, vada a kara havara.
Senemai na Aigupto ai e nohova negana ai na
oiemu hoa karadia asie haerodia;
asie laloa tao emu hebogahisi na bada herea,
a Davara Kakakakana isena ai idia ese Herea Mikamika e gwau ede ede henia.
Ḡau tamona ia ese e hamauridia, ia ladana bagunai,
ena siahu herea-daena baine hahedinarai helaoreana.
Ia ese Davara Kakakakana e gwau henia, bena e kororova,
bena dobu gabuna amo e hakaudia hanai,
tano ḡaḡaena amo bema hakaudia hanai heḡereḡerena.
10 Unu amo ia ese inaidia imadia amo e hamauridia,
inai taudia edia siahu amo e harohodia mauri.
11 Davara ese idia inaidia e habubunidia,
ta se roho mauri.
12 Bena idia ese ena hereva e abidia dae,
bona ia ihanamolaina anedia e abi.

13 A idia ese ena kara e lalodia boio haraḡa;
ena hahealo asie nariava.
14 Idia na tano ḡaḡaena ai e ura kava ura kavava,
tano ḡaḡaena ai idia ese Dirava e dibaḡania.
15 Bena ia ese edia ura e henidia,
a gorere dikana ta e siaia, idia tau-anidia ihavarodavarodadia.

16 Taruha taudia haida ese Mose bona Iehova ena hahelaḡa tauna Aaron
e vaḡeḡe henidiava.
17 Una negana ai tano ese uduna e haḡaia, Datan e hadonoa;
bona Abiram ena orea taudia e habubunidia;
18 lahi danu e ara edia orea bogaraginai,
lahi hururuna ese kara dika taudia e haḡoledia oho.

19 Boromakau natuna laulauna e karaia Horeb ai,
gold kaivakukuna e toma henia diho;
20 Dirava hairaina na e bodohia,
boromakau maruanena, rei e aniamu ḡauna, laulauna na ia gabuna ai e abia.
21 Ihamauridia Diravana, Aigupto ai kara badadia e karava
22 bona Ham ena tano ai hoa karadia e karava
bona Davara Kakakakana isena ai hahegari karadia e karava
Diravana na e laloa boio.
23 Taunabunai baine habuadia tari eto,
a iena abi-hidi tauna Mose na pada ai e gini, ia vairanai,
ena badu baine laoa ahu bena basine habuadia tari helaoreana.

24 Bena idia ese tano namo-hereana e dadaraia,
iena gwauhamata asie abidadama henia.
25 Edia kalaga ai e maumau,
bona Iehova gadona asie kamonai henia;
26 taunabunai ia ese imana e duduia isi, e gwau henidia hamata,
tano ḡaḡaena ai baine hamorudia,
27 bona garadia na baine hakarohodia bese idau-idau bogaragidiai,
baine hakarohodia rohoroho tano idau-idau ai eto.

28 Peoro ena Baal e badinaia,
mase iboulaina ḡauna e ani.
29 Edia kara amo Iehova e habadua,
bena gorere dikana na ediai e dai hanai;
30 Fineha e tore isi, e oro oro,
bena gorere e doko.
31 Una na e gwauraia iena kara maoromaoro;
uru iboudiai ese bae herevalaia ela bona hanaihanai.

32 Meriba ranudia badidiai idia ese e habadua,
bona Mose na siriana e reaia, idia daidiai;
33 badina be idia daidiai ia lalona e turiariki,
bena hereva kavakavadia e gwaurai.

34 Idia ese bese idau-idau taudia asie habuadia tari,
Iehova ese e haḡanidia heḡereḡerena;
35 a unu bese ida e noho hebouva,
edia kara e manadalaiva.
36 Edia kaivakuku e toma henidia dihova,
bena idoa ai ela idia ediai.
37 Natudia mamaruanedia bona natudia hahinedia na
boubou ḡaudia ai e halaodiava,
lauma dikadia iboulaidia.
38 Kanaan taudia edia kaivakuku e boudia negadia ai na
asi edia kerere taudia raradia e hahebubuva,
natudia mamaruanedia bona natudia hahinedia raradia;
bena rara ese tano idoinai e hadikaiava.
39 Unu amo edia kara ese e hamirodiava;
lebulebu karadia e karava.
40 Bena Iehova ena badu e ḡaraḡara, ena orea taudia ediai;
ena abi-hidi taudia e ihi-ihiraidia;
41 bese idau-idau taudia imadia ai e atodia,
bena e inai henidia taudia ese e biagudia.
42 Inaidia ese e daḡedaḡe henidia,
bena edia iḡui taudia ai ela;
43 nega momo ia ese e ruhadia nege,
to lalodia na e gwau ede ede,
bona edia kara dika ese e hahekwakwanaidia.
44 Ḡau tamona, edia taitai e kamonai negadia ai,
edia hisihisi e laloa;
45 idia daidiai ena gwauhamata e laloa tao,
ena hebogahisi bada-herea dainai edia dika e lalo nege.
46 Ia ese ibogahisidia dalana e havaraia,
unu e ḡuidia taudia ese bae bogadia hisi totona.

47 Iehova e, emai Dirava, a hamaurimai;
bese idau-idau bogaragidia amo ba haboumai gogogogo,
oi ladamu helaḡana baia imodaia totona,
oi ihanamomu baia heaḡilaia helaoreana.
48 Iehova, Israel Diravana, bae hanamoa,
matamana amo ela bona dokona.
Taunimanima iboudiai na baeto “Amen”.

Iehova ba imodaia!
Copyright information for `MEU